adverise with khmeread '1

អគ្គនាយកដ្ឋាន​កីឡា​កោះហៅ​មន្ត្រីខេត្ត​ក្រុង​ទាំងអស់ និង​សហព័ន្ធ​ជំនាញ​សម្រាប់​ព្រឹត្តិការណ៍​កីឡា​ជាតិ ២០១៦

​    ​ភ្នំពេញ​៖ អគ្គនាយកដ្ឋាន​កីឡា​នៃ​ក្រសួង​អប់រំ យុវជន និង​កីឡា បាន​កោះហៅ​មន្ត្រីខេត្ត​-​ក្រុង​ទាំង ២៥ និង​សហព័ន្ធ​កីឡា​ជាតិ​នានា​ចំនួន ១៤ និង​ក្រសួង​ចំនួន ២ មក​ស្វែងយល់​ពី​របៀប​ចុះឈ្មោះ​ចូលរួម​ប្រកួត​កីឡា​ជាតិ​លើក​ទី ១ តាម​ប្រព័ន្ធ Online នៅ​ព្រឹក​ថ្ងៃ​ព្រហស្បតិ៍​នេះ​។​

​    ​លោក អ៊ុក សិទ្ធិ​ជាតិ អគ្គនាយក​កីឡា​បានឱ្យដឹងថា ក្នុង​សម័យកាល​រីកចម្រើន ការចុះឈ្មោះ ចូលរួម​ប្រកួត​គេ​លែង​ធ្វើ​តាមរបៀប​ជិះឡាន​ពី​ខេត្ត​មក​ដាក់ពាក្យ​នៅ​គណៈកម្មការ​ទទួល​ពាក្យ​នៅ​ភ្នំពេញ​ហើយ ព្រោះ​វា​អស់​សោហ៊ុយ​ច្រើន​និង​ខាត​ពេលវេលា គឺ​គេ​ធ្វើតាម​ប្រព័ន្ធ​សារ​អេឡិចត្រូនិក​តែម្ដង​ដើម្បី​ភាពងាយស្រួល និង​ចំណេញ​ពេលវេលា​។​

​    ​គណៈកម្មការ​រៀបចំ​កា​រ​ប្រកួត​កីឡា​ជាតិ គឺជា​ការសហការ​គ្នារ​វាង​ក្រសួង​អប់រំ​យុវជន និង​កីឡា និង​គណៈកម្មាធិការ​ជាតិ​អូឡាំពិក​កម្ពុជា សហព័ន្ធ​ជាតិ​ទាំង ១៤ ដែលមាន​ឈ្មោះ​ក្នុង​ការប្រកួត​។ សហព័ន្ធ​ជាតិ​ទាំង ១៤ ក៏​ជា​អ្នកទទួលខុសត្រូវ​រៀបចំ​បទបញ្ជា​រួម និង​បទបញ្ជា​បច្ចេកទេស​ដែរ​។​

​    ​ពេលនេះ​ក្រុម​ដែល​ចុះឈ្មោះ​ចូលរួម​ប្រកួត​មាន​បាល់ទាត់​បុរស ២៤ ក្រុម និង​នារី ១០ ក្រុម​។ ផ្នែក​បាល់ទះ​បុរស ១៩ ក្រុម នារី ១១ ក្រុម បាល់ទះ​ឆ្នេរ​ខ្សាច់ ៧ ក្រុម​។ ផ្នែក​បាល់បោះ​បុរស ១៤ ក្រុម នារី ៨ ក្រុម​។ អត្តពលកម្ម​បុរស​មាន ២៤ ក្រុម នារី ២៣ ក្រុម ។ ប្រភេទ​កីឡា​ប៉េតង​បុរស​មាន ១០ ក្រុម នារី​មាន ៩ ក្រុម​។ ប្រភេទ​កីឡា​វាយ​សី​បុរស​មាន ១២ ក្រុម នារី​មាន ៨ ក្រុម​។​

​    ​ចំណែក​ប្រភេទ​កីឡា​វាយ​កូន​បាល់​បុរស​មាន ៧ ក្រុម​នារី​មាន ៥ ក្រុម​។ កីឡាវាយកូនឃ្លីលើតុ​បុរស​មាន ៧ ក្រុម​នារី​មាន ៤ ក្រុម​។ កីឡា​ចំបាប់​បុរស​មាន ៥ ក្រុម នារី​មាន ៤ ក្រុម​។ តេ​ក្វាន់​ដូ W.T.F បុរស​មាន ៧ ក្រុម នារី​មាន ៧ ក្រុម ។ ហែល​ទឹក​បុរស​មាន ៤ ក្រុម នារី​មាន ៤ ក្រុម​។ ប្រភេទ​កីឡា​ល្បុក្កតោ​បុរស​មាន ៤ ក្រុម នារី​មាន ៤ ក្រុម កាយសម្ព័ន្ធ​បុរស​មាន ៤ ក្រុម នារី ៤ ក្រុម​។ 

​    ​រីឯ​ប្រដាល់​ក្បាច់គុន​បូរាណ​ខ្មែរ​បុរស​មាន ១៧ ក្រុម​នារី​មាន ៧ ក្រុម និង​ប្រដាល់​សាកល​បុរស​មាន ១៦ ក្រុម នារី​មាន ៥ ក្រុម សរុប​ទាំងអស់​មាន ២៩៥ ក្រុម​ដែល​បាន​ចុះឈ្មោះ​ចូលរួម​ប្រកួត​រួចហើយ​៕​

adverise with khmeread

មតិយោបល់