adverise with khmeread 0

​អ្នក​ប្រដាល់​អៀរ​ឡង់​លើក​ម្រាមដៃ​កណ្តាល​ដាក់​ពូ​ទីន​លើ​បណ្តាញ​សង្គម ក្រោយ​ចាញ់​អ្នក​ប្រដាល់​រុស្ស៊ី​ទាំង​អយុត្តិធម៌​នៅ​រី​យ៉ូ​

​    ​អ្នក​ប្រដាល់​ដំណាងឱ្យ​ប្រទេស​អៀរ​ឡង់ Michael Conlan បាន​រិះគន់​ចៅក្រម​ដាក់ពិន្ទុ​យ៉ាង​ចាស់ដៃ ខណៈដែល​គាត់​បាន​បន្ទោស​បរាជ័យ​ការប្រកួត​ជា​លើក​ទី​ពីរ​របស់គាត់​ក្នុង​វិញ្ញាសា​ប្រដាល់​ក្នុង​ប្រភេទ​ទម្ងន់ Bantamweight (៥១-៥៤ គីឡូក្រាម​) ដែល​គាត់​មើល​ទៅជា​អ្នកឈ្នះ​ដាច់​គូប្រកួត​ទៅហើយនោះ​។​

​     Michael Conlan បាន​និយាយថា "​ពួកនេះ​បន្លំ​លទ្ធផល ចុ​****** ហើយ​" ជា​ពាក្យសម្តី​ដែល​គាត់​ជះ​កំហឹង​ភ្លាមៗ​ខណៈ​កំពុងមាន​ការផ្សាយ​បន្ត​ផ្ទាល់​ពេញ​ពិភពលោក​។ គាត់​បន្តថា "​អ្នក​ប្រដាល់​ស្ទើរភ្លើង​នេះ (​រុស្ស៊ី​) ស្អុយរលួយ​តាំងពី​ក្បាល​ដល់​ចុងជើង​"​។​

​    ​នេះ​គឺជា​ការប្រកួត​បរាជ័យ​មួយ​សម្រាប់​អ្នក​ប្រដាល់​អៀរ​ឡង់ ដែល​សូម្បីតែ​អ្នក​ប្រដាល់​នារី​ឆ្នើម​របស់​ពួកគេ Katie Taylor ក៏បាន​បរាជ័យ​ក្នុងការ​ការពារ​ជើងឯក​អូឡាំពិក​ដែរ ខណៈដែល​នាង​ធ្លាប់​ឈ្នះ​វា​នៅ​កីឡា​អូឡាំពិក​ទីក្រុង​ឡុង​ដ៍​នោះ​។​

​    ​Conlan ដែល​ត្រូវបាន​គេ​កាត់សេចក្តី​ឱ្យ​ចាញ់​ពីរ​ទឹក​លើ​ក្រដាស​ដាក់ពិន្ទុ​សរុប​ចំនួន ៣ បាន​និយាយថា "​ក្តី​ស្រមៃ​របស់ខ្ញុំ​ត្រូវ​រលាយ​។ ខ្ញុំ​នឹងមិន​ប្រដាល់​ម្តងទៀត​សម្រាប់ AIBA (​សមាគម​កីឡាប្រដាល់​អន្តរជាតិ​) ឡើយ​"​។​

​    ​គាត់​ក៏បាន​ចោទប្រកាន់ថា​មន្ត្រី​កាន់កាប់​ការប្រកួត​ថា​បាន​កេង​បន្លំ​លទ្ធផល​របស់ Taylor និង Joe Ward ផងដែរ ខណៈដែល​ពួកគេ​គឺជា​មិត្ត​រួម​សញ្ជាតិ​ដែល​រំពឹងថា​ធ្វើ​បានល្អ​នៅក្នុង​រី​យ៉ូ​ដែរនោះ​។​

​    ​លើសពីនេះ Conlan បាន​ផ្ញើ​សារ​នៅលើ​បណ្តាញ​សង្គម Twitter ក្នុង​ក្តី​សង្ឃឹមថា​ប្រធានាធិបតី​រុស្ស៊ី Vladimir Putin នឹង​បានឃើញ ដោយ​គាត់​សរសេរថា "​ហ្អេ Vlad តើ​ពួកគេ​ទារលុយ​លោក​ឯង​ប៉ុន្មាន ឆ្លើយ​មក​លោ​កបង​??"៕

adverise with khmeread
ប្រភព៖ ដេលីមែល

មតិយោបល់