adverise with khmeread Untitled 1

ឃាត់ខ្លួនមនុស្សប្រមាណ ១០ ទាក់ទិនករណីបំផ្ទុះគ្រាប់បែកនៅបឹងកេងកង ៣

    ភ្នំពេញ ៖ ប្រភពព័ត៌មាន​មិន​ផ្លូវការ​បានឱ្យដឹងថា កាលពី​ល្ងាច​ថ្ងៃទី​២០ កញ្ញា​និង​ព្រឹក​ថ្ងៃទី​២១​ កញ្ញា​នេះ​កម្លាំង​ប៉ូលិ​ស​នាយកដ្ឋាន​ព្រហ្មទណ្ឌនៃ​ក្រសួងមហាផ្ទៃ បានធ្វើការ​ឃាត់ខ្លួន​មនុស្ស​ប្រុស​.​ស្រី​មួយក្រុម​សង្ស័យ​ពាក់ព័ន្ធ​ករណី​បំផ្ទុះ​គ្រាប់បែក​នៅតាម​ផ្លូវ​ក្នុង​សង្កាត់​បឹង​កេងកង​៣ ខណ្ឌចំការមនកាលពី​ដើមខែ​កន្លងទៅ។​

    ប្រភព​បន្តថា មនុស្ស​ប្រុស​.​ស្រី​ប្រមាណ​ជិត​ដប់​នាក់ ត្រូវបាន​កម្លាំង​ប៉ូលិស​នាយកដ្ឋាន​ព្រហ្មទណ្ឌ​ក្រសួងមហាផ្ទៃ ឃាត់ខ្លួន​ក្នុង​បុរី​ចំការមនខណ្ឌចំការមន នាំ​ឡើង​រថយន្ត​ចេញទៅ​។​

    លុះដល់​នាយក​ដ្នា​ន​ព្រហ្មទណ្ឌ​រាប់​ឃើញ​ចំនួន​១០​នាក់ សង្ស័យថា ជាប់​ពាក់​ពន្ធ​ក្នុងការ​បំផ្ទុះ​គ្រាប់បែក។ ខណៈពេល​ព័​ត៌​មាន​នេះ​លេចឮ​ភ្លាមឡើង លោកនាយ​ឧ​ត្ត​ម​សេនីយ៍ ខៀវ សុភ័គ អ្នកនាំពាក្យ​ក្រសួងមហាផ្ទៃ​បានបញ្ជាក់​តាម​សង្គម​ហ្វេ​ស​ប៊ុ​កថា សមត្ថកិច្ច​បាន​ចាប់ខ្លួន​មនុស្ស​៥​នាក់ ពាក់ព័ន្ធនិង​ករណី​បំផ្ទុះ​គ្រាប់បែក នៅលើ​ដងផ្លូវ​១៦៣ សង្កាត់​បឹង​កេងកង​ទី​៣ ខណ្ឌចំការមន កាលពី​យប់​ថ្ងៃទី​៦ កញ្ញា ២០១៦​កន្លងទៅ។​

    អ្នកនាំពាក្យ​បានបញ្ជាក់​បន្ថែមថា ការចាប់ខ្លួន​មនុស្ស​៥​នាក់​នេះ បាន​ធ្វើឡើង​រយៈពេល​២​ថ្ងៃ គឺ​នៅ​ថ្ងៃ​ម្សិលមិញ​ទី​២០ ​និង​២១ ​កញ្ញា ហើយពេលនេះ​ពួកគេ​កំពុង ឃាត់ខ្លួន​នៅ​អគ្គស្នងការដ្ឋាន​ប៉ូលិស​ជាតិ​ដើម្បី​សួរនាំ​បន្ត។​

    បើតាម​លោក ខៀវ សុភ័គ បាន​អះអាងថា ក្រោយ​ចាប់ខ្លួន​សម​ត្ថកិច្ច​បាន​សាកសួរ​ពួកគេ​ទៅ​ដឹងថា ករណី​បោក​គ្រាប់បែក​នេះ​គឺជា​រឿង​គំនុំ​ស្នេហា ជាមួយ​នារី​រងគ្រោះ​ជនជាតិ​វៀតណាម ប៉ុន្តែ​មិនមែនជា​រឿង​ភេ​វរ​កម្ម​ទេ។​

    សូមបញ្ជាក់ថា​នៅវេលា​ម៉ោង​៧ និង​៤០​នាទី​យប់​ថ្ងៃទី​៦ កញ្ញា ២០១៦ មាន​ករណី​ភ្ញាក់ផ្អើល​មួយ នៅតាម​បណ្តោយ​ផ្លូវ​លេខ​១៦៣ សង្កាត់​បឹងកេងកង​៣ ខណ្ឌចំការមន ដោយ​មានការ​បំផ្ទុះ​គ្រាប់បែក​១​គ្រាប់ បណ្តាល​ឱ្យ​មនុស្ស​៤​នាក់​រងរបួស និង​រថយន្ត​៤​គ្រឿង​រួមទាំង​ទ្រព្យសម្បត្តិ​ប្រជាពលរដ្ឋនៅក្បែរនោះ​ខូចខាត​ផងដែរ។​

    តាម​កាមេរ៉ា វីដេអូ​បាន​បង្ហាញថា ជនដៃដល់​ដែល​បំផ្ទុះ​គ្រាប់បែក​នោះបាន​ជិះ​ម៉ូតូ​យកទៅ​ទម្លាក់​លើផ្លូវ​១៦៣ ហើយ​រថយន្ត​ឡិច​ស៊ី​ស​១​គ្រឿងដែល​កំពុងបើក​តាមផ្លូវ​នោះ​ក៏​ផ្ទុះ​ចំ​ដោយ​ចៃដន្យ​តែម្តងទៅ។​

    ក្រោយពី​មានការ​បំផ្ទុះ​គ្រាប់បែក​នោះ​សម​ត្ថ​កិច្ច​គ្រប់​ជំនាញ បាន និង​បង្កើត​គណៈកម្មការ​ឆែកឆេ​រលើ​មេ​រ៉ា​វីដេអូ​សុ​វត្តិភាព ហើយ​បាន​បើកការស៊ើបអង្កេត និង​ស្រាវជ្រាវ​យ៉ាង​ស្ងៀមស្ងាត់​បំផុត រហូតមកដល់​ពេលនេះ​ទើប​មាន​លេចឮ​ព័ត៌មាន​មិនទាន់​ផ្លូវការ​ថា ក្រុម​អ្នក​បំផ្ទុះ​គ្រាប់បែក​នៅតាម​ផ្លូវ​១៦៣ សង្កាត់​បឹង​កេងកង​៣ ត្រូវ​ឃាត់​បាន​ប្រមាណ​១០​នាក់។​

    ទោះ​ជាមាន​ព័ត៌មាន​យ៉ាងនេះ​ក្តី​មន្ត្រីប៉ូលិស ព្រហ្មទណ្ឌ​ម្នាក់ ដែល​ដឹកនាំ​កម្លាំង​ធ្វើ​កិច្ចការងារ​នេះ​បានបញ្ជាក់​តាម​ទូរស័ព្ទ​ថា ​"​សុំ​មិនទាន់និយាយ​បានទេ ព្រោះ​សម​ត្ថ​កិច្ច​កំពុងធ្វើការ​សាកសួរ ហើយក៏​បិទ​ទូរ​ស័ព្ទ​ទៅវិញ​ទៅ​"។​ ​ហើយមន្ត្រី​រូបនោះ​បានឆ្លើយមុនបិទ​ទូរ​ស័ព្ទថា "​មាន​មែនប៉ុន្តែ​មិនទាន់​ច្បាស់លាស់​នៅឡើយ​ទេ​"៕​

adverise with khmeread

មតិយោបល់