adverise with khmeread Couple

គូស្នេហ៍មួយគូស្ទើរក្លាយជាចំណីរបស់កុលសម្ព័ន្ធភ្នំនៅប៉ាពូអាស៊ីនូវែលហ្គីណេ

          បុរសជនជាតិអង់គ្លេស ម៉ាធូ ឡូវ៉ាន (Matthew Lovane) និង​មិត្តស្រី​ជន​ជាតិ​​អាមេរិក មីឆែល ក្លេមិន (Michelle Clemens) ដែលមាន​អាយុ​៣១​ឆ្នាំ​ដូច​គ្នា​​ស្ថិតក្នុងដំ​ណើរកម្សាន្តនៅ​ប្រទេសប៉ាពូអាស៊ីនូវែល​ហ្គីណេ ខណៈពួកគេ​ត្រូវ​បាន​ឡោម​ព័ទ្ធ​និងចាប់ពង្រត់​ដោយ​កុលសម្ព័ន្ធ​ភ្នំ​កាល​ពី​ថ្ងៃចន្ទ។

        ជនជាតិ​ដើមម្ចាស់ស្រុក​ពីរនាក់​ដៃកាន់​កាំបិត​​បានវាយនិង​សម្រាតខោ​អាវ​របស់​អ្នក​ទេសចរទាំងពីរ​ដែល​កំពុងស្ថិត​ក្នុង​សភាព​ភ័យខ្លាច មុនពេល​ចង​មុខ​​និង​នាំពួកគេចូល​ទៅ​ក្នុង​ព្រៃជ្រៅ។

        អ្នកទាំងពីរ​បាន​និយាយថា បុរសកុលសម្ព័ន្ធ​ភ្នំ​ ដែល​ម្នាក់​ក្នុងចំណោម​នោះ​ពាក់​របាំងមុខធ្វើ​ពី​ស្បែកសត្វនិង​វល្វិ៍បង្ហាញលក្ខណៈ​ជា​មនុស្ស​បុរាណមែនទែន​ ហើយ​និយាយកំបុតៗ។ ប៉ុន្តែ​អ្នក​ទាំងពីរ​និយាយថា ពួកគេចេះភាសាអង់គ្លេស​ល្មម​នឹង​និយាយ​គំរាម​​ថា “​យើងនឹងសម្លាប់​អ្នកឯងចោល”។

        ម៉ាធូ និយាយថា “យើងអាចនឹងនិយាយលេងសើច​អំពី​ក្រុមមនុស្សស៊ីសាច់​មនុស្សដ៏ល្បីល្បាញ​នៅប្រទេស​ប៉ាពូអាស៊ីនូវែលហ្គីណេ ប៉ុន្តែ​នេះ​មិន​មែន​ជា​រឿង​លេង​សើច​ទេ​នៅ​ពេល​ក្រុម​មនុស្សទាំងនេះ​ចេញមកពីក្នុង​​ព្រៃធ្វើ​ការ​ឡោម​ព័ទ្ធ​”។

ម៉ាធូ បន្តថា “ពួកគេ​មើលទៅគួរ​ឲ្យ​ខ្លាច​ក្នុងសម្លៀក​បំពាក់​ប្រពៃណី​របស់​ពួក​គេ និងមានលាភពណ៌​លើខ្លួន​ផងដែរ ហើយ​បាន​ចេញមក​ឡោម​ព័ទ្ធ​យើង​ទាំង​ពីរ​។ ពួកគេ​បាន​ហែកអាវយឺត​និងចងមុខរបស់ខ្ញុំ ហើយ​ខ្ញុំនឹកក្នុង​ចិត្ត​ភ្លាម​ថា ខ្ញុំនឹងក្លាយជា​ចំណី​របស់ពួកគេហើយ”។

        លោកនិយាយថា “ពួកគេសាហាវណាស់ ហើយ​យើងមិន​អាចធ្វើអ្វីកើត​ទេ​។ ខ្ញុំគិតថា យើងនឹង​បាត់ខ្លួន​នៅ​ក្នុងព្រៃនេះ ហើយ​លែងបានឃើញ​ពិភពលោក​នេះទៀតហើយ”។ ករណី​មនុស្ស​ស៊ីសាច់មនុស្ស​នៅក្នុងប្រទេស​ជាកោះ ប៉ាពូ​នូវែល​ហ្គីណេ​នៅ​មហាសមុទ្រ​ប៉ាស៊ីហ្វិកនេះ​ ត្រូវ​បានគេរាយការណ៍​ថ្មីបំផុតកាល​ពីឆ្នាំ​២០១២។ ជនជាតិដើម​ម្ចាស់ស្រុក​ខ្លះ​ ត្រូវគេជឿថា នៅអនុវត្តប្រពៃណី​ស៊ី​ខួរ​​សាច់ញាតិរបស់​ពួកគេនៅក្នុងពិធីបុណ្យសព។

        គូស្នេហ៍មួយគូនេះបាន​ជួល​ជនជាតិ​ដើមម្នាក់ដើម្បីជួយ​លី​អ៊ីវ៉ាន់​របស់​ខ្លួន​សម្រាប់​ដំណើរកម្សាន្ត​នេះ ប៉ុន្តែ​បុរសម្នាក់នោះបានចាកចេញទៅ​មួយថ្ងៃ​មុន​ថ្ងៃ​បញ្ចប់​​នៃដំណើរកម្សាន្ត​នេះ​។ ​ពួកគេជឿថា បុរសម្នាក់នេះបានក្បត់នឹងពួកគេ។

        អ្នកទាំងពីរ​បាន​ព្យាយាម​រត់គេច ប៉ុន្តែ​បរាជ័យ បន្ទាប់ពី​ជាប់ជាមួយវល្លិ៍ ហើយ​បន្តិចក្រោយម​ក​ត្រូវបានចាប់ខ្លួនឡើងវិញ។ ខណៈត្រូវ​គេចង់មុខ​និង​ឃុំ​ខ្លួន​នៅក្នុង​ព្រៃដែលសម្បូរសត្វពស់​នោះ អ្នកទាំងពីរ​បាន​ក្លាយ​ជាកម្មវត្ថុ​នៃ​​ល្បែង ​ទារុណ​កម្មផងដែរ។

        នៅទីបំផុតអ្នកទាំងពីរ​បាន​គេចខ្លួន​ពីអ្នកចាប់បង្ខាំង ខណៈ​ពួកគេកំពុង​ធ្វើ​ដំណើរ​តាមជួរភ្នំត្រឡប់​មក​រកផ្លូវវិញ។ ទោះបីជាយ៉ាង ការគេចខ្លួន​របស់​ពួក​គេ​មិន​បាន​​ធ្វើឡើងតាមផ្លូវត្រង់ទេ ខណៈ​ពួកគេជួបប្រទះ​ឆ្កែព្រៃ​និង​ប្រឈម​មុខ​នឹង​រុក្ខជាតិមានពិសផ្សេងៗទៀត។

        ប៉ុន្តែ​សំណាងល្អ អ្នកទាំងពីរ​បាន​ប្រទះឃើញ​បុរសម្នាក់​កំពុង​សង់កូនខ្ទម​នៅ​ក្បែរ​ចុងផ្លូវ ហើយ​បាន​ស្រែកឲ្យជួយ។​ ក្រុម​អ្នកភូមិ​បាន​រត់​ទៅជួយ​ដោយ​យក​ភួយទៅជាមួយផង ហើយបន្ទាប់មកត្រូវបានដឹកតាមឧទ្ធម្ភាគចក្រ​មក​ទីក្រុង Port Moresby ជាកន្លែងដែលអ្នក​ទាំងពីរ​កំពុងទទួលការព្យាបាល៕

 

adverise with khmeread
ប្រភព៖ ដឹសាន់

មតិយោបល់