ភរិយារបស់លោកនាយករដ្ឋមន្ត្រីជប៉ុន Shinzo Abe បានធ្វើដំណើរទស្សនៈកិច្ចទៅកាន់កំពង់ផែភៀលហាបឺក្នុងរដ្ឋហាវ៉ៃដ៏គួរឱ្យភ្ញាក់ផ្អើល ដែលទីនោះជាកន្លែងដែលកងទ័ពអាកាសជប៉ុនបានធ្វើការវាយប្រហារមកលើមូលដ្ឋានទ័ពជើងទឹករបស់អាមេរិកក្នុងឆ្នាំ ១៩៤១។
ការមកដល់របស់អ្នកស្រី Akie Abe កាលពីថ្ងៃចន្ទ បានបង្កើតឱ្យមានពាក្យចចាមអារ៉ាមយ៉ាងឆាប់រហ័សថា ប្តីរបស់គាត់ក៏ប្រហែលជានឹងមកតាមក្រោយផងដែរនៅចុងឆ្នាំនេះ ដែលរឿងនេះអាចជាការវិវឌ្ឍជាប្រវត្តិសាស្ត្រមួយដែលអាចពង្រឹងចំណងមិត្តភាពរវាងអាមេរិកនិងជប៉ុន។
ទោះយ៉ាងណា ការអះអាងខាងលើត្រូវបានច្រានចោលដោយនាយខុទ្ទកាល័យជប៉ុនលោក Yoshide Suga ដោយរូបលោកបានអះអាងថា អ្នកស្រី Akie Abe បានចុះចតនៅកំពង់ផែភៀលហាបឺដើម្បីធ្វើទស្សនៈកិច្ចដោយខ្លួនឯង មុននឹងចូលរួមវេទិកាបរិស្ថានស្តីពីសកម្មភាពមនុស្សធម៌តាមសមុទ្រនៅរដ្ឋហាវ៉ៃ។
ជំទាវទីមួយរបស់ជប៉ុនរូបនេះក៏បានបង្ហោះរូបភាពចំនួន ១១ សន្លឹកនៅលើទំព័រ Facebook របស់គាត់កាលពីថ្ងៃចន្ទផងដែរ ដោយបង្ហាញពីការបួងសួង ដាក់កម្រងផ្កានៅកន្លែងរំលឹកវិញ្ញាណក្ខន្ត និងចាប់ដៃអតីតយុទ្ធជនម្នាក់ អំឡុងទស្សនកិច្ចពីរម៉ោងទៅកាន់ស្តូបរំលឹកវិញ្ញាណក្ខន្ត USS Arizona Memorial នៅលើកោះ Oahu ជាកន្លែងដែលទាហានអាមេរិក ១.១៧៧ នាក់ត្រូវស្លាប់ដោយសារជប៉ុនឆ្មក់វាយប្រហារសម័យសង្គ្រាមលោកលើកទីពីរ៕
ប្រភព៖ CNN
