adverise with khmeread Unnamed %281%29

ជនសង្ស័យពីរនាក់ដកកាំភ្លើងភ្ជង់សន្តិសុខ ដើម្បីប្លន់មិត្តស្រីចេញពីមន្ទីរឃុំឃំាង

    ភ្នំពេញ ៖ បុរស​ជា​ជនសង្ស័យ​ម្នាក់ បាន​នាំ​បក្ខពួក​ម្នាក់ទៀត ជិះ​ម៉ូតូ​ម៉ាក​ស៊ុយ​ហ្ស៊ុ​យ​គី​វីវ៉ា កញ្ចាស់​១​គ្រឿង និង​ប្រដាប់​ដោយ អាវុធខ្លី​បាញ់​ហ្គាស់​១​ដើម ចូលទៅ​ធ្វើ​សកម្មភាព​ភ្ជង់​គំរាម​បាញ់សម្លាប់ សន្ដិសុខ​យាម​នៅ មណ្ឌល​សង្គមកិច្ច​រាជ​ធានី​ភ្នំពេញ​ហៅ​ "​មណ្ឌល​ព្រៃ​ស្ពឺ​" រំដោះ​ស្រី​ម្នាក់​ដែលជា​សង្សារ ចេញពី​មណ្ឌល​នោះ។​

    មូលហេតុ​ដែល​ពួកគេ​ព្រហើន​ហ៊ាន​ទៅ​រំដោះ​បែបនេះ បន្ទាប់ពី​ត្រូវបាន​អាជ្ញាធរ​ចាប់ ខ្លួន​ស្ត្រី​ម្នាក់​ពីបទ​ប្រើប្រាស់​គ្រឿងញៀន ដាក់​នៅក្នុង​មណ្ឌល​នោះ ទើបបាន​៣​ថ្ងៃ​ប៉ុណ្ណោះ។ ខណៈ​នោះបាន​បង្កឱ្យមាន​ការភ្ញាក់ផ្អើល​យ៉ាងខ្លាំង ហើយ​ប៉ូលិស​ខណ្ឌ​ពោធិ៍​សែន​ជ័យ បាន​ដេញតាម​ចាប់ខ្លួនបាន​បក្ខពួក ម្នាក់​រួម​នឹង​ស្ត្រី​ដែល​ត្រូវ​រំដោះ​ចេញ​នោះ​ម្នាក់ទៀត។​ ចំណែក​ជនសង្ស័យ​ដែលជា​សង្សារ​ស្ត្រី​នោះបាន​គេចខ្លួនបាត់​។​

    ហេតុ​ការ​ណ៏​នោះ បាន​បង្ក​ឱ្យ​មានការ​ភ្ញាក់ផ្អើល​ឡើង កាលពី​វេ​ល​ម៉ោង​១២​ និង​៤០​នាទី រសៀល​ថ្ងៃទី​៣០ ខែកញ្ញា ឆ្នាំ​២០១៦ នៅ​ចំណុច មណ្ឌល​សំចត​សង្គមកិច្ច​រាជធានី​ភ្នំពេញ​ហៅ ​"​មណ្ឌល​ព្រៃ​ស្ពឺ​" ​ស្ថិតក្នុង ភូមិ​ស្រែ​ជម្រៅ សង្កា​ត​ចោមចៅ ខណ្ឌ​ពោធិ៍​សែន​ជ័យ រាជធានី​ភ្នំពេញ​។​

    បន្ទាប់មក​ប៉ូលិស​ដេញតាម​ចាប់ ខ្លួន​ជនសង្ស័យ​បាន​ម្នាក់ រួម​នឹង​ស្ត្រី​ដែល​ពួកគេ​រំដោះ​ចេញ​បាន​ម្នាក់ទៀត នៅ​ម្ដុំ​ជិត​មជ្ឈមណ្ឌល​ពាណិជ្ជកម្ម អែ​ត​វូត ស្ថិត​ក្នុងភូមិ​ស្លែង​រលើង សង្កាត់​ទឹកថ្លា ខណ្ឌ​សែន​សុខ។ ​ចំណែក​ម្នាក់ទៀត​គេចខ្លួនបាត់​។​

    ប៉ូលិស​និយាយថា ជនសង្ស័យ​ដែល​ត្រូវ​ចាប់ខ្លួន​នោះ ឈ្មោះ អ៊ុង រតនៈ អាយុ​២៣​ឆ្នាំ មុខរបរ​មិន​ពិតប្រាកដ ស្នាក់នៅ​ម្តុំ​ត្រឡោកបែក មាន​ស្រុកកំណើត ខណ្ឌទួលគោក រាជធានី​ភ្នំពេញ​។​

    ចំណែក​ស្រី​ម្នាក់​ដែល​ត្រូវបាន​រំដោះ​ចេញពី​ម​ណ្ឌ​នោះ ឈ្មោះ គីម ស្រី​ពេជ្រ អាយុ​២៤​ឆ្នាំ មាន​ស្រុកកំណើត​នៅ​ឧដុង្គ ខេត្តកំពុងស្ពឺ និង​ត្រូវបាន​ចាប់​ខ្លួន​ដាក់​នៅក្នុង មណ្ឌល​ខាងលើ ទើបបាន​រយៈពេល​៣​ថ្ងៃ​តែប៉ុណ្ណោះ​។ ​រីឯ​ជនសង្ស័យ​ម្នាក់​ដែល រត់គេច​បាត់​និង​ជា​សង្សារ ស្រី​នោះ ព្រមទាំង​ជា​មេខ្លោង​ផង​នោះ មិនបាន​ស្គាល់​អត្តសញ្ញាណ​ទេ​។​

    ប្រភពព័ត៌មាន​បានឱ្យ​ដឹងថា នៅ​មុនពេល​កើតហេតុ ជនសង្ស័យ​ដែល​រត់គេចខ្លួន​បាត់​នោះ ប្រដាប់ ដោយ​អាវុធខ្លី​ប្រើ​ហ្គាស់​១​ដើម បាន​នាំ​បក្ខពួក​របស់ខ្លួន អ៊ុង រតនៈ ជិះ​ម៉ូតូ​១​គ្រឿង​ម៉ាក ស៊ុយ​ហ្ស៊ុ​យ​គី​វីវ៉ា ព​ណ៌ខ្មៅ​ពាក់​ស្លាក​លេខ​ក្រុងព្រះសីហនុ ​1B-6775 ទៅ​រំដោះ​ស្ត្រី​ដែលជា​សង្សារ​របស់ខ្លួន​។​

    ពេលទៅដល់​បាន​ដក​កាំភ្លើងខ្លី​នោះ ភ្ជង់​គំរាម​បាញ់សម្លាប់ សន្តិសុខ ដែល​យាម​នៅ​មណ្ឌល​នោះ និង​បាន​នាំ​ស្ត្រី​នោះ​ជិះ​ម៉ូតូឌុប​គ្នា គេចខ្លួន​និង​បាន​បង្កឱ្យ​មានការ​ភ្ញាក់ផ្អើល យ៉ាងខ្លាំង។​

    ហើយ​ភ្លាមៗ​នោះ​កម្លាំង​ប៉ូលិស​ព្រហ្មទណ្ឌ​ខណ្ឌ​ពោធិ៍​សែន​ជ័យ បាននាំគ្នា​ដេញតាម រហូតដល់ ម្ដុំ​ជិត​មជ្ឈមណ្ឌល​ពាណិជ្ជកម្ម អែ​ត​វូត ស្ថិត​ក្នុងភូមិ​ស្លែង​រលើង សង្កាត់​ទឹកថ្លា ខណ្ឌ​សែន​សុខ ទើប​ចាប់ខ្លួនបាន​បក្ខពួក​ម្នា​ក់​និង​ស្ត្រី​ម្នាក់ ដោយសារ​ជន​ទាំងនោះ​ផ្ដួល​ម៉ូតូ​ចោល ព្យាយាម​រត់គេចខ្លួន  ចំណែក​ម្នាក់ទៀត​គេចខ្លួនបាត់​តែម្តង៕​

adverise with khmeread

មតិយោបល់