adverise with khmeread 1

ញាក់សាច់​! ប្រធានាធិបតី​ហ្វីលីពីន​ព្រមាន​ចាកចេញ​ពី UN និង​បបួល​ចិន​បង្កើត​អង្គការ​ថ្មី​

    ​ប្រធានាធិបតី​ហ្វីលីពីន លោក Rodrigo Duterte បាន​ស្រែក​ខ្លាំងៗ​ដាក់​អង្គការសហប្រជាជាតិ (UN) កាលពី​ថ្ងៃអាទិត្យ បន្ទាប់ពី​អង្គការ​នេះ​អំពាវនាវ​ឱ្យ​បញ្ចប់​រលក​នៃ​ការសម្លាប់ កើតចេញពី​សង្គ្រាម​ប្រឆាំង​គ្រឿងញៀន​របស់លោក ដោយ​និយាយថា លោក​អាច​នឹង​ចាក​ចេញពី​អង្គការ​នេះ និង​អញ្ជើញ​ចិន និង​ប្រទេស​ផ្សេងទៀត​បង្កើត​អង្គការ​ថ្មី​មួយទៀត​។ 

​    ​អ្នកជំនាញ​សិទ្ធិមនុស្ស​របស់ UN ២​នាក់​កាលពី​សប្តាហ៍​មុន​បាន​ជំ​រុញឱ្យ​រដ្ឋាភិបាល​ក្រុង​ម៉ានីល​បញ្ឈប់​ការប្រហារជីវិត​និង​សម្លាប់​ក្រៅ​ប្រព័ន្ធតុលាការ ដែល​បាន​កើនឡើង​តាំងពី​លោក Duterte ឈ្នះឆ្នោត​ជា​ប្រធានាធិបតី​តាមរយៈ​ការសន្យា​លុបបំបាត់​គ្រឿងញៀន​ឱ្យអស់​។ អ្នកជួញដូរ​គ្រឿងញៀន​ប្រហែល ៩០០ នាក់​ត្រូវ​សម្លាប់​តាំងពី​លោក​ឡើងកាន់​អំណាច បន្ទាប់ពី​ឈ្នះ​ការបោះឆ្នោត​ថ្ងៃ ៩ ឧសភា​។ 

​    ​លោក Duterte បាន​បដិសេធ​កាលពី​ថ្ងៃ​សុក្រ​ថា រដ្ឋាភិបាល​លោក​ជា​អ្នកទទួលខុសត្រូវ​ទាំងស្រុង​ចំពោះ​ការស្លាប់​នេះ ហើយ​នៅក្នុង​សន្និសីទកាសែត​ពាក់កណ្តាល​យប់​ក្នុង​ទីក្រុង​កំណើត Davao លោក​បាន​និយាយថា ការស្លាប់​នេះ​មិនមែន​ដោយសារ​ការងារ​របស់​ប៉ូលិស​ទេ ហើយ​បាន​អញ្ជើញ​អ្នកជំនាញ UN មក​ស៊ើបអង្កេត​ដោយ​ខ្លួនឯង​។ លោក​និយាយថា "​ខ្ញុំ​នឹង​សបញ្ជាក់​ប្រាប់​ពិភពលោក​ថា អ្នកឯង​ជា​អ្នកជំនាញ​ឆ្កួត​សុទ្ធសាធ​" ដោយ​លោក​ជំរុញ​ឱ្យ​ពួក​អ្នកជំនាញ​នោះមក​រាប់​មិនមែន​ត្រឹម​ចំនួន​អ្នកស្លាប់​ទាក់ទង​គ្រឿងញៀន​ទេ តែ​ត្រូវ​រាប់ទាំង​ចំនួន​ជីវិត​មនុស្ស​ស្លូតត្រង់​ដែល​ស្លាប់​ដោយសារ​គ្រឿងញៀន​ផង​។ 

​    ​បន្ទាប់មក​លោក​បាន​បើក​ការវាយប្រហារ​លើ UN និង​សមាជិក​របស់ខ្លួន រួមទាំង​សម្ព័ន្ធមិត្ត​ជិតស្និទ្ធ​ប្រចាំត្រកូល​របស់​ហ្វីលីពីន​គឺ អាមេរិក ផងដែរ ដោយ​និយាយថា អង្គការ​នេះ​មិនអាច​បំពេញការងារ​ក្នុង​អាណត្តិ​របស់ខ្លួន​បាន​ផង បែរជា​មក "​បារម្ភ​ឆ្អឹង​ខ្មោច​ឧក្រិដ្ឋជន​គរ​លើ​គ្នា​ទៅវិញ​"​។ លោក​បន្តថា "​ខ្ញុំ​មិន​ចង់​ប្រមាថ​អ្នកឯង​ទេ​។ ប៉ុន្តែ​ប្រហែល​យើង​ត្រូវ​សម្រេចចិត្ត​ផ្តាច់​ចេញពី​អង្គការសហប្រជាជាតិ​ហើយ​។ ហេតុអ្វី​អ្នក​ត្រូវ​ស្តាប់​ពួក​ឆ្កួតៗ​បែបនេះ​?"៕

​ប្រភព​៖ straitstimes

adverise with khmeread

មតិយោបល់