ទំនងជាស្រវឹងស្រាបើករថយន្តបុកបង្គោលខ្សែភ្លើងបាក់១ដើម

   ភ្នំពេញ ៖ យុវជនមួយក្រុមទំនងជាស្រវឹងស្រាបើករថយន្ត២គ្រឿងប្រជែងគ្នាតាមផ្លូវសាធារណៈ ហើយរថយន្តកាមេរី(បាឡែន)មួយគ្រឿងបានបួងចង្កូតបត់ទៅបុកបង្គោលខ្សែភ្លើងពេញទំហឹង បណ្តាលឱ្យបាក់១ដើម ចំណែករថយន្តបានរងការខូចខាតយ៉ាងដំណំ សំណាងល្អមិនមានអ្នកណាម្នាក់រងរបួសនោះទេ ។
    គ្រោះថ្នាក់ខាងលើនេះបានកើងឡើងកាលពីវេលាម៉ោង៤និង២៥នាទីទៀបភ្លឺ ឈានចូលថ្ងៃទី១៣ ខែមករា ឆ្នាំ២០១៦ នៅចំណុចមុខហាងអ៊ីអុបទិច តាមបណ្តោយផ្លូវព្រះសីហនុ កែងផ្លូវលេខ៥១ ស្ថិតក្នុងសង្កាត់បឹងកេងកងទី១ ខណ្ឌចំការមន ។
    ប្រភពព័ត៌មានពីកន្លែងកើតហេតុបានឱ្យដឹងថា ដំបូងគេបានឃើញរថយន្ត២ គ្រឿង បើកក្នុងល្បឿនលឿនប្រជែងគ្នាតាមបណ្តោយផ្លូវព្រះសីហនុទិសដៅពីកើតមកលិច ។
    ខណ:មកដល់ចំណុចកើតហេតុបានបត់ទៅផ្លូវលេខ៥១ តែបួងចង្កូតមិនទាន់
បានបុកបង្គោលខ្សែភ្លើងពេញទំហឹង បណ្តាលឱ្យបាក់អស់១ដើម។ចំណែករថយន្តបង្កការខូចខាតផ្នែកខាងមុខយ៉ាងដំណំ សំណាងល្អមិនមានអ្នករងរបួសនោះទេ ។    បន្ទាប់ពីបង្កហេតុគេឃើញមានយុវជនទាំងប្រុសទាំងស្រីជាច្រើននាក់ បាននាំគ្នាចេញពីរថយន្តគេចខ្លួនបាត់ ដោយមានអាការៈទំនងជាស្រវឹងស្រាផងនោះ ។
   ក្រោយមកសមត្ថកិច្ចជំនាញបានមកធ្វើការវាស់វែងស្ទូចយករថយន្តបង្កទៅរក្សាទុកនៅការិយល័យ​ចរាចរណ៍ជើងគោករាជធានីភ្នំពេញ រង់ចាំម្ចាស់ចូលខ្លួនមកដោះស្រាយនាពេលក្រោយ ៕