adverise with khmeread 14063780 1067104403376920 9027323041072565182 n

កីឡាការិនីកម្ពុជា ស៊ន សៀវម៉ី បង្ហូរទឹកភ្នែកសុំទោសបន្ទាប់ពីចាញ់ការប្រកួត

    ប្រេស៊ីល​ ៖​ កីឡាការិនីកម្ពុជា ស៊ន សៀវម៉ី បន្ទាប់ពីប្រកួតចាញ់កីឡាការិនីហូឡង់ បានបង្ហូរទឹកភ្នែកសម្តែងការសោកស្តាយ និងបានសុំទោសដល់ប្រជាពលរដ្ឋខ្មែរទាំងអស់ ចំពោះការបរាជ័យរបស់នាង​។ 

    អត្តពលិកវ័យទើប២០ឆ្នាំ កម្ពស់ ១,៨៣ម៉ែត្រ សៀវម៉ី ក៏សូមថ្លែងអំណរអរគុណដល់ប្រជាជនខ្មែរទាំងអស់ដែលលើកទឹកចិត្តនាងរហូតមក។ នេះបើយោងតាម Facebook Page ផ្លូវការរបស់គណៈកម្មាធិការជាតិកម្ពុជា (NOCC)។

    កីឡាការិនី ស៊ន សៀវម៉ី ជាអត្តពលិក ដែលកម្ពុជារំពឹងឈ្នះមេដាយកីឡាអូឡាំពិក ឆ្នាំ ២០១៦នេះ ព្រោះកញ្ញាបានឈ្នះមេដាយមាស១គ្រឿងក្នុងវគ្គជម្រុះនៅទីក្រុងម៉ានីល ប្រទេស ហ្វីលីពីន កាលពីខែមេសា ឆ្នាំ២០១៦ តែមកចាញ់គូប្រជែងរបស់ហូឡង់ Reshimie Oogink វ័យ ២៧ឆ្នាំកម្ពស់ ១,៧៩ម៉ែត្រ ដោយលទ្ធផលបច្ចេកទេស ១-៧ ក្នុងវគ្គ១៦នាក់ កីឡាតេក្វាន់ដូ ផ្នែកនារីទម្ងន់លើស ៦៧គីឡូក្រាម។ 

    ការប្រកួតនៅទឹកទី១ លទ្ធផល ០-១ ទឹកទី២ លទ្ធផល ០-២ និងទឹកទី៣ លទ្ធផល ១-៧ សរុបលទ្ធផលទាំង៣ គឺ ស៊ន សៀវម៉ី ១និងកីឡាការិនីហូឡង់ Reshimie Oogink ៧។​​ នេះជា១ប្រកួតដំបូងរបស់ម្ចាស់មេដាយមាស ប្រចាំទ្វីបអាស៊ី សៀវម៉ី ក្នុងវគ្គជម្រុះ១៦នាក់ ប្រភេទទម្ងន់លើស ៦៧គីឡូក្រាម (+67kg)។

    លោក វ៉ាត់ ចំរើន នាយកបេសកកម្ម Rio Olympic Games 2016 បានថ្លែងពីប្រទេសប្រេស៊ីលមកថា ប្រសិនបើហូឡង់នេះឡើងទៅដល់វគ្គផ្តាច់ព្រ័ត្រ នោះសៀវម៉ី ត្រូវប្រកួតដណ្តើមមេដាយសំរឹទ្ធ តែបើហូឡង់ ចាញ់នរណាម្នាក់ក្នុងវគ្គណាមួយនោះ កីឡាការិនិកម្ពុជាស៊ន សៀវម៉ី នឹងចប់ហើយ​។ 

    គួររំលឹថា​ សម្រាប់កម្ពុជា ដែលលេងលើ៦ប្រភេទវិញ្ញាសានោះ គឺបានប្រកួតអស់៤វិញ្ញាសាហើយៗនៅសល់តែ២វិញ្ញាសាទៀត ប៉ុណ្ណោះ គឺតេក្វាន់ដូ ប្រកួតដោយកីឡាការិនី ស៊ន សៀវម៉ី និងរត់ម៉ារ៉ាតុងបុរស ប្រកួតដោយកីឡាករ នី​ កូ នាថ្ងៃទី២០ និង២១សីហា។ 

    លោកបន្តថា​  ចំពោះ ស៊ន សៀវម៉ី បានបន្តការហ្វឹកហាត់នៅរីយ៉ូ ចាប់តាំងទៅដល់ភ្លាម កាលពី ចុងខែមុខដើម្បីរក្សានូវថាមពលកម្លាំងឲ្យនៅរឹងមាំដដែល ក៏ដូចជាផ្សាំទៅនឹងអាកាសធាតុនៅទីនោះផងដែរ។ 

    ស៊ន សៀវម៉ី បានត្រៀខ្លួនរួចរាល់ សម្រាប់ការប្រកួតនៅវគ្គជម្រុះដំបូងជាមួយកីឡាការិនី Reshimie Oogink។ វគ្គជម្រុះបឋមនេះមានកីឡាការិនីសរុបចំនួន១៦រូប ហើយកីឡាការិនី ដែលឈ្នះៗនឹងបន្តការប្រកួតជាមួយនឹង កីឡាការិនីដែលឈ្នះៗដូចគ្នា នៅជុំទី២រហូត ដល់ជុំផ្តាច់ព្រ័ត្រ ពោលគឺកីឡាការិនីណាដែលឈ្នះ៤ប្រកួត នឹង ត្រូវឈានដល់វគ្គផ្តាច់ព្រ័ត្រ ដណ្តើមមេដាយមាស។

    គូប្រកួតរបស់ ស៊ន សៀវ​ម៉ី គឺកីឡាការិនី Reshimie Oogink មាន​អាយុ​២៦​ឆ្នាំ ​​កម្ពស់​ ១,៧៩ ​ម៉ែត្រ ជា​ជើង​ខ្លាំង​មក​ពី​ហុល្លង់ ហើយជាម្ចាស់ជើង​ឯក​តេក្វាន់ដូ​អឺរ៉ុប​ឆ្នាំ​២០០៥ ​ ហើយ​មាន​បទ​ពិសោធន៍​ជាច្រើន ក្នុង ព្រឹត្តិការណ៍អន្តរជាតិ ដូចជា​ធ្លាប់​ឈ្នះ​មេដាយ​មាស៦​ដង​ រួម​មាន Dutch Open 2006, German Open 2006 , French Open 2008 , British Open 2009 , German Open 2012 ​និង Dutch Open 2012 ដោយធ្លាប់​ប្រកួត​បាន​១២០​ប្រកួត ​ឈ្នះ​បាន​៧៧​ប្រកួត។ 

    ចំពោះចំណាត់ថ្នាក់ក្នុងអូឡាំពិកហ្គេម, Reshmie Oogink ​មាន​ចំណាត់​ថ្នាក់​លេខ​៥ ​រីឯ ស៊ន សៀវ​ម៉ី ​​​ចំណាត់​ថ្នាក់​លេខ៣៣ក្នុងចំណាត់ថ្នាក់អូឡាំពិក​។ ស៊ន សៀវម៉ី ក្នុងតំបន់អាស៊ី ជាង ៤០ប្រទេសនោះ មានតែគូប្រកួតពី៣ទៅ៤នាក់ប៉ុណ្ណោះជាឧបសគ្គរបស់នាង។
 ​
    ស៊ន សៀវម៉ី ជាកីឡាការិនី តែមួយរូបគត់របស់កម្ពុជា ដែលបានឆ្លងកាត់ការប្រកួតជម្រុះទ្វីបអាស៊ី នៃព្រឹត្តិការណ៍កីឡាអូឡាំពិក ២០១៦នេះ ហើយ សៀវម៉ី ក៏ជាម្ចាស់មេដាយមាសទ្វីបអាស៊ី កាលពីពេលកន្លងទៅដែរ៕

រូបភាពទាំងស្រុង៖ National Olympic Committee Of Cambodia

adverise with khmeread

មតិយោបល់