adverise with khmeread 1

បារ Pyongyang Cafe តំណាង​កូរ៉េខាងជើង​សម្ងំ​លាក់ខ្លួន​យ៉ាង​ស្ងាត់ស្ងៀម​នៅ​ឆ្នេរ​ប្រទេស​អេ​ស្ប៉ា​ញ​

    ​ការចូល​ក្នុងប្រទេស​កូរ៉េខាងជើង​មិនមែនជា​រឿង​ងាយស្រួល ឬ សុវត្ថិភាព​បំផុត​សម្រាប់​ជនបរទេស​នោះទេ ប៉ុន្តែ​ភ្ញៀវទេសចរ​ដែល​ចង់ដឹង​ចង់​ស្គាល់​វប្បធម៌​កូរ៉េខាងជើង​មួយផ្នែក​តូច​អាច​ទៅ​ក្រេប​យក​បទពិសោធន៍​បាន​នៅ​ទីក្រុង​មាត់សមុទ្រ​មេ​ឌី​ទែ​រ៉ា​ណេ Tarrangona ជា​កន្លែង​ដែល​បារ​តូច​មួយ​ដែល​បង្កើតឡើង​ដើម្បី​ផ្សព្វផ្សាយ​របប​ផ្តាច់ការ​របស់​គីម ជុង​អ៊ុន ទើបតែ​បើក​នាពេល​ថ្មីៗ​នេះ​ទេ​។ នេះ​បើតាម​វេ​ប​សាយ Odditycentral ចេញផ្សាយ​កាលពី​ថ្ងៃទី ៩ សីហា​។ 

​    ​លោក Alejandro Cao de Benos ម្ចាស់​បារ Pyongyang Cafe គឺជា​ពលរដ្ឋ​លោកខាងលិច​តែ​ម្នាក់​គត់ ដែល​កាន់កាប់​មុខតំណែង​មួយ​នៅក្នុង​របប​ដឹកនាំ​កូរ៉េខាងជើង បើទោះបី​វា​ជា​មុខតំណែង​កិត្តិយស​ក៏ដោយ​។ ជា​អ្នក​ជឿជាក់​លើ​របប​កុម្មុយនីស្ត លោក​បាន​ចាប់អារម្មណ៍​ខ្លាំង​លើ​កូរ៉េខាងជើង បន្ទាប់ពី​ការដួលរលំ​របប​សហ​ភាព​សូ​វៀត ដែល​ជួន​គ្នា​នឹង​ការជួប​ជាមួយ​គ្រួសារ​កូរ៉េខាងជើង​មួយចំនួន​ក្នុង​ទីក្រុង​ម៉ា​ឌ្រី​ត​។ លោក​បានចាប់ផ្តើម​ធ្វើដំណើ​រ​ទៅ​ប្រទេស​អាស៊ី​ឯកោ​មួយ​នេះ បាន​ជួប​ជាមួយ​សព​លោក​គីម ជុងអ៊ីល និង ក្នុង​ឆ្នាំ ២០០២ លោក​ត្រូវបានតែងតាំង​ជា​គណៈប្រតិភូ​ពិសេស​សម្រាប់​ទំនាក់ទំនង​វប្បធម៌​អន្តរជាតិ​ដោយ​រដ្ឋាភិបាល​ក្រុង​ព្យុងយ៉ាង​។ តំណែង​នេះ​មិន​ផ្លូវការ​ទេ ប៉ុន្តែ​លោក​ចាត់ទុក​តំណែង​នេះ​ជា​បេសកកម្ម​ដ៏​សំខាន់​សម្រាប់​គាត់​។ លោក Cao de Benos ឬ​ហៅថា “Cho Sun-il” (​មានន័យថា​លេខ ១ ជា​ភាសា​កូរ៉េ​) បាន​បន្ត​រហូតដល់​បង្កើត​បាន​សមាគម​មិត្តភាព​កូរ៉េ ដែល​បច្ចុប្បន្ន​មាន​គណៈប្រតិភូ​ក្នុងប្រទេស​ដល់​ទៅ ៣០ ជុំវិញ​ពិភពលោក​។ 

​    ​ក្នុងនាម​ជាម​នុស្ស​ដែល​បង្ហាញ​មុខជា​ទៀងទាត់​ក្នុង​បណ្តាញ​ផ្សព្វផ្សាយ​អេ​ស្ប៉ា​ញ​ដើម្បី​ការពារ​កូរ៉េខាងជើង​ប្រឆាំងនឹង​អ្វី ដែល​លោក​ហៅថា ការឃោសនា និង​ឧបាយកល​របស់លោក​ខាងលិច លោក Cho Sun-il បានសម្រេច​ចិត្ត​បើកហាង  Pyongyang Cafe សម្រាប់​ជា​វិធី​មួយ​ដើម្បី​ផ្តល់ជូន​ប្រជាជន​នូវ​បទពិសោធន៍​អំពី​កូរ៉េខាងជើង​ពិតៗ​។ លោក​និយាយថា "​យើង​ចង់​បំបាត់​ឱ្យអស់​នូវ​ពាក្យ​មិន​ពិត និង​ឧបាយកល​នានា​របស់លោក​ខាងលិច​។ ហើយ​ខណៈដែល​មិនសូវមាន​មនុស្ស​ទៅលេង​កូរ៉េខាងជើង ព្រោះ​វា​មាន​សភាព​ស្មុ​គ្រ​ស្មាញ និង​ឆ្ងាយ ពួកគេ​អាចមក​ហាង​យើង​បាន​"​។​

​      បារ​នេះ​ត្រូវបាន​លាប​ពណ៌​ជា​ទង់ជាតិ​កូរ៉េខាងជើង រីឯ​ជញ្ជាំង​ត្រូវបាន​ព្យួរ​ជាមួយ​កាត​ប៉ូ​ស្ទើ​ឃោសនា​ដែល​យកមក​ពី​ក្រុង​ព្យុងយ៉ាង​ទាំងអស់ ហើយ​ថែមទាំង​មាន​ធ្នើរ​ដាក់​ស្នាដៃ​និពន្ធ​ដោយ​មេដឹកនាំ​រជ្ជកាល​ត្រកូល​គីម ដែល​បាន​គ្រប់គ្រង​កូរ៉េខាងជើង​ជាមួយ​កណ្តាប់ដៃ​ដែក​តាំងពី​ឆ្នាំ ១៩៤៨​។ 

​    ​ហាង Pyongyang Cafe មាន​ភ្ញៀវ​ជា​មធ្យម​ប្រហែល ៣៥ នាក់ ប៉ុន្តែ​លោក Cho Sun-il រំពឹងថា​ចំនួន​ភ្ញៀវ​នឹង​កើនឡើង​ច្រើន​នៅពេល​ពួកគេ​ស្គាល់​ហាង​នេះ​កាន់តែច្រើន​។ លោក​មាន​ផែនការ​ធំៗ​ច្រើនណាស់​សម្រាប់​ការបើក​បារ​មួយ​នេះ ដោយ​សង្ឃឹមថា​ទីបំផុត​នឹង​អាច​ប្រែក្លាយ​វា​ទៅ​ជាម​ជ្ឈ​ម​ណ្ឌ​វប្បធម៌ ដែលមាន​ការជជែក​គ្នា​អំពី​ភោ​ជនី​សិល្បៈ និង​ប្រពៃណី ការ​បញ្ចាំងភាពយន្ត ឬ ការធ្វើ​បទ​ប​ឋ​កថា​៕ 

 

adverise with khmeread
ប្រភព៖ Odditycentral

អ្នកនឹងចូលចិត្ត

មតិយោបល់