adverise with khmeread 9881b900 4fa5 4033 80ee 56f1f53d69f0

ប្រគល់​ជនប្រដាប់អាវុធ​៤​នាក់​ឱ្យ​ប៉ូលិស​កសាង​សំណុំរឿង​បញ្ជូនទៅ​តុលាការ​

    ស្ទឹងត្រែង​ ៖ ប៉ូលិស​ខេត្តស្ទឹងត្រែង​បាន​រាយការណ៍​នៅ​ព្រឹក​ថ្ងៃទី​២៥​ កក្កដា​ ឆ្នាំ​២០១៦នេះ​ថា ជន​ប្រដាប់​អាវុធ​៤​នាក់​ ដោយ​សហការ​ជាមួយ​មន្ត្រី​មន្ទីរ​បរិស្ថាន​ចាប់ខ្លួនបាន​កាលពី​ម្សិលមិញ បានប្រគល់​ឱ្យ​ប៉ូលិស​កសាង​សំណុំរឿង​បញ្ជូនទៅ​តុលាការខេត្ត​នា​ថ្ងៃនេះ។​

    គួររំលឹកថា ជនប្រដាប់អាវុធ​៤​នាក់​ ត្រូវបាន​កម្លាំង​អង្គការ​បរិស្ថាន​សហកា​រ​ជាមួយនឹង​ប៉ូលិស​ប៉ុ​ស្តិ៍​រដ្ឋបាល​អូរ​ស្វាយ ធ្វើការ​ឃាត់ខ្លួន​ព្រមទាំង​ដកហូត​កាំភ្លើង​ច្នៃ​២​ដើម​និង​អាកា ៣​ដើម​កាលពី​វេលា​ម៉ោង​១១​ និង​៤៥​នាទី​ថ្ងៃ​២៤ ខែកក្កដា ២០១៦ ក្នុងព្រៃ​សហគមន៍ ត្រង់ចំណុច​ភ្នំ​តា​កោ ស្ថិតក្នុង​ភូមិ​វ៉ឺ​ន​សៀន ឃុំ​អូរ​ស្វាយ ស្រុក​ថា​ឡា​បរិ​វ៉ា​ត់ ខេត្តស្ទឹងត្រែង។​

    សមត្ថកិច្ច​បានឱ្យដឹង​ថា ជនសង្ស័យ​ដែល​ឃាត់ខ្លួន​៤​នាក់​ទី​១- ឈ្មោះ ឡេង​ ណាត ភេទ​ប្រុស អាយុ​៣០​ឆ្នាំ ​រស់នៅ​ភូមិ​កោះ​កី ឃុំ​កោះ​ស្នែង ស្រុក​ថា​ឡា​បរិ​វ៉ា​ត់ ខេត្តស្ទឹងត្រែង​, ​ទី​២- ឈ្មោះ​ ឡុង ប៊ុន​ប៉ែង ភេទ​ប្រុស អាយុ​២០​ឆ្នាំ ​រស់នៅ​ឃុំ​អូរ​ស្វាយ ស្រុក​ថា​ឡា​បរិ​វ៉ា​ត់ ខេត្តស្ទឹងត្រែង​, ទី​៣- ឈ្មោះ ​នៃ ផែង ភេទ​ប្រុស អាយុ​៤៨​ឆ្នាំ រស់នៅ​ភូមិ​ថ្មី សង្កាត់​សាមគ្គី ក្រុង​ស្ទឹងត្រង ខេត្តស្ទឹងត្រែង ​និង​ទី​៤-ឈ្មោះ លី សុខុម ភេទ​ប្រុស អាយុ២៣​ឆ្នាំ រស់នៅ​ភូមិ​ថ្មី សង្កាត់​សាមគ្គី ក្រុង​ស្ទឹងត្រង ខេត្តស្ទឹងត្រែង​។​

    ប៉ូលិស​បន្តថា ជនសង្ស័យ​ខាងលើនេះ​បាន​ចូលទៅក្នុង​តំបន់​ការពារ​សត្វព្រៃ​វឿន​សៀន​ស្ថិតក្នុង​ឃុំ​អូរ​ស្វាយ ស្រុក​ថា​ឡា​បរិ​វ៉ា​ត់ ដើម្បី​បរបាញ់​សត្វព្រៃ និង​ឆក់​ត្រីយកមក​លក់។​

    ប្រតិបត្តិការ​នេះ​សមត្ថកិច្ច​ដកហូត​បាន​វត្ថុតាង​រួមមាន​កាំភ្លើង៥​ដើម ក្នុងនោះ​មាន​កាំភ្លើង​អាកា​ពិត​ចំនួន​៣​ដើម និង កាំភ្លើង​វែង​កែច្នៃ​២​ដើម ព្រមទាំង ប្រដាប់​ឆក់​ត្រី​២ អាគុយ​១ និង​គោយន្ត​១​គ្រឿង​ផងដែរ​។​

    ក្នុង​ករណី​ខាងលើនេះ​ប៉ូលិស​បាន​កសាង​សំណុំរឿង​និង​ជនសង្ស័យ​ទៅ​តុលាការ ចាត់ការ​តាមច្បាប់នា​ថ្ងៃនេះ៕


                 

adverise with khmeread

មតិយោបល់