adverise with khmeread 3

ក្រុម​ជម្រើសជាតិ​កីឡា​ទ្រី​យ៉ា​ត្លុង​បន្ត​ការហ្វឹកហាត់​នៅ​ខេត្ត​កែប​

​    ​កែប​៖ ក្រុម​កីឡាករ កីឡាការិនី​ទ្រី​យ៉ា​ត្លុង​ជម្រើសជាតិ​កម្ពុជា​បាន​បន្ត​បេសកកម្ម​ហ្វឹកហាត់​របស់ខ្លួន​នៅ​ខេត្ត​កែប​បន្តទៀត បន្ទាប់ពី​បានបញ្ចប់​ការហ្វឹកហាត់ នៅ​រាជធានី​ភ្នំពេញ​អស់​រយៈពេល ៣ ខែ​កន្លង​ទៅនោះ​។​

​    ​លោក ងិន សុខ​បញ្ញា អគ្គលេខាធិការ​សហព័ន្ធ​កីឡា​ទ្រី​យ៉ា​ត្លុង​កម្ពុជា​បានឱ្យដឹងថា ក្រោយ​ធ្វើការ​ប្រមូលផ្ដុំ​ហ្វឹកហាត់​ក្រុម​ជម្រើសជាតិ​នៅ រាជធានី​ភ្នំពេញ​អស់​រយៈពេល ៣ ខែ​កន្លងមក​នោះ សហព័ន្ធ​បានរៀបចំ​ការប្រកួត​ធ្វើតេស្ត​សមត្ថភាព​អត្ត​ព​លិ​ក​របស់ខ្លួន​រយៈពេល ៣ ថ្ងៃ​នៅ​ទី​រួម​ខេត្ត​កែប​។​

​    ​លោក​បន្តថា ការប្រកួត​ធ្វើតេស្ត​នេះ សហព័ន្ធ​កីឡា​ទ្រី​យ៉ា​ត្លុង​កម្ពុជា​បានដាក់​ឈ្មោះថា Triathlon Training Camp 2016 ក្នុងទិសដៅ​បន្ត​ពង្រឹងសមត្ថភាព​ពួកគេ​បន្ថែមទៀត​ដោយ​យក​ក្រុម​ជម្រើសជាតិ​របស់ខ្លួន​ទាំង ១៣ នាក់មក​ប្រជែង​គ្នា​ដណ្ដើមយក​ចំណាត់ថ្នាក់​លេខ ១ លេខ ២ និង​លេខ ៣​។  បន្ទាប់ពី​បាន​ឆ្លងកាត់​ការហ្វឹកហាត់ និង​ប្រមូលផ្ដុំ​តាម​គោលការណ៍​របស់​ក្រសួង​អប់រំ​យុវជន និង កីឡា អស់ ៣ ខែ​រួចមក​។

​    ​អគ្គលេខាធិការ​រូបនេះ​បានឱ្យដឹង​បន្ថែមថា ការប្រមូលផ្តុំ​ហ្វឹកហាត់ និង​ប្រកួត​ធ្វើតេស្ត​នេះ គឺ​ធ្វើ​ក្នុងទិសដៅ​ធំៗ​ចំនួន ២ គឺ​ដើម្បី​ត្រៀម​ប្រកួត​កីឡា​ជាតិ National Game លើក​ទី ១ ឆ្នាំ ២០១៦ និង​ត្រៀមខ្លួន​សម្រាប់​ព្រឹត្តិការណ៍ Sea Games 2017 នៅ​ម៉ាឡេស៊ី​ផងដែរ​។​

​    ​សូមបញ្ជាក់ថា ការប្រកួត​ធ្វើតេស្ត​នេះ គឺ​ធ្វើ​លើ​វិញ្ញាសា​សម្រាប់​បុរស ហែល​ទឹក ១៥០០ ម៉ែត្រ បូក​ជិះ​កង់ ៤០ គីឡូម៉ែត្រ និង​បន្ត​រត់​ចម្ងាយ ១០ គីឡូម៉ែត្រ​។ ចំណែក​ផ្នែក​នារី កីឡាការិនី​ត្រូវ ហែល​ទឹក ៧៥០ ម៉ែត្រ បូក​ជិះ​កង់ ២០ គីឡូម៉ែត្រ និង​បន្ត​រត់​ចម្ងាយ ៥ គីឡូម៉ែត្រ​។ ក្នុងចំណោម​អត្ត​ព​លិ​ក​ជម្រើសជាតិ​ទាំង ១៣ នាក់​នោះ​មាន​ស្រី ​៦ នាក់​៕​

adverise with khmeread

មតិយោបល់