adverise with khmeread Unnamed %281%29

ឃាត់​ជនជាតិ​យួន​៥​នាក់ លួច​ចូលមក​ជីក​រ៉ែ ខុសច្បាប់​នៅ​ស្រុក​អូរ​យ៉ា​ដាវ​

    រតនគិរី ៖ កម្លាំង​អាវុធហត្ថ​ស្រុក​អូរ​យ៉ា​ដាវ សហការ​ជាមួយ​កម្លាំង​ប៉ូលិស​ប៉ុស្តិ៍​ ឃុំ​ប៉ក់​ញ៉ៃ និង​កម្លាំង​ប៉ូលិសអន្តោប្រវេសន៍ ច្រកទ្វារ​អន្តរជាតិ​អូ​រយ៉ា​ដាវ បានធ្វើ​ការឃាត់​ខ្លួន​ជនជាតិ​យួន​៥​នាក់ ដែល​បាន​ចូលមក​លួច​ជីក​រ៉ែ​ដោយ​ខុសច្បាប់​កាលពី​ថ្ងៃទី​១២ ខែសីហា ឆ្នាំ​២០១៦​កន្លងទៅនេះ ត្រង់ចំណុច​ភូមិ​ប៉ក់​ធំ ឃុំ​ប៉ក់​ញ៉ៃ ស្រុក​អូរ​យ៉ា​ដាវ ខេត្តរតនគិរី។​

    ប្រតិបត្តិការ​នេះ​ដឹកនាំ​បញ្ជា​ផ្ទាល់​ដោយ​លោក ម៉ម វណ្ណដា ព្រះរាជអាជ្ញារង​អម​សាលាដំបូង​ខេត្ត​,​ ​លោក សុខ មីន មេបញ្ជាការ​អាវុធហត្ថ​ស្រុក ក្រោយពី​ទទួល​ព័ត៌មាន​ពី​កម្លាំង​សម្ងាត់​ថា មាន​ជនជាតិ​យួន​លួច​ជីក​រ៉ែ​ខុសច្បាប់​ក្នុងភូមិ​សាស្ត្រ​ខាងលើ​រួចមក រូបលោក​បាន​សុំ​យោបល់ ពី​លោក​ឧ​ត្ត​ម​សេនីយ៍​ត្រី គឹម រស្មី មេបញ្ជាការ​អាវុធ​ខេត្ត ដោយ​ចុះបង្ក្រាប​ជាក់ស្តែង​មាន​តំណាង​អ​ធ្យ​ការ​អម​សាលាដំបូង​ខេត្ត ដឹកនាំ​បញ្ជា​ផ្ទាល់​តែម្តង​។​

    មន្ត្រី​អាវុធហត្ថ​បានឱ្យដឹងថា ជនជាតិ​យួន​ចំនួន​៥​នាក់ ទី​១-​ឈ្មោះ ឡេ វ៉ាន់​គឿង អាយុ​៥២​ឆ្នាំ មាន​ស្រុកកំណើត​ក្រុង​ថា​ញ់​វៀន ខេត្ត​ញ៉ៃ​វៀន,  ទី​២-​ឈ្មោះ ឡា ឌឹ​ក​តាំង អាយុ​២២​ឆ្នាំ មាន​ទីលំនៅ​ភូមិ​ជាង ឃុំ​ទៀន​ញឹ​ង ស្រុក​ឃឿ​ង​ទុន ខេត្ត​ថា​ញ់​ហ៊, ទី​៣-​ឈ្មោះ វៀង ទន់​ឌឹ​ក អាយុ​៤៦​ឆ្នាំ មាន​ស្រុកកំណើត​ភូមិ​ថ្មី ឃុំ​ហ៊​ជុំ ស្រុក​ដុង​ហ៊ី ខេត្ត​ថា​ញ់​វៀន, ទី​៤-​ឈ្មោះ ចិន ម៉ី​ង៉​ង អាយុ​៣៨​ឆ្នាំ មាន​ទីលំនៅ​ភូមិ​តូ​ហាយ ឃុំ​ហ៊ី​ជី​ញ ស្រុក​ដុង​ហ៊ី ខេត្ត​ញ៉ៃ​វៀន និង​ទី​៥-​ឈ្មោះ វ៉ី ថា​ញ់​ដាយ អាយុ​៤៨​ឆ្នាំ មាន​ទីលំនៅ​ភូមិ​ថូន​ដាក់ថា​ញ់ ឃុំ​ណា​ម​ទន់ ក្រុង​ណូ ខេត្ត​ដាក់​ណុង​។​

    សមត្ថកិច្ច​បន្តថា បន្ទាប់ពី​ឃាត់ខ្លួន​កម្លាំង​ជំនាញ​ដកហូត​បាន​ម៉ាស៊ីនភ្លើង​ធំ​១​គ្រឿង ម៉ូ​ទ័​រ​បូមទឹក​២​គ្រឿង រថយន្ត​ឡង់​គ្រី​ស័​រ​១​គ្រឿង និង​ឧបករណ៍​សម្រាប់​ជីក​រ៉ែ មួយចំនួនទៀត​។​

    បច្ចុប្បន្ន​ជនសង្ស័យ​ចំនួន​៥​នាក់ ត្រូវបាន​កម្លាំង​សមត្ថកិច្ច​ដែល​ចុះ​ប្រតិបត្តិការ​បញ្ជូនមក​ស្ន​ង​ការ​ប៉ូលិស​ខេត្តរតនគិរី​ដើម្បី​ចាត់ការ​បន្តទៅ​តាមផ្លូវ​ច្បាប់​៕​

adverise with khmeread

មតិយោបល់