Unnamed %284%29

រថយន្ត​ធំ​បើក​បុក​កៀរ​ម៉ូតូ​របួសធ្ងន់​២​នាក់ នឹង​បន្ត​ទៅបុក​រថយន្ត​មួយគ្រឿង​ថែមទៀត​

    ​បន្ទាយមានជ័យ ៖ មាន​ករណី​គ្រោះថ្នាក់​ចរាចរណ៍​មួយ​បង្កឡើង​ដោយ​រថយន្ត​ធំ បើក​ទៅបុក​កៀរ​ម៉ូតូ​១​គ្រឿង​បណ្តាលឱ្យ​របួសធ្ងន់​២​នាក់ រួច​បើក​គេច​បន្ត​ទៅបុក​នឹង​រថយន្ត​១​គ្រឿង​ទៀត​ដែល​ឈប់​នៅ​ស្ងៀម​។​

​    ​គ្រោះថ្នាក់​នេះ​កើតឡើង​នៅវេលា​ម៉ោង​៤​ល្ងាច ថ្ងៃទី​៣០ ខែសីហា ឆ្នាំ​២០១៦ នៅលើ​ផ្លូវជាតិ​លេខ​៥​ត្រង់ចំណុច​លក់​ក្រឡាន ក្នុងភូមិ​គោក​ទន្លាប់ ឃុំ​បន្ទាយ​នាង ស្រុក​មង្គល​បូរី ខេត្តបន្ទាយមានជ័យ​។​

​    ​លោក​វរៈសេនីយ៍ត្រី រស់ សំបូរ មេបញ្ជាការ​កងរាជអាវុធហត្ថ​ស្រុក​មង្គល​បូរី បានឱ្យដឹងថា មុនពេល​កើតហេតុ​នោះ មាន​រថយន្ត​ម៉ាក​ហី​យ៉ាន់​ដាយ ពណ៌​ស ធុន​ធំ គ្មាន​ស្លាក​លេខ បើក​ដោយ​ឈ្មោះ ហ៊ាន វាសនា ភេទ​ប្រុស អាយុ​២៦​ឆ្នាំ រស់នៅ​ភូមិ​គោក​អំពិល ឃុំ​អូរ​ប្រាសាទ ស្រុក​មង្គល​បូរី បើក​ពី​ត្បូង​ទៅ​ជើង​។​

​    ​លុះ​បើក​មកដល់​ចំណុចកើតហេតុ បាន​រេ​ចង្កូត​ទៅបុក​កៀរ ម៉ូតូ​ម៉ាក​ហុងដា ធុន​សេ​100​ពណ៌ ក្រហម ពាក់​ស្លាក​លេខ ក 0363 បន្ទាយមានជ័យ​1 បើកបរ​ដោយ​ឈ្មោះ ដួង សង្ហា ភេទ​ប្រុស អាយុ​៤៧​ឆ្នាំ រស់នៅ​ភូមិ​គោក​ស្រុក ឃុំ​ស្រះ​រាំង ស្រុក​មង្គល​បូរី ឌុប​ប្រពន្ធ​ឈ្មោះ លីវ ស៊ុំ អាយុ​៤៦​ឆ្នាំ បើក​ពី​ត្បូង​ទៅ​ជើង​ស្រប​ទិស​គ្នា បណ្ដាលឱ្យ​ម៉ូតូ​ដួល​បោក​ទៅលើ​ថ្នល់ជាតិ​ធ្វើឱ្យ​ពីរ​នាក់​ប្ដី​ប្រពន្ធ​រងរបួស​ធ្ងន់​។​

​    ​បន្ទាប់មក​រថយន្ត​បង្ក​នោះបាន​បើក​រត់​រហូត ទៅដល់​រង្វង់​មូល​យាយជី​ច្រូតស្រូវ​ក៏បាន​បន្ត​ទៅបុក​រថយន្ត​១​គ្រឿង​ទៀត​ម៉ាក​តូ​យូ​តា តា​កូ​ម៉ា​ធុន​តូច​ពណ៌​ទឹកប្រាក់ ពាក់​ស្លាក​លេខ​ភ្នំពេញ​2AD-8470 ម្ចាស់​ឈ្មោះ ង្វៀន វ៉ឹ​ក​ង៉ឹ​ន ភេទ​ប្រុស អាយុ​៣៣​ឆ្នាំ ជនជាតិ​វៀតណាម ស្នាក់នៅ សង្កាត់​ដេប៉ូ​១ ខណ្ឌទួលគោក រាជធានី​ភ្នំពេញ ជា​បុគ្គលិក​ក្រុមហ៊ុន​មិត្ត​ហ្វូ​ន​ដែល​ឈប់​នៅ​ស្ងៀម​។​

​    ​លោក​វរ​:​សេនីយ៍​ត្រី រស់ សំបូរ បានបញ្ជាក់​ទៀតថា ក្រោយពី​កើតហេតុ​រួច​ជនរងគ្រោះ ត្រូវបាន​រថយន្ត​សង្គ្រោះ​ដឹក​ទៅ មន្ទីរពេទ្យ​មិត្តភាព​កម្ពុជា​-​ជប៉ុន មង្គល​បូរី ដើម្បី​សង្គ្រោះ​ជីវិត ភ្លាមៗ​ផងដែរ​។​

​    ​ចំណែក​ឈ្មោះ ហ៊ាន វាសនា អ្នកបើកបរ​រថយន្ត​បង្ក ត្រូវបាន​ឃាត់ខ្លួន​ហើយ​ទាំង​វត្ថុតាង បាន​យកមក​រក្សាទុក​នៅ​អធិការដ្ឋាន​ប៉ូលិស​ស្រុក​មង្គល​បូរី ដើម្បី​ដោះស្រាយ​តាមផ្លូវ​ច្បាប់​៕

មតិយោបល់