adverise with khmeread Untitled 1

ស្នាដៃ​ធំៗ​ដែល​មិនអាច​បំភ្លេចបាន​!!! មេបញ្ជាការ​អាវុធហត្ថ​ក្រុង​វេរ​លុយ​លើកទឹកចិត្ត ​១០ ​លាន​រៀល​ និង​ចំណាយ​ធ្វើ​បុណ្យសព ​កែវ កញ្ញា ​ទាំងស្រុង​

    ភ្នំពេញ ៖ ស្នាដៃ​បង្ក្រាប​ករណី​ឃា​កម្ម​សម្លាប់​នារី​ម្នាក់​យក​សព​ទៅ​បោះចោល​នៅ​គំនរ​សំរាម របស់​អាវុធហត្ថ​រាជធានី​ភ្នំពេញ​ថ្មីៗ​នេះ, នា​ព្រឹ​ក​ថ្ងៃអាទិត្យ​ម្សិលមិញ​ម្ចាស់​ក្លឹប៥៥ ​ដែលជា​ថៅកែ​របស់​នារី​រងគ្រោះ បាន​ចាត់​លោក សឹង កុសល ​ជា​តំណាង​ក្លឹប​នាំយក​ថវិកា​លើកទឹកចិត្ត ចំនួន ​១០ ​លាន​រៀល ទៅ​ប្រគល់ជូន​កងរាជអាវុធហត្ថ​រាជធានី​ភ្នំពេញ ដើម្បី​សម្ដែង​ពី​ការកោតសរសើរ​ដែល​អាវុធហត្ថ​រាជធានី​ភ្នំពេញ​បំបែកសំណុំរឿង​បាន​ឆាប់រហ័ស និង​ចាប់​ឃាតករ​បាន​យកមក​ផ្តន្ទាទោស​។​

    តែ​ដោយ​ទឹកចិត្ត​អាណិតអាសូរ​ប្រកបដោយ​ក្តីមេត្តា លោក​ឧ​ត្ត​ម​សេនីយ៍​ឯក រ័ត្ន ស្រ៊ាង មេបញ្ជាការរង​កងរាជអាវុធហត្ថ​លើ​ផ្ទៃ​ប្រទេស និង​ជា​មេបញ្ជាការ កងរាជអាវុធហត្ថ​រាជធានី​ភ្នំពេញ បាន​សម្រេចយក​ថវិកា​លើកទឹកចិត្ត​ផ្តល់​មក​អាវុធហត្ថ​ទាំង​ ១០ ​លាន​រៀល លោក​បាន​បង្វែរ​ប្រាក់​នេះ​ជូនទៅ​គ្រួសារ​សព​នារី​រងគ្រោះ​វិញ សម្រាប់​ឱ្យ​ពួកគាត់​យកទៅ​រៀបចំ​ជីវភាព​គ្រួសារ ព្រមទាំង​បាន​ស្រាវជ្រាវ​យក​ម៉ូតូ​,​ ទូរស័ព្ទ​,​ ចិ​ញ្ជៀ​ន​, ​ខ្សែក របស់​ជនរងគ្រោះ​ត្រឡប់មកវិញ រួច​ប្រគល់ជូន​ពួកគាត់​ផងដែរ​។​

    ដោយឡែក​ក្រៅពី​លើកទឹកចិត្ត​ដ៏​ច្រើន​ខាងលើនេះ អាវុធហត្ថ​រាជធានី​ភ្នំពេញ​វេរ​ថវិកា ​១០​ លាន​រៀល និង​ម្ចាស់​ក្លឹប​៥៥ ក៏បាន​ឧបត្ថម្ភ​ថវិកា​១០ ​លាន​រៀល​ជូន​ដល់​គ្រួសារ​សព​ជនរងគ្រោះ​ដូចគ្នា សរុប​ទាំងអស់​ ២០ ​លាន​រៀល​ថែមទាំង​បានរៀបចំ​ចំណាយ​បុណ្យសព​ជូន​ជនរងគ្រោះ​រហូតដល់​ចប់​ចុង​ចប់​ដើម។​

    បន្ទាប់ពី​បានប្រគល់​ថវិកា​ និង​សម្ភារៈ​ជូន​ក្រុមគ្រួសារ​នារី​រងគ្រោះ​រួចហើយ នៅ​ព្រឹក​ថ្ងៃទី​២០ ​ខែវិច្ឆិកា ​ឆ្នាំ​២០១៦​ ដ​ដែលសមត្ថកិច្ច​ជំនាញ​នៃ​កងរាជអាវុធហត្ថ​រាជធានី​ភ្នំពេញ បាន​បញ្ជូន​ជនសង្ស័យ​ឈ្មោះ យ៉េន សុ​បញ្ញា អាយុ​២០​ឆ្នាំ ដែលជា​ឃាតករ​សម្លាប់​នារី​រងគ្រោះ​ឈ្មោះ កែវ កញ្ញា អាយុ​១៩​ឆ្នាំ ​ជា​បុគ្គលិក​ក្លឹប​៥៥ ​ទៅកាន់​តុលាការ​រាជធានី​ភ្នំពេញ​ដើម្បី​ផ្តន្ទាទោស​តាមច្បាប់។​

    ក្រោយពី​ការស្រាវជ្រាវ​យ៉ាង​ល្អិតល្អន់​របស់​សមត្ថកិច្ច​កងរាជអាវុធហត្ថ​រាជធានី​ភ្នំពេញ ក៏ដូចជា​ចម្លើយសារភាព​របស់​ជ​ន​ល្មើស ឈ្មោះ​ យ៉េន ​សុ​បញ្ញា ​បាន​បញ្ជាក់ថា​រូបគេ​ពិតជា​បានសម្លាប់​នារី​រងគ្រោះ ដោយ​ផ្ទាល់ដៃ​តែម្នាក់ឯង​ពិតប្រាកដ​មែន។ ​ទង្វើ​នោះ​គឺ​ដោយសារ​ឥទ្ធិពល​ថ្នាំញៀន ទើប​ធ្វើឱ្យ​ឃាតករ​ចិត្តដាច់​គ្មាន​មនោសញ្ចេតនា​ និង​ក្តីមេត្តា​នៅក្នុង​ខ្លួន​ដូច្នេះ​។ ដើម្បី​បញ្ជាក់​ការពិត សមត្ថកិច្ច​កងរាជអាវុធហត្ថ​រាជធានី​ភ្នំពេញ ក៏បាន​នាំ​ឃាតករ​ទៅធ្វើ​សកម្មភាព​ត្រាប់​ឡើងវិញ ដល់​កន្លែងកើតហេតុ​ទៀតផង​។​

    រឿង​ដែល​គួរឱ្យកត់សម្គាល់​មួយទៀត​ឃើញថា កន្លងមក​ឃាតកម្ម​អាថ៌កំបាំង​ដែល​យក​សព​ទៅ​ផ្លុ​ង​ចោល នៅតាម​គំនរ​សំរាម​ក្នុង​រាជធានី​ភ្នំពេញ តែងតែ​ត្រូវបាន​កងរាជអាវុធហត្ថ​រាជធានី​ភ្នំពេញ​បំបែកសំណុំរឿង​បានជា​បន្តបន្ទាប់ ដោយ​មិន​ទុកឱ្យ​ឃាតករ​រស់​ក្រៅ​សំណាញ់​ច្បាប់​បានឡើយ។​

    ជាក់ស្តែង​កាលពី​ថ្ងៃទី​១៤​ តុលា ​ឆ្នាំ​២១០៦​កន្លងទៅនេះ មាន​ប្រជាពលរដ្ឋ​បាន​ប្រទះឃើញ​សព​បុរស​ម្នាក់​មិន​ស្គាល់​អត្តសញ្ញាណ​ ត្រូវបាន​គេ​ផ្លុ​ង​ចោល​ក្នុង​ប្រឡាយ​ចាក់សំរាម​ដោយ​ចង​ផ្អោប​ជាមួយ​ដុំថ្ម​ធំ នៅ​ចំណុច​តាម​បណ្តោយ​ផ្លូវលំ​ខាងក្រោយ​សួន​កាណាឌីយ៉ា ក្នុងភូមិ​ត្រពាំង​ថ្លឹង សង្កាត់​ចោមចៅ ខណ្ឌ​ពោធិ​សែន​ជ័យ រាជធានី​ភ្នំពេញ​។​

    បន្ទាប់មក​ក៏ត្រូវ​អាវុធហត្ថ​រាជធានី​ភ្នំពេញ​ក្នុង​ខណ្ឌ​ពោធិ​សែន​ជ័យ ឃាត់ខ្លួន​ជនដៃដល់​បាន​យកមក​ផ្តន្ទាទោស​តាមច្បាប់​នៅ​ថ្ងៃទី​២០​ តុលា ​ឆ្នាំ​២០១៦។ មូលហេតុ​នៃ​ឃាតកម្ម​គឺ​ប្លន់​យក​រថយន្ត​ទេសចរណ៍​១២​កៅអី​មួយគ្រឿង និង​ទ្រព្យសម្បត្តិ​ជាប់​ខ្លួន​មួយចំនួន​។​

    ករណី​មួយទៀត​កាលពី​ថ្ងៃទី​២៣ ​ឧសភា ​ឆ្នាំ​២០១៥ សព​បុរស​មិន​ស្គាល់​អត្តសញ្ញាណ​ម្នាក់​ច្រក​ក្នុង​ការុង​ត្រូវគេ​ប្រទះឃើញ នៅលើ​គំនរ​សំរាម​ស្ថិតនៅតាម​បណ្តោយ​ផ្លូវ​លេខ​៣៧១ ភូមិ​អូរ​បែកក្អម សង្កាត់​ទឹកថ្លា ខណ្ឌ​សែន​សុខ រាជធានី​ភ្នំពេញ ហើយ​ត្រូវបាន​អាវុធហត្ថ​រាជធានី​ភ្នំពេញ បំបែក​អាថ៌កំបាំង ស្វែងរក​ចាប់ខ្លួន​ជនដៃដល់​បាន នៅ​ថ្ងៃទី​២៧​ ឧសភា ​ឆ្នាំ​២០១៥ រួច​បញ្ជូនទៅ​តុលាការ​ផ្តន្ទាទោស តាមច្បាប់​។ មូលហេតុ​នៃ​ឃាតកម្ម គឺ​ប្លន់​យក​រថយន្ត​មួយគ្រឿង និង​ទ្រព្យសម្បត្តិ​ជាប់​ខ្លួន​មួយចំនួនធំ​។​

    ការប្រឹងប្រែង​របស់​ស​ម​ត្ថ​កិច្ច​អាវុធហត្ថ​រាជធានី​ភ្នំពេញ បានបង្ហាញ​ឱ្យឃើញ​ពី​ការទទួលខុសត្រូវ​ចំពោះ​តួនាទី​ភារកិច្ច​របស់ខ្លួន ផ្តល់​ភាពកក់ក្តៅ​ដល់​ប្រជាពលរដ្ឋ បើទោះបី​ពួកគាត់​ត្រូវ​លះបង់​កម្លាំងកាយ កម្លាំងចិត្ត ថវិកា និង​ពេលវេលា​ទាំងយប់​ទាំង​ថ្ងៃ ក៏​ពួកគាត់​មិនដែល​ត្អូញត្អែ​ឡើយ៕

adverise with khmeread

មតិយោបល់