លំហាត់ប្រាណចំនួន ៣ ដែលអ្នកត្រូវការដើម្បីទប់ទល់នឹងការអង្គុយពេញមួយថ្ងៃ

តើអ្នកជាមនុស្សអង្គុយធ្វើការពេញមួយថ្ងៃមែនទេ? តើអ្នកចំណាយពេលភាគច្រើនបំផុតក្នុងមួយថ្ងៃៗអង្គុយនៅមុខកុំព្យូទ័រ ឬឡេបថប់មែនទេ? យោងតាមរបាយការណ៍មួយពី CNN ការអង្គុយពេញមួយថ្ងៃពិតជាអាចសម្លាប់អ្នកបាន ឬយ៉ាងហោចណាស់ក៏វាអាចធ្វើឲ្យអ្នកថយអាយុច្រើនឆ្នាំដែរ។ នៅពេលអ្នកអង្គុយរយៈពេលយូរ ខ្លួនរបស់អ្នកចាប់ផ្តើមកោងបន្តិចម្តងៗ។ សរីរាង្គខាងក្នុងរបស់អ្នកចាប់ផ្តើមរួមតូចទៅៗ និងត្រូវបានបង្ខំឲ្យបំពេញមុខងាររបស់វាតែក្នុងទំហំដ៏តូចមួយប៉ុណ្ណោះ។ យូរៗទៅ ឆ្អឹងខ្នងនឹងចាប់ផ្តើមខ្សោយទៅៗដោយសារតែសម្ពាធតឹងមិនធម្មជាតិដែលសង្កត់ក្នុងសន្លាក់។ សាច់ដុំត្រគាក និងសន្លាក់ចាប់ផ្តើមរួមតូច និងតឹងណែន ដោយធ្វើឲ្យការឈរត្រង់លែងសូវស្រួលដូចពីមុន។ ទីបំផុត លំហូរឈាមក្នុងរាងកាយថយចុះដោយសារតែកង្វះចលនារាងកាយ។ នេះគឺហេតុផលមួយផ្នែកដែលធ្វើឲ្យជើង និងកែងជើងហើមអំឡុងពេលអង្គុយរយៈពេលយូរ។ ការលើកឡើងនេះគឺជាការក្រើនរំលឹកមួយយ៉ាងច្បាស់ថា ប្រសិនបើអ្នកអង្គុយយូរពេញៗមួយថ្ងៃ អ្នកច្បាស់ជាធ្វើឲ្យមានផលប៉ះពាល់ដល់រាងកាយរបស់អ្នក។   

ដំណឹងអស្ចារ្យគឺថា មានលំហាត់ប្រាណដោយប្រើស្នោរំកិលសាមញ្ញៗ ដែលអ្នកអាចធ្វើបានយ៉ាងងាយស្រួលនៅផ្ទះ។ លំហាត់ប្រាណទាំងនេះអាចជួយព្យាបាលរាងកាយរបស់អ្នកបាន ដោយចំណាយពេលមិនដល់ ១៥ នាទីនោះទេ។ សូមយកស្នោរំកិល ឬរបស់មូលៗដែលអាចរមៀលបាន មកសាកល្បងហាត់ប្រាណតាមរបៀបទាំងបីដូចខាងក្រោម។ 

១- ហាត់សម្រួលសាច់ដុំគូទ (Glute Smash)
ប្រសិនបើអ្នកអង្គុយទ្រាប់គូទពេញមួយថ្ងៃ អ្នកក៏ត្រូវចេះអាណិតគូទរបស់អ្នកវិញដែរ។ មនុស្សភាគច្រើនមិនចាប់អារម្មណ៍ថា ការធ្វើចលនាគូទចុះឡើងៗនឹងជួយធ្វើឲ្យធូរលើសពីសាច់ដុំគូទនោះទេ។ អ្នកក៏នឹងជួយធ្វើធូរសរសៃ​ពួរ​គន្លាក់​ជើង​ផ្នែក​ខាងលើរបស់អ្នក និងអាចជួយបំបាត់សម្ពាធមួយចំនួនចេញពីខ្នងរបស់អ្នកផងដែរ។ 

របៀបហាត់: ដាក់របស់ដែលអាចរមៀលបានឬស្នោរំអិលពីក្រោមសាច់ដុំគូទម្តងម្ខាង។ រំកិលលើស្នោរំអិលនោះចុះឡើងៗរហូតដល់អ្នករកឃើញចំណុចតឹងណែននៃសាច់ដុំគូទ។ ធ្វើបែបនេះ ២ នាទីដើម្បីពន្លាសាច់ដុំគូទឲ្យធូរ។ បត់ជើងលើជង្គង់ម្តងម្ខាងនៅពេលសម្រួលសាច់ដុំគូទម្ខាងៗ។  

២- ហាត់សម្រួលសរសៃពួរសាច់ដុំត្រគាក (Hip Flexor)
ដូចដែលខ្ញុំបាននិយាយមុននេះអ៊ីចឹង នៅពេលអ្នកអង្គុយយូរពេក សាច់ដុំត្រគាក (រួមទាំងសរសៃពួរសាច់ដុំត្រគាក) ចាប់ផ្តើមរួមតូច និងកាន់តែតឹង។ ត្រគាកតឹងធ្វើឲ្យពិបាកឈរត្រង់ ហើយសន្លាក់ដែលតឹងបានដាក់សម្ពាធច្រើនទៅលើខ្នង។ ត្រូវសណ្តូកជើងឲ្យត្រង់​ដើម្បីសម្រួលសរសៃពួរសាច់ដុំត្រគាក។ 

របៀបហាត់: ដេកផ្អៀងទៅម្ខាង រួចរំកិលភ្លៅផ្នែកខាងលើ (ក្បែរត្រគាក) ចុះឡើងៗពីលើស្នោរំអិល ដើម្បីសម្រួលដល់ជាលិកាសាច់ដុំ ភ្នាសស្តើងៗនៅក្រោមស្បែក និងសរសៃពួរនៅចន្លោះជង្គង់ និងត្រគាករបស់អ្នក។ ត្រូវធ្វើបែបនេះចុះឡើងចុះឡើងរហូតដល់មានអារម្មណ៍ថាធូរស្បើយ។  

៣- ហាត់សម្រួលសាច់ដុំខ្នង (T-Spine Smash)
ការធ្វើចលនាសាមញ្ញៗនេះគឺជារបៀបហាត់ដ៏ពេញចិត្តបំផុតរបស់ខ្ញុំព្រោះវាជួយទប់ទល់នឹង "អាការៈកោងខ្នងដ៏គួរឲ្យខ្លាច" ដែលមនុស្សជាច្រើនបានកើតដោយសារតែអង្គុយមុខកុំព្យូទ័រយូរៗពេក។ អត្ថប្រយោជន៍បន្ថែមដ៏អស្ចារ្យគឺថា ផ្នែកនៃការធ្វើចលនាបែបនេះបានរត់ទៅដល់ស្មា ដូច្នេះវាជួយឲ្យអ្នកបន្ធូរភាពតឹងណែនដែលបានពូនផ្តុំអស់ពេញមួយសប្តាហ៍។ 

របៀបហាត់: ដេកបញ្ឈរជង្គង់ ហើយកែងជើងដាក់ឲ្យនៅកៀកនឹងកំប៉េះគូទ។ ដាក់ស្នោរំអិលនៅពីក្រោមខ្នងរបស់អ្នក។ មើលទៅត្រង់ ហើយឱបដៃខ្លួនឯងឲ្យណែន។ ធ្វើខ្នងឲ្យត្រង់ និងរំកិលខ្នងចុះឡើងៗរហូតដល់កៀកនឹងស្មា។ ធ្វើបែបនេះឲ្យបានរាងយូរបន្តិច។ ប្រសិនបើអ្នកនៅមិនទាន់យល់ច្បាស់ពីរបៀបហាត់ទាំងអស់នេះ សូមចូលទៅរក App មួយឈ្មោះថា MoveWell ដែលនឹងណែនាំអ្នកពីរបៀបហាត់នីមួយៗ ពីមួយដំណាក់កាលទៅមួយដំណាក់កាល ឬចូលទៅមើលរបៀបហាត់តាម YouTube ដោយវាយពាក្យថា Glute Stretches Hip Stretches Thoracic Spine Stretches៕ 

adverise with khmeread
Tiger underlay c9ce07c59b0a5a71a92aa6489bb9e4539688761ff500354deb2b660a9b69bd81