adverise with khmeread Unnamed

ទិដ្ឋ​ភាព ពិធីក្រុង​ពាលី និង​ហ្វឹកហាត់​សម​លើកចុងក្រោយ ត្រៀម​បើក​ការប្រកួត​ផ្លូវការ កីឡា​ជាតិ​នៅ​ល្ងាច​ថ្ងៃ​សុក្រ​នេះ​

    ភ្នំពេញ ៖ ថ្នាក់ដឹកនាំ​ស្ថាប័ន​កីឡា​ជាតិ​ពាក់ព័ន្ធ​នានា​បាន​អញ្ជើញ​ចូលរួម​ពិធី​ក្រុង​ពាលី ដើម្បី​សុំ​សេចក្តីសុខ​ពី​ម្ចាស់ ទឹក​ម្ចាស់​ដី និង​ពិនិត្យមើល​ការហ្វឹកហាត់​សម​លើកចុងក្រោយ នៅ​ទីលាន​បាល់ទាត់​កីឡដ្ឋាន​ជាតិ កាលពី​ល្ងាច ម្សិលមិញ សម្រាប់​បើក​ការប្រកួត​កីឡា​ជាតិ​ជា​ផ្លូវការ​ដ៏​ធំ​សម្បើម​ជា​ប្រវត្តិសាស្ត្រ​លើក​ទី​១​របស់ខ្លួន ដែល​នឹង ចូលមក​ដល់ នា​ល្ងាច​ថ្ងៃ​សុក្រ​នេះ​។​

    ការសាកល្បង​បើក​ការប្រកួត​កីឡា​ជាតិ​លើកចុងក្រោយ​នេះ ត្រួតពិនិត្យ​មើល​ផ្ទា​ល់ពី​លោក ថោង ខុន ប្រធាន​គណៈកម្មាធិការ​ជាតិ​អូឡាំពិក​កម្ពុជា និង​លោក​ហង់ ជួនណា​រ៉ុ​ន រដ្ឋមន្ត្រី ក្រសួង​អប់រំ យុវជន និង​កីឡា​។ 

    ការសាកល្បង​នោះ​មានការ​បង្ហាញ​ពី​ក្បាច់​ប្រយុទ្ធ​របស់​កងយោធពល​ខេមរភូមិន្ទ​ចំនួន​២៣០ នាក់ ក្បាច់គុន​ល្បុក្កតោ​ចំនួន​២០០​នាក់ ការបង្ហាញ​កាយ​សមស្រប​របស់​គរុ​សិស្ស​នៃ​វិទ្យាស្ថាន​ជាតិ​អប់រំ​កាយ និង​កីឡា​២០០​នាក់​។ 

    ការបង្ហាញ​ពីរ​បាំ​ដែល​សម្តែង​ដោយ​ក្រុម​សិល្បៈ​ក្រសួង​វប្បធម៌​ចំនួន​២៥០​នាក់ និង​ស្គរ តូច​-​ធំ​ចំនួន​១០០​ស្គរ​។​ជាមួយគ្នានេះ​ក៏មាន​ការ​លោតឆ័ត្រ​យោង​ដោយ​ក្រុម​កងពលតូច​ពិសេស​ឆ័​ត្រ​យោង ចំនួន​៨​នាក់​ដោយ​លោត ក្នុង​កំពស់ ២,៣០០​ម៉ែត្រ ដែល​នាំ​ទង់ជាតិ​កម្ពុជា​ចំនួន​២​ទង់​កីឡា​ជាតិ​ចំនួន​២ និង ទង់​អូឡាំពិក​ចំនួន​២ និង​អ្នក​លោត​អម​ចំនួន​២​នាក់​ទៀតផង​។​

    ការហាត់​សមនេះ ក៏មាន​ការរត់​ភ្លើង​គុប​ដោយ​កីឡាករ​ចាស់ៗ​ដូចជា​លោក កែវ ថុ​ន ដែលមាន​វ័យ​៨៨​ឆ្នាំ លោក អ៊ា​ត គឹម​ហេង វ័យ​៧៥​ឆ្នាំ លោក​តូ រិ​ទ្ធិ​យ៉ា អ្នករត់​ម៉ា​រ៉ា​តុង​ជើងចាស់ លោក សោម សារ៉ន ហៅ​មាំ​ង លោក ប៉ែន ផាត អ្នក​ទាត់​បាល់​ជើងចាស់ កីឡាការិនី កែ ឡេង ម្ចាស់​មេដាយមាស​ប៉េតង់​ពិភពលោក និង កីឡាការិនី ស៊ន សៀវ​ម៉ី ម្ចាស់​មេដាយមាស​តេ​ក្វាន់​ដូ​អាស៊ី​ដែលជា​អ្នក​បន្ត​យក​ភ្លើង​គុប​ទៅ​ដុត​។



    លោក វ៉ា​ត់ ចំរើន អគ្គលេខាធិការ គណៈកម្មាធិការ​ជាតិ​អូឡាំពិក​កម្ពុជា​មានប្រសាសន៍​ថា នេះ​ជា ព្រឹត្តិការណ៍​ដ៏​ធំ ដែល​ពុំ​ធ្លាប់មាន​ពីមុនមក​នៅ​កម្ពុជា ហើយក៏​ជា​ប្រវត្តិសាស្ត្រ​របស់ខ្លួន​ផងដែរ ដើម្បី​សម្រួច គោលដៅ​ដ៏​សំខាន់​មួយ ក្នុង​ដំណើរ​ឆ្ពោះទៅកាន់​ព្រឹត្តិការណ៍​កីឡា​ថ្នាក់​តំបន់​អាស៊ាន ស៊ី​ហ្គេម លើក​ទី​៣២ នា ឆ្នាំ​២០២៣ ខាងមុខ ដែល​ព្រះរាជា​ណា ចក្រ​កម្ពុជា​ទទួល​ធ្វើ​ម្ចាស់ផ្ទះ​នោះ​។ 

    លោក​បាន ស្នើ​សុំឱ្យ​យុវជន និង ប្រជាពលរដ្ឋ​នានា​ចូលរួម​ទស្សនា និង​គាំទ្រ​ដោយ​សេរី និង​ឲ្យ​បាន​ច្រើន​កុះករ​។​

    សូមបញ្ជាក់ថា ព្រឹត្តិការណ៍​កីឡា​ជាតិ លើក​ទី​១​នេះ បាន​ដំណើរការ ពីថ្ងៃ​ទី​២៥​តុលា ដល់​៥​វិច្ឆិកា ដោយ គ្រោង​ចំណាយ​ថវិកាជាតិ​ប្រមាណ​១​លាន​ដុល្លារ​អាមេរិក ដោយ​លោក ហ៊ុន សែន នឹង​អញ្ជើញ​ជា​អធិបតី ដ៏​ខ្ពង់ខ្ពស់​ផងដែរ​៕

adverise with khmeread

មតិយោបល់