adverise with khmeread Janardhan reddy collage2

អ្នកនយោបាយ​ឥណ្ឌា​ចំណាយ​ជិត ៨០ លាន​ដុល្លារ​រៀប​ការឱ្យ​កូនស្រី គ្រាន់តែ​សំបុត្រ​អញ្ជើញ​ក៏​ស្រោប​មាស​ដែរ​

    ​ពិធីមង្គលការ​ដែល​ចំណាយលុយ​យ៉ាង​ខ្ជះខ្ជាយ​របស់​កូនស្រី​អ្នកនយោបាយ​ឥណ្ឌា​ម្នាក់ បាន​បង្ក​ឱ្យ​មនុស្ស​ជាច្រើន​នៅក្នុង​ប្រទេស​មាន​កំហឹង​ចំពេល​ប្រទេស​កំពុងមាន​វិបត្តិ​លំហូរ​សាច់ប្រាក់ បន្ទាប់ពី​រដ្ឋាភិបាល​ឥណ្ឌា​បានប្រកាសថា ខ្លួន​នឹង​ឈប់​ប្រើ​ក្រដាស់ប្រាក់ ៥០០ និង ១០០០ រូពី​។​

​    ​កាសែត BBC បាន​រាយការណ៍​ថា មង្គលការ​រយៈពេល​ប្រាំ​ថ្ងៃ​របស់​កូនក្រមុំ Brahmani ដែលជា​កូនស្រី​របស់​អ្នកជំនួញ និង​អតីតរដ្ឋមន្ត្រី​រដ្ឋ Karnataka គឺ​លោក G. Janardhana Reddy ត្រូវបាន​ប៉ាន់ស្មាន​មានតម្លៃ​ប្រហែល ៧៤ លាន​ដុល្លារ ជាមួយ​សំបុត្រ​អញ្ជើញ​សុទ្ធតែ​ស្រោបមាស និង​តារា​បូលីវូដ​មួយចំនួន​ត្រូវបាន​រំពឹងទុក​ថា នឹងចូលរួម​សម្តែង​ក្នុង​ពិធី​នេះ​ផងដែរ​។​

​    ​ក្រុម​អ្នក​រិះគន់​បាន​រិះគន់​យ៉ាង​ចាស់ដៃ​ចំពោះ​ការបង្ហាញ​ភាពមានបាន​ដ៏​គួរឱ្យ​រអើម​នៅពេល​ប្រជាជន​ឥណ្ឌា​រាប់លាន​នាក់​បាន​ឈរ​តម្រង់​ជួរ​នៅតាម​ធនាគារ និង​ម៉ាស៊ីន ATM ដើម្បី​ប្តូរ​លុយ​ដែល​រដ្ឋាភិបាល​ប្រកាស​ខាងលើ ឬក៏​ដក​លុយ​ទាំងអស់​សង្ឃឹម​។ ការហាមឃាត់​ក្រដាស់ប្រាក់ ៥០០ និង ១០០០ រូពី​នេះ​គឺធ្វើឡើង​ក្នុង​បំណង​បង្ក្រាប​លើ​អ្នកមាន​ដែល​មិន​ប្រកាស​ទ្រព្យសម្បត្តិ និង​ដើម្បី​ទប់ស្កាត់​អំពើពុករលួយ​។​

​    ​មនុស្ស​ជាច្រើន​បានដាក់​មន្ទិលសង្ស័យ​ពី​របៀប​ដែល​លោក Reddy ដែលជា​អតីត​សមាជិក​គណបក្ស Bharatiya Janata Party របស់លោក​នាយករដ្ឋមន្ត្រី Narendra Modi ដែល​ត្រូវបាន​ចាប់ខ្លួន​កាលពី​ថ្ងៃទី ៥ ខែកញ្ញា ឆ្នាំ ២០១១ និង​បាន​ចំណាយពេល​បួន​ឆ្នាំ​នៅក្នុង​គុក​ដោយសារ​ប្រព្រឹត្តិ​អំពី​ពុករលួយ មុននឹង​ត្រូវបាន​ដោះលែង​ឱ្យនៅ​ក្រៅ​ឃុំ​កាលពី​ឆ្នាំមុន អាចមាន​លុយ​ចំណាយ​សន្ធឹកសន្ធាប់​សម្រាប់​ពិធី​មង្គល​នេះ​យ៉ាងដូចម្តេច​។​

​    ​ប៉ុន្តែ​លោក Reddy បាន​និយាយថា លោក​បាន​លក់​ផ្ទះ​ច្រើន​កន្លែង​នៅ​សិង្ហ​បុរី និង​នៅ​ទីក្រុង Bengaluru ដើម្បី​រៃអង្គាស​លុយ​សម្រាប់​មង្គល​ការ​នេះ ហើយ​រាល់​ការចំណាយ​ត្រូវបាន​គ្រោងទុក​កាលពី​ប្រាំ​មួយខែ​មុន​នៅពេល​គម្រោង​បានចាប់ផ្តើម​។​

​    ​BBC បាន​បាន​រាយការណ៍​ទៀតថា ប៉ុន្តែ​ការលើកឡើង​នេះ​មិនបាន​បញ្ឈប់​កំហឹង​របស់​ប្រជាជន​ឥណ្ឌា​ដោយ​នាំគ្នា​រិះគន់​នៅលើ​បណ្តាញ​សង្គម​ឡើយ ខណៈដែល​គូប្រជែង​នយោបាយ​របស់លោក Reddy បាន​ចោទ​ជា​សំណួរ​ថា​តើ​គោលនយោបាយ​ជំរុញ​ការលុបបំបាត់​លុយ​ពុករលួយ​របស់​នាយក​រដ្ឋមន្ត្រី Modi បានរួម​បញ្ចូល​មន្ត្រី​កំពូល​មានអំណាច​ឬក៏​អត់​។​

​    ​ការរៀបចំ​សម្រាប់​ពិធីមង្គលការ​នេះ ដែល​កំពុង​ប្រព្រឹត្តិ​ឡើង​នៅ​ដំណាក់ Bangalore Palace បានចាប់ផ្តើម​យ៉ាង​ល្អិតល្អន់​អស់​ជាច្រើន​ខែ ជាមួយ​អ្នកដឹកនាំ​រឿង​បូលីវូដ​ចំនួន​ប្រាំ​បីនាក់​ចូលរួម​ក្នុង​ពិធី​នេះ​ដើម្បី​បង្កើត​ឈុត​ឆាក​ដែល​ស្រដៀង​នឹង​ប្រាសាទបុរាណ​ហិណ្ឌូ កន្លែង​ដែល​ពិធី​នានា​ប្រព្រឹត្តឡើង​។​

​    ​រទេះគោ​ដ៏​ប្រណិត​នឹងត្រូវ​បាន​ប្រើប្រាស់​ដើម្បី​ដឹក​ភ្ញៀវ​ពី​ច្រកចូល​ដំណាក់​ទៅកាន់​កន្លែង​ប្រារព្ធ​ពិធី​រៀបការ​។ ភ្ញៀវ​ទាំងអស់​នឹង​ទទួលទាន​អាហារ​នៅ​ភូមិ​មួយ​ដែល​ត្រូវបាន​បង្កើតឡើង​យ៉ាង​ពិសេស​នៅ​ភូមិគ្រឹះ​សម្រាប់​ពិធីមង្គលការ​នេះ​។​

​    ​ឈុត​កូនក្រមុំ​គឺមាន​តម្លៃ​ប្រមាណ ២,៥ លាន​ដុល្លារ និង​ចិញ្ចៀនពេជ្រ​មានតម្លៃ ១២,៥ លាន​ដុល្លារ​។​

​    ​ពិធី​រៀបការ​នេះ​បានចាប់ផ្តើម​នៅ​ថ្ងៃទី ១៥ វិច្ឆិកា​រហូតដល់​ថ្ងៃទី ១៩ វិច្ឆិកា​៕

ប្រភព៖ StraitsTimes DailyMail
adverise with khmeread

អ្នកនឹងចូលចិត្ត

មតិយោបល់