Unnamed %284%29

ប៉ូលិស​ចរាចរណ៍​ខណ្ឌ​ជ្រោយចង្វារ ព្រលះ​ជាមួយ​អ្នកកាសែត​រស្មី​កម្ពុជា​ (​មាន​វីដេអូ​)

    ភ្នំពេញ ៖ មន្ត្រីប៉ូលិស​ចរាចរណ៍​ខណ្ឌ​ជ្រោយចង្វា​រដាក់​ប៉ុស្តិ៍​ត្រួតពិនិត្យ​ចល័ត​នៅលើ​ផ្លូវជាតិ​លេខ​៦​អា បាន​ដកយក​កាមេរ៉ា​ទូរស័ព្ទ​របស់​អ្នកយកព័ត៌មាន​កាសែត​រស្មី​កម្ពុជា និង​លុបចោល​រូបថត​មួយចំនួន ដែលជា​រូបភាព​ស្តីពី​សកម្មភាព​របស់​មន្ត្រីប៉ូលិស​ដែល​កំពុង​បំពេញភារកិច្ច ដោយ​ចោទ​ពីបទ​ប្រើប្រាស់​ទូរស័ព្ទ​ក្នុងពេល​​កំពុង​បើកបរ​។​

    ហេតុការណ៍​ខាងលើ​បាន​កើតមានឡើង​នៅលើ​ផ្លូវជាតិ​លេខ​៦​អា មុខ​វត្ត​ខ្ទរ នៅ​ម៉ោង​ប្រមាណ​ជា​៩ ​និង​៣០​នាទី​ព្រឹក​ថ្ងៃ​ទ​១៩ ខែតុលា ឆ្នាំ​២០១៦ ក្នុងពេល​អ្នកយកព័ត៌មាន​បាន​ចុះទៅពិនិត្យ សកម្មភាព​ត្រួតពិនិត្យ​របស់​ប៉ូលិស​ចរាចរណ៍ បន្ទាប់ពី​មាន​សេចក្តីរាយការណ៍​ពី​ប្រជាពលរដ្ឋ​មក​ថា មន្ត្រីប៉ូលិស​ក្រុម​នេះ បាន​វាយ​ទៅលើ​កញ្ចក់ទ្វារ​រថយន្ត​អ្នកដំណើរ​ក្នុងពេល​ហៅ​ត្រួតពិនិត្យ​។​

    មន្ត្រីប៉ូលិស​បាន​ចោទ​អ្នកបើកបរ​ថា បាន​និយាយ​ទូរស័ព្ទ​ក្នុងពេល​កំពុង​បើកបរ តែ​អ្នកបើកបរ​អះអាងថា ទូរស័ព្ទ​របស់គាត់​បា​ន​ដាក់​លើ​ភ្លៅ និង​បើក​ស្ពី​គ័​រ​ (Speaker) រួច​ក៏​លើ​ក​ទូរស័ព្ទម​កបិទ​បញ្ចប់​ការសន្ទនា​នៅពេល​បានមក​ដល់​កន្លែង​ត្រួតពិនិត្យ​។​

    ចំណែក​រឿងរ៉ាវ​របស់​អ្នកយកព័ត៌មាន​វិញ មិនបាន​និយាយ​ទូរស័ព្ទ​ទេ គឺ​បាន​ចុះមក​ថតរូប​ភាព​ស្តីពី​សកម្មភាព​របស់​ក្រុម​ត្រួតពិនិត្យ ដោយ​កាមេរ៉ា​ទូរស័ព្ទ ហើយ​ត្រូវបាន​ប៉ូលិស​ឯកសណ្ឋាន​ចម្រុះ ឃាត់​ឱ្យ​ឈប់​និង​ណែនាំឱ្យ​ចុះ​ពីលើ​រថយន្ត​ទៅ​ជួប​មេ ដែល​អង្គុយ​នៅ​កៅអី​ក្បែរ​តុ​ក្រោម​ដើម​ត្របែកព្រៃ ដូច​ទម្លាប់​ដែល​គេ​បានធ្វើ​លើ​អ្នកបើកបរ​ផ្សេងៗ​ពីមុនៗ​មក​អីចឹង​ដែរ។​

    អ្នកយកព័ត៌មាន​រស្មី​កម្ពុជា​លោក ​ប៉ែន ខុន មិនបាន​ចុះ​ពីលើ​រថយន្ត​ភ្លាមៗ​ទេ ហើយក៏​បាន​សួរ​ត្រឡប់​ទៅ​ប៉ូលិស​ចរាចរណ៍​វ័យក្មេង​សប្បុរសរ​ដូច​កូនកាត់​ចិន​ម្នាក់ ដែល​ដូចជា​ប៉ូលិស​ទើបនឹង​ចូល​ថ្មី​ថា "​ខ្ញុំ​ខុស​អី​ត្រូវ​ទៅ​ជួប​មេ​"​។​

    ប៉ូលិស​ឯកសណ្ឋាន​មិនមែន​ចរាចរណ៍​ពីរ​បីនាក់​ទៀត ក៏​មកដល់​រួច​បង្ខំ​ឱ្យ​លោក ​ប៉ែន ខុន ចុះទៅ​ជួប​មេ ហើយ​ថា "​លោក​បើកបរ​និយាយ​ទូរស័ព្ទ​"។ លោក ​ប៉ែន ខុន​ បាន​ប្រាប់​ទៅវិញ​ថា "​មិនបាន​និយាយ​ទូរស័ព្ទ​ទេ គឺ​ខ្ញុំ​ថតរូប​ពី​សកម្មភាព​របស់លោក​ដោយ​កាមេរ៉ា​ទូ​ស័ព្ទ​"។​

    ភ្លាមនោះ​ប៉ូលិស​ចរាចរណ៍​ក្មេង ក៏បាន​ទាញយក​កាមេរ៉ា​ទូរស័ព្ទ​របស់លោក​ ប៉ែន ខុន​ ទៅ​កន្លែង​មេ​របស់គេ​ហើយ ក៏​ចុច​លប់​រូបថត​សំខាន់ៗ​របស់គាត់ ដែល​បាន​ថត​សកម្មភាព​របស់​ប៉ូលិស​អស់​។​

    ពេលនោះ​ការជជែក​គ្នា​ក៏បាន​កើតមានឡើង និង​មាន​ប៉ូលិស​ចរាចរណ៍​ម្នាក់​រាង​ធាត់​មិនសូវ​ខ្ពស់​សម្បុរ​ខ្មៅ និង​ដុះ​ក្បាលពោះ​បន្តិច បាន​ទាញ​កាមេរ៉ា​ទូរស័ព្ទ​មក​ថត​វីដេអូ ហើយ​និយាយ​បែប​ប​ច្រ​ងែ​ង​ច្រងាង​ថា "​ជិះឡាន​គ្មាន​ឈៀក គ្មាន​បង់​ព័ន្ធ​ផ្លូវ និង​ធ្វើ​កាយវិការ​មិន​សមជា​អ្នកកាសែត​ដាក់​ប៉ូលិស​ទៀត​"​។​

    ក្នុងពេល​ជជែក​គ្នា​នេះ លោក​ ប៉ែន ខុន​ បាន​អញ្ជើញ​ប៉ូលិស​ដែល​ថត​វីដេអូ​ឱ្យ​ពិនិត្យថា ឡាន​នេះ​វា​ខុស​អី​ខ្លះ តែ​គាត់​បែរជា​អត់​ហ៊ាន​បែរ​កាមេរ៉ា​មក​ថត​ទេ ព្រោះ​ឡាន​មាន​ឯកសារ​គ្រប់គ្រាន់​។​

    ក្នុងពេល​ជជែក​វែកញែក​នេះ​ប៉ូលិស​ចរាចរណ៍​និយាយ​ល្មម​ទេ តែ​ប៉ូលិស​ពាក់​ឯកសណ្ឋាន​រដ្ឋបាល​សម្តី​ខ្លាំង​ជាង ដែល​តាមច្បាប់ គឺ​គ្មាន​សិទ្ធិ​ទាល់តែសោះ​ក្នុងការ​បញ្ជា​ឱ្យ​យានយន្ត​ឈប់​នោះ។ លើកលែងតែ​ករណី​រថយន្ត​មាន​បទល្មើស​ព្រហ្មទណ្ឌ ទើប​គេ​ចេញ​អន្តរាគមន៍​បាន​។​

    មន្ត្រីប៉ូលិស​រដ្ឋបាល​ដែល​ធ្វើការ​ជាមួយ​ក្រុម​ប៉ូលិសចរាច​រណ៍ កន្លងមក​មិន​ចំពោះ​ក្រុម​ខាងលើនេះ​ទេ គឺ​បាន​បង្កបញ្ហា​ច្រើនណាស់ ជាពិសេស​គឺ​ដេញចាប់​ជម្រិត​យកប្រាក់​ពី​ក្មេងៗ​ដែល​ជិះ​ម៉ូតូ​មិនបាន​ពាក់មួក ឬ​អត់​ស្លាក​លេខ​។​

    មួយសន្ទុះ​ក្រោយមក​ប៉ូលិស​ចរាចរណ៍​អង្គុយ​ក្រោម​ម្លប់ឈើ ដែល​គេ​ហៅថា​​ "​មេៗ " តែ​មិនមាន​ពាក់​ស្លាក​ឈ្មោះ និង​អត្តលេខ​នៅលើ​អាវ កាន់​ក្រដាស​ស្តីពី​អនុក្រឹត្យ​ដែលមាន​សភាព​ទួ​កៗ និង  នៅលើ​បន្ទាត់​ខ្លះ​មាន​ហៃ​ឡៃ​ពណ៌​លឿង ជា​ចំណុច​សម្គាល់​ទំនង​កុំឱ្យ​ភ្លេច បាន​ចេញមក​អន្តរាគមន៍ និង​ពន្យល់ថា កាន់​ទូរស័ព្ទ​ក្នុងពេល​បើកបរ ទោះ​មិន​និយាយ​ក៏​ចាត់ទុកថា​ប្រើប្រាស់​ទូរស័ព្ទ​ហើយ ត្រូវ​ផាកពិន័យ តែ​អាច​និយាយ​គ្នា​បាន បើជា​អ្នកកាសែត និង​និយាយ​ឱ្យ​ស្រួល​។​

    លោក​ ព្រាប ច័ន្ទ​វិបុល ប្រធាន​នាយកដ្ឋាន​ដឹកជញ្ជូន​ផ្លូវគោក និង​ជា​អ្នកតាក់តែង​ច្បាប់​ចរាចរណ៍​ផ្លូវគោក និយាយ​ឱ្យ​ដឹង​នៅ​ថ្ងៃទី​១៩ ខែតុលា​ថា នៅក្នុង​អនុក្រឹត្យ​ស្តីពី​ការផាកពិន័យ​ត្រង់​មាត្រា​ទី​៦ មិន​បានចែង​ច្បាស់​អំពី​ការប្រើប្រាស់​កាមេរ៉ា​ទូរស័ព្ទ និង​ទូរស័ព្ទ​ទេ គ្រាន់តែ​ហាម​ប្រើប្រាស់​ទូរស័ព្ទ​ក្នុងពេល​បើកបរ​។​

    នៅក្នុង​ច្បាប់​ចរាចរណ៍​ផ្លូវគោក​ត្រង់​ជំពូក​បី មាត្រា​ទី​៨ ចំណុច​៦ បាន​ចែងថា ហាម​ប្រើប្រាស់​ទូរស័ព្ទ​នៅពេល​កំពុង​បើកបរ​យាន​ជំនិះ ដោយ​គ្មាន​ឧបករណ៍​សំឡេង​ភ្ជាប់​ទំនាក់ទំនង​។​

    ឯ​នៅក្នុង​អនុក្រឹត្យ​ស្តីពី​ការផាកពិន័យ​ត្រង់ចំណុច​អក្សរ ​"​ជ​" បានសរសេរថា អ្នកបើកបរ​យានយន្ត​ប្រើប្រាស់​ទូរស័ព្ទ​គ្មាន​ឧបករណ៍​សំឡេង​ភ្ជាប់​ទំនាក់ទំនង​នៅពេល​កំពុង​បើកបរ ត្រូវ​ពិន័យ​ជា​ប្រាក់ ២៥.០០០​រៀល​។ តែ​គ្មាន​ចំណុច​ណាមួយ​ដែល​ហាម​មិន​ឱ្យ​ប្រើប្រាស់​កាមេរ៉ា​ទូរស័ព្ទ​នោះទេ​។​

    ចំណែក​លោក​ឧ​ត្ត​ម​សេនីយ​ឯក រុន រដ្ឋ​វាសនា ប្រធាន​នាយកដ្ឋាន​នគរ​បាលច​រាច​រណ៍ និង​សណ្តាប់ធ្នាប់​សាធារណៈ នៃ​អគ្គស្នងការ​នគរបាល​ជាតិ ក្រសួងមហាផ្ទៃ និយាយ​ឱ្យ​ដឹង​នៅ​ថ្ងៃទី​១៩​ ខែតុលា​ថា ប្រើប្រាស់​កាមេរ៉ា​ថតរូប​ក្នុងពេល​កំពុង​បើកបរ គឺ​មិន​ខុសច្បាប់​ទេ ហើយ​ថត​ប៉ូលិស​ធ្វើការ​នៅលើ​ផ្លូវ​សាធារណៈ​នោះ​ក៏​មិន​ខុស​ដែរ​។​

    លោក​បន្តថា  ប៉ូលិស​ចរាចរណ៍​ធ្វើ​សកម្មភាព​ត្រួតពិនិត្យ​នៅលើ​ផ្លូវ​សាធារណៈ គឺជា​បុគ្គល​សាធារណៈ ពលរដ្ឋ​ណា​ក៏​អាច​ថត​សកម្មភាព​គេ​បានដែរ​។ ប៉ូលិស​ដែល​រារាំង​មិន​ឱ្យ​គេ​ថតរូប គឺជា​ប៉ូលិស​ខិលខូច​ខ្លាច​គេ​ថត​បាន​សកម្ម​ភាពមិន​ល្អ​របស់ខ្លួន និង​រឹតតែ​ខុស​ធ្ងន់​ថែមទៀត​នៅពេល​ដក​កាមេរ៉ា​របស់គេ និង លុប​រូប​របស់គេ​ចោល​នោះ​។​

    លោក​បន្តថា ប៉ូលិស​ចរាចរណ៍​ចុះ​ធ្វើការ​តាមផ្លូវ​សព្វថ្ងៃនេះ ពិបាក​ក្នុងការ​គ្រប់គ្រង​ណាស់ ហេតុនេះហើយ​ទើបបានជា​នាយកដ្ឋាន​ប៉ូលិស​ចរាចរណ៍​សណ្តាប់​ធ្នាប់ បង្កើត​ហ​ត​ឡាញ់ (Hot Line) ថ្មី​មួយទៀត សម្រាប់​ប្រជាពលរដ្ឋ​ផ្តល់ព័ត៌មាន​ឱ្យ​បាន​ទាន់ពេល​ពី​មន្ត្រីប៉ូលិស​ណា នៅ​កន្លែង​ណា ដែល​បាន​អនុវត្ត​ខុសឆ្គង​។​

    លោក ចេ​វ ហាក់ ប្រធានការិយាល័យ​ចរាចរណ៍​ជើងគោក​រាជធានី​ភ្នំពេញ និយាយ​ឱ្យ​ដឹង​នៅ​ថ្ងៃទី​១៩​ ខែតុលា​ថា កម្លាំង​ត្រួតពិនិត្យ​ការអនុវត្ត​ច្បាប់​ចរាចរណ៍​នៅលើ​ផ្លូវជាតិ​លេខ​៦​អា ត្រង់ចំណុច​វត្ត​ខ្ទរ ជា​កម្លាំង​របស់​ខណ្ឌ​ជ្រោយចង្វារ មិនមែនជា​កម្លាំង​រប​ស់​ក្រុង​ទេ​។ ក្រុម​ដែល​បាន​ចុះ​ធ្វើការ​នៅលើ​ផ្លូវ​នេះ ពិបាក​ក្នុងការ​គ្រប់គ្រង​ណាស់​។​

    លោក​ឧ​ត្ត​ម​សេនីយ៍ ហេង  ចាន់​ធា​រី ស្នងការរង នៃ​ស្នងការដ្ឋាន​នគរបាល​រាជធានី​ភ្នំពេញ ទទួល​ផែន​ចរាចរណ៍ បាន​និយាយ​ដោយ​ទទួលស្គាល់​នៅ​ថ្ងី​១៩ ​ខែតុលា​ថា កម្លាំង​ប៉ូលិស​ចុះ​ធ្វើការ​ត្រួតពិនិត្យ​ការអនុវត្ត​ច្បាប់​ចរាចរណ៍ នៅតាម​ដងផ្លូវ​សាធារណៈ​សព្វថ្ងៃនេះ មិនមែន​តែ​នៅ​រាជធានី​ទេ ដែល​បង្ក​ឲ្យ​មាន​បាតុភាព​ដោយសារតែ​ការធ្វើ​មិនបាន​ត្រឹមត្រូវ​តាមច្បាប់​។​

    ប្រជាពលរដ្ឋ​ពិតជា​មិន​សប្បាយចិត្ត នឹង​សកម្មភាព​ខុសច្បាប់​រប​ស់​ប៉ូលិស​មួយចំនួន នៅលើ​ផ្លូវ​សាធារណៈ​។ ការត្រួតពិនិត្យ​កន្លងទៅ​ធ្វើ​ឱ្យ​ការគោរព​ច្បាប់​បានល្អ​ប្រសើរ​បន្តិច តែ​មានការ​ថ្នាំងថ្នាក់​ក៏​ច្រើន​ដែរ ដោយសារតែ​គេ​ធ្វើ​មិនបាន​ត្រឹមត្រូវ​។​

    ការត្រួតពិនិត្យ​ការអនុវត្ត​ច្បាប់​ចរាចរណ៍ នៅតាម​ផ្លូវជាតិ​សព្វថ្ងៃនេះ ត្រូវបាន​គេ​មើលឃើញថា ស្ទើរ​គ្រប់​គោលដៅ​សុទ្ធតែ​បាន​យកលុយ​ក្រោម​តុ​ពី​រថយន្ត​តាក់ស៊ី រថយន្ត​ដឹកទំនិញ​ធុន​តូច​និង​មធ្យម​។​

    គោលដៅ​ត្រួតពិនិត្យបាន​ក្លាយជា​កុងត្រូលជជុះ ដោយ​កន្លែង​ខ្លះ​មាន​ទាំង​កងកម្លាំង​ប្រជា​ការពារ ប៉ូលិស​ប៉ុស្តិ៍ ដែល​មិនមាន​សិទ្ធិ​ក្នុង​ការហៅ​រថយន្ត ក៏បាន​ចេញមក​ជួយ​ឃាត់​រថយន្ត ដើម្បី​ឱ្យ​ចូលចាប់​ដៃ​ដែរ​។ គោលដៅ​ត្រួតពិនិត្យ​មួយ​បាន​ក្លាយជា​ប៉ុស្តិ៍​ខ្លាញ់​ហើយ​នៅពេលនេះ​។ មន្ត្រីប៉ូលិស​ខ្លះ​ពេល​ឃាត់​ម្តងៗ​ហា​ឡើង​ទារលុយ​៥​ម៉ឺន​ ទៅ​១០​ម៉ឺន​រៀល​ឆៅៗ​តែម្តង ដោយ​សម្អាង​ច្បាប់​ចរាចរណ៍​ថ្មី​ផាក​លុយ​ច្រើនៗ៕


 

មតិយោបល់