adverise with khmeread Untitled 1

ញាក់សាច់​! ត្រឹម ៦ ថ្ងៃ​សោះ​បេក្ខជន​ចិន​មក​ដាក់ពាក្យ​ប្រឡង​ធ្វើ​ការងារ​រដ្ឋ​មាន​ចំនួន​ជាង​កន្លះ​លាន​នាក់​ទៅហើយ​

    ​វា​មាន​រយៈពេល ៦​ថ្ងៃ​ហើយ បន្ទាប់ពី​គេ​បើក​ឱ្យ​ដាក់ពាក្យ​តាម​អន​ឡាញ​សម្រាប់​ការប្រឡង​ដ៏​ប្រកួតប្រជែង​បំផុត​របស់​ចិន នោះ​គឺ​ការប្រឡង​ជ្រើស​រើ​មន្ត្រី​ស៊ីវិល ហើយ​បេក្ខជន​ដាក់ពាក្យ​ចំនួន​ជាង ៥៣០.០០០ នាក់​បានដាក់​ពាក្យ​ដើម្បី​ប្រជែង​យក​តំណែង​ការងារ​រដ្ឋ​ចំនួន ១៤.៧០៤ កន្លែង ជាមួយ​តំណែង​ពេញនិយម​បំផុត​បាន​ទាក់ទាញ​បេក្ខជន​ដាក់ពាក្យ​ចំនួន​ជាង ២.៣០០ នាក់​។ 

​    ​ការងារ​ជាង ២៧.០០០ កន្លែង​នៅ​នាយកដ្ឋាន​និង​ទីភ្នាក់ងារ​រដ្ឋាភិបាល​ជាង ១២០ ត្រូវបាន​ផ្សព្វផ្សាយ​ក្នុង​ឆ្នាំ ២០១៦ នេះ ពោលគឺ​ធ្លាក់ចុះ​ជាង​ឆ្នាំមុន​បន្តិចបន្តួច​។ 

​    ​ស្ថិតិ​ត្រឹម​ថ្ងៃ​ព្រហស្បតិ៍​ទី​២៧​តុលា​បង្ហាញថា តំណែង​ការងារ​នៅ​បណ្តា​នាយកដ្ឋាន​រដ្ឋាភិបាលកណ្តាល និង​បណ្តា​ទីភ្នាក់ងារ​នានា គេ​ឃើញ​មានការ​ប្រជែង​យ៉ាង​ស្វិតស្វាញ ជាមួយ​តំណែង​មួយ​មាន​បេក្ខជន​ដាក់ពាក្យ​ដណ្តើម​ជា​មធ្យម ៥២ នាក់ ធៀប​នឹង ១៩ នាក់​ក្នុង​មួយ​តំណែង​នៅ​វិទ្យាស្ថាន​កម្រិត​ទាប​ផ្សេងទៀត​។ ទោះយ៉ាងណា មាន​តំណែង​ការងារ​គ្មាន​ប្រជាប្រិយភាព​ចំនួន ៨៨៥ កន្លែង​ពុំមាន​បេក្ខជន​ណា​ម្នាក់​ដាក់ពាក្យ​នោះឡើយ​។ 

​    ​លោក​ឈាវ ហុង​បូ នាយក​បណ្ឌិត្យសភា​ហូ​ទូ ជា​វិទ្យាស្ថាន​នៅ​ប៉េកាំង​មួយ​ដែលមាន​ជំនាញ​ឯកទេស​ខាង​បណ្តុះបណ្តាល​សម្រាប់​ការប្រឡង​ជ្រើសរើស​មន្ត្រី​រដ្ឋ​បាន​និយាយ "​ដោយ​គិត​ទៅដល់​ដំណើរការ​ចុះឈ្មោះ​កាលពី​ឆ្នាំមុន ចំនួន​សរុប​នៃ​អ្នក​មក​ធ្វើតេស្ត​ឆ្នាំនេះ​រំពឹង​ឡើងដល់ ១,៤ លាន​នាក់​"​។ 

​    ​ការិយាល័យ​រដ្ឋ​នៃ​មន្ត្រី​ស៊ីវិល​ចិន​បានចេញ​កំណត់សម្គាល់​មួយ​កាលពី​ថ្ងៃ​អង្គារ ដើម្បី​រំលឹក​ដល់​បេក្ខជន​ទាំងអស់​ឱ្យ "​ដាក់​ពាក្យសុំ​តំណែង​ការងារ​តាមរបៀប​សម​ហេតុ​សម​ផល​" ដោយ​ជំរុញ​ឱ្យ​ពួកគេ​ផ្ទៀងផ្ទាត់​សមត្ថភាព​របស់ខ្លួន​ទៅនឹង​លក្ខខណ្ឌ​តម្រូវ​របស់​ការងារ​នោះ​។ 

​    ​រដ្ឋាភិបាល​ចិន​បាន​និយាយថា ការប្រឡង​ជ្រើសរើស​មន្ត្រី​ស៊ីវិល​ជាតិ​ក្នុង​ឆ្នាំ ១៩៩៤ មាន​មនុស្ស​មាន​សមត្ថភាព ៤៤.០០០ នាក់​ប៉ុណ្ណោះ​មក​ដាក់​ពាក្យសុំ​តំណែង​ការងារ​ចំនួន ៤៩០ កន្លែង​។ ចំនួន​បេក្ខជន​ដាក់ពាក្យ​បាន​កើនឡើង ៣០០ ដង​ក្នុង​រយៈពេល​តែ ២ ទសវត្សរ៍ គឺ​ក្នុង​ឆ្នាំ ២០១៣ ចំនួន​បេក្ខជន​ដាក់ពាក្យ​ប្រឡង​បាន​ឡើងដល់​កម្រិត​ខ្ពស់បំផុត គឺ ១,៥ លាន​នាក់​។ អំឡុង​រយៈពេល ២ ឆ្នាំ​ចុងក្រោយ​ចំនួន​បេក្ខជន​ដាក់ពាក្យ​បាន​ធ្លាក់ចុះ​ជា​បន្តបន្ទាប់​វិញ ជាមួយ​បេក្ខជន​ដាក់ពាក្យ​ប្រឡង​មាន​ចំនួន ១,៤ លាន​នាក់​ក្នុង​ឆ្នាំ ២០១៤ និង ១,៣ លាន​នាក់​ក្នុង​ឆ្នាំ ២០១៥៕

 

adverise with khmeread
ប្រភព៖ CCTV

អ្នកនឹងចូលចិត្ត

មតិយោបល់