adverise with khmeread Untitled 1

ឃាត់កូនសិស្ស២នាក់យកកាំភ្លើងចូលក្នុងសាលា

    ភ្នំពេញ ៖ កូនសិស្ស​សាលា​ស្ទាវៗ​២​នាក់ ម្នាក់​រៀន​នៅ​អនុវិទ្យាល័យ ហ៊ុន សែន ពោធិ៍ចិនតុង និង​ម្នាក់ទៀត​រៀន នៅ​វិទ្យាល័យ​បូរី​១០០​ខ្នង ត្រូវបាន​ប៉ូលិស​ខណ្ឌ​ពោធិ៍​សែន​ជ័យ ចាប់ខ្លួន​នៅ​រសៀល​ថ្ងៃទី​៩ ខែមករា ឆ្នាំ​២០១៥​នេះ ក្រោយពី​រកឃើញ មាន​កាំភ្លើងខ្លី​មួយ​ដើម នៅក្នុង​កាបូប​ពេល​ដើរចូល​សាលា​។​

   ប៉ូលិស​ខណ្ឌ​ពោធិ៍​សែន​ជ័យ​បាន​ឲ្យ​ដឹងថា ជនសង្ស័យ​ទាំង​២​នាក់ ដែល​ត្រូវ​កម្លាំង​ប៉ូលិស​ចាប់ខ្លួន​នោះ​រួមមាន​ទី​១- ឈ្មោះ តេង ដា​វីត អាយុ​១៧​ឆ្នាំ មុខរបរ​សិស្ស​ថ្នាក់​ទី​៩ នៅ​អនុវិទ្យាល័យ ហ៊ុន សែន ពោធិ៍ចិនតុង រស់នៅ​ភូមិ​ប៉ប្រក់​ខាងត្បូង សង្កាត់​កា​កាប និង​ជនសង្ស័យ​ទី​២-​ឈ្មោះ ទីវ ដា​រ៉ាត់ អាយុ​១៧​ឆ្នាំ សិស្ស​ថ្នាក់​ទី​១១ នៅ​វិទ្យាល័យ​បូរី​១០០​ខ្នង ខណ្ឌ​សែន​សុខ រស់នៅ​ផ្ទះ​លេខ​៣៦ ផ្លូវ​លេខ​៥ ភូមិ​គោក​ឃ្លៀង សង្កាត់​ភ្នំពេញ​ថ្មី ខណ្ឌ​សែន​សុខ​។​

    ប៉ូលិស​បន្តថា នៅវេលា​ម៉ោងជាង​៣​រសៀល​ថ្ងៃទី​៩​មករា​ខណៈ​យុវ​សិស្ស តេង ដា​វីត ដើរចូល​សាលា​នោះ ស្រាប់តែ​លោកគ្រូ​នាយក​ឃើញ មាន​កាបូប​ពណ៌​ខ្មៅ ពេលនោះ​មានការ​សង្ស័យ ក៏​រាយការណ៍​ដល់​សមត្ថកិច្ច មូលដ្ឋាន​របស់លោក ចុះទៅ​សួរនាំ ។​

    ស្រាប់តែ​រកឃើញ​កាំភ្លើងខ្លី​មួយ​ដើម ម៉ាក​ប៉េ​ត្រូវ​បេ​រីតា​។ ក្រោយ​ឃើញ​កាំភ្លើងខ្លី នៅក្នុង​កាប​បូ​ប​ហើយ សមត្ថកិច្ច​ក៏បាន​នាំខ្លួន​មក​សួរនាំ នៅ​ប៉ុស្តិ៍​កា​កាប​ហើយ​យុវ​សិស្ស​រូបនេះ ឆ្លើយ​សារភាពថា បាន​យក​ពី​ឈ្មោះ ទីវ ដា​រ៉ាត់ រួចហើយ ក៏​ធ្វើការ​ឃាត់ខ្លួន​បន្តទៀត​។​

    បើតាម​យុវជន​សិស្ស ទីវ ដា​រ៉ាត់ កាំភ្លើងខ្លី​មួយ​នេះ រូបគេ​បាន​ទិញ​ពី​ប្រទេស​ថៃ អំឡុងពេល​ទៅលេង​នៅ​ទីនោះ​។ យ៉ាងណាក៏ដោយ សម្រាប់​យុវ​សិស្ស​ទាំង​២​នាក់ ត្រូវបាន​នាំខ្លួន​ទៅ​សួរនាំ នៅ​អធិការដ្ឋាន​ប៉ូលិស ខណ្ឌ​ពោធិ៍​សែន​ជ័យ ដើម្បី​ចាត់ការ​តាម​នីតិវិធី​៕​

adverise with khmeread

មតិយោបល់