adverise with khmeread Unnamed %281%29

ចាញ់ល្បែង​អស់​លុយ ចូលទៅ​លួច​លុយ នៅ​កន្លែង​លេង​ហ្គេម​

    ភ្នំពេញ ៖ បន្ទាប់ពី​គេ​បានឮ សម្រែក​ថា​ចោរៗ​ និង​បានឃើញ​ជនសង្ស័យ​ម្នាក់​ជិះ​ម៉ូតូ​រត់គេចខ្លួន​យ៉ាង​លឿន ខណៈនោះ អ្នកដំណើរ​តាមផ្លូវ​មួយចំនួន បាននាំគ្នា​ជួយ​ដេញ​ម្ចាស់​សម្រែក​ថា​ចោរៗ​នោះ កាលពី​វេលា​ម៉ោង​៧ និង៣៥​នាទី​ព្រឹក ថ្ងៃទី​១៤ ខែសីហា ឆ្នាំ​២០១៦។​

    នៅពេល​ដេញតាម​ផ្លូវជាតិ​លេខ​៤ រហូត​ទៅដល់​ត្រង់ចំណុច ជិត​សាលាសង្កាត់​ចោមចៅ ច្រកចូល​សាលារៀន​សុវណ្ណ​ភូមិ ស្ថិត​ក្នុងភូមិ​ថ្នល់បំបែក សង្កាត់​ចោមចៅ​ខណ្ឌ​ពោធិ៍​សែន​ជ័យ ទើប​ចាប់បាន​។​

    ក្រោយពេល​ចាប់ខ្លួន​ជនសង្ស័យ​ខាងលើ ពួកគេ​ក៏បាន​នាំទៅ​កាន់​ប៉ុស្ដិ៍​ចោមចៅ​​ធ្វើការ​សាកសួរ ទើប​ដឹងថា ជន​នោះបាន​លេងល្បែង ចាញ់​អស់​លុយ​ពី​ខ្លួន ហើយ​បាន​ចូលទៅ ធ្វើ​សកម្មភាព​លួច​លុយ​នៅ​ទីតាំង​ហ្គេម​បាញ់​ត្រី​មួយកន្លែង បាន​ចំនួន​៣,៥​លាន​រៀល រួម​នឹង​ទូរស័ព្ទដៃ​ម៉ាក​ ​iPhone6  មួយគ្រឿង​ផង រួច​បាន​ព្យាយាម​រត់គេចខ្លួន​។​

    ខណៈនោះ​ត្រូវបាន​ម្ចាស់​ដឹង​ទាន់ ក៏បាន​ស្រែក​ឆោឡោ ហើយ​កម្លាំង​សន្តិសុខ ដែល​យាម​នៅ​ទីតាំង​នោះ បាននាំគ្នា​ដេញតា​ចាប់។ ប៉ុន្តែ​ដោយសារតែ​តាម​មិនទាន់ ទើប​សន្តិសុខ​នោះ​ស្រែកថា​ចោរៗ បង្ក​ឱ្យភ្ញាក់ផ្អើល​តាមផ្លូវ​បែបនេះ​តែម្ដង​ទំរាំ​តែ​ចាប់​ជន​នោះបាន​។​

    ប៉ូលិស​និយាយថា ជនសង្ស័យ​ឈ្មោះ អ៊ឹ​ង ម៉ា​ណែ​ត ភេទ​ប្រុស អាយុ​៣៣​ឆ្នាំ មុខរបរ​ជា​សន្តិសុខ​ដែរ មាន​ស្រុកកំណើត​នៅក្នុង​ភូមិ​ព្រែក​តា​កូវ ឃុំ​ព្រែ​កតា​កូវ ស្រុក​ខ្សាច់កណ្តាល ខេត្តកណ្តាល និង​ស្នាក់នៅ​សង្កាត់​ផ្សារ​ដើម​គរ ខណ្ឌទួលគោក​។​

    ដោយឡែក​តំណាង​សន្ដិសុខ​ដែល​បាន​ដេញតាម​ចាប់ ជនសង្ស័យ​ឈ្មោះ អ៊ូ ផល្លា អាយុ​៥៨​ឆ្នាំ ដែល​គាត់​គឺជា​ប្រធាន​សន្តិសុខ និង​បាន​នាំ​កូនចៅ​៥​ទៅ​៦​នាក់​ទៀត ដេញតាម​ចាប់ ជនសង្ស័យ​ខាងលើ​នោះ ក្នុងភូមិ​ទួលគោក សង្កាត់​ទួល​សង្កែ ខណ្ឌឫស្សីកែវ រហូតដល់​ត្រង់ចំណុច​ខាងលើ​ទើប​ចាប់បាន។​

    ប្រភពព័ត៌មាន​បានឱ្យ​ដឹងថា ជនសង្ស័យ​បាន​ចាញ់​អស់​លុយ​សល់​តែ​គូទ​ខោ បន្ទាប់មក​បាន​ចូលទៅ​កាន់​ទីតាំង​ហ្គេម​បាញ់​ត្រី​មួយកន្លែង នោះ ហើយ​ឆ្លៀត​ឱកាសល្អ​ក៏បាន​ធ្វើ​សកម្មភាព​លួច​យកលុយ​ចំនួន​៣​លាន​៥​សែន​រៀល និង​ទូរស័ព្ទ​ម៉ាក​អាយ​ហ្វូ​ន​ស៊ី​ក​១​គ្រឿង​។ ​បន្ទាប់មក​បាន​ជិះ​ម៉ូតូ ១​គ្រឿង​រត់គេចខ្លួន​ប៉ុន្តែ​ត្រូវបាន​ម្ចាស់​ឃើញ​ទាន់ និង​បាន​ស្រែក​ឱ្យកម្លាំង​សន្តិសុខ ដែល​យាម​នៅ​ទីនោះ ជួយ​ដេញតាម​ចាប់ខ្លួន​តែម្តង។​

    ប៉ុន្តែ​ជន​នោះបាន​ជិះ​ម៉ូតូ​រត់​តាំងពី​កន្លែងកើតហេតុ រហូតដល់​ត្រង់ចំណុច ក្នុងភូមិ​សាស្ត្រ ខណ្ឌ​ពោធិ៍​សែន​ជ័យ ទើប​ចាប់បាន​និង​បាន​នាំទៅ​កាន់ ប៉ុស្ដិ៍​ចោមចៅ សាកសួរ​មួយ​ជំហាន រួច​ទើប​បញ្ជូនបន្ត​ទៅកាន់ ប៉ុស្ដិ៍​ទួល​សង្កែ ខណ្ឌឫស្សីកែវ ដើម្បី​សាកសួរ​បន្ត​និង​កសាង​សំណុំរឿង​បញ្ជូនទៅ តុលាការ​ចាត់ការ​តាមច្បាប់​៕

adverise with khmeread

មតិយោបល់