adverise with khmeread 1 %281%29

ក្រុមហ៊ុន​ចែកចាយ​ផលិតផល​ប្រើប្រាស់ TSNR អះអាងថា​លក់​កើនឡើង​រៀងរាល់ឆ្នាំ​

    ភ្នំពេញ ៖ ក្រុមហ៊ុន​ចែកចាយ​ផលិតផល​ប្រើប្រាស់ ​TSNR មើលឃើញថា​ជីវភាព​ប្រជាពលរដ្ឋ​កម្ពុជា មានការ​រីកចម្រើន ហើយ​ក្រុមហ៊ុន​គ្រោង​នឹង​ផលិត​បន្ថែម​ផលិតផល ដែលមាន​គុណភាព និង​តម្លៃ​មធ្យម ដើម្បីឱ្យ​សមស្រប​ទៅតាម​តម្រូវការ​របស់​ប្រជាជន​កម្ពុជា។​

    លោក ថៃ ប៊ុណ្ណា អគ្គនាយករង​ក្រុមហ៊ុន TSNR មាន​លើកឡើងថា ក្រោម​ការដឹកនាំ​យ៉ាង​យកចិត្តទុកដាក់ ពី​ប្រមុខ​រាជរដ្ឋាភិបាល​កម្ពុជា សម្តេច​អគ្គមហាសេនាបតី​តេ​ជោ ហ៊ុន សែន ចំណូល​របស់​ប្រជាជន​កម្ពុជា កំពុងមាន​ការរីកចម្រើន ឈានទៅរក​ចំណូល​កម្រិត​មធ្យម ដូច្នេះហើយ​ប្រជាជន ត្រូវការ​ផលិតផល​មួយ ដែលមាន​ម៉ាក​យីហោ​ច្បាស់លាស់ ប្រកបដោយ​សេចក្តីទុកចិត្ត ហេតុដូចនេះ ក្រុមហ៊ុន​របស់លោក គ្រោង​នឹង​ពង្រីក​ការលក់​ទៅកាន់​ទីជនបទ ក្នុងនោះ​ក្រុមហ៊ុន ក៏មាន​គម្រោង​ផលិត​បន្ថែម​​នូវ​ផលិតផល ដែលមាន​គុណភាព​ខ្ពស់ និង​តម្លៃ​មធ្យម ដើម្បី​តម្រូវ​ទៅតាម​ការចង់បាន របស់​ប្រជាជន​កម្ពុជា​។​

    លោក​អគ្គនាយករង​ក្រុមហ៊ុន TSNR ដែលជា​ក្រុមហ៊ុន​នាំចូល ផលិតផល​ម៉ាក​យីហោ មកពី​ប្រទេស​ជប៉ុន ផលិតឡើង​នៅក្នុង​ប្រទេស​ថៃ ​និង​ប្រទេស​ជប៉ុន បានលើកឡើង​នៅក្នុង​ពិធី​ជួបជុំ​ក្រុមអាជីវករ​ជាង ​២០០​ នាក់ ដែល​ប្រារព្ធ​ឡើង​នា​ល្ងាច​ថ្ងៃទី​២៦ ខែ​វិច្ឆិកា ឆ្នាំ​២០១៦ នៅ​វិមាន​ពិភពថ្មី​សែន​សុខ​។​

    លោក ថៃ ប៊ុណ្ណា បាន​បញ្ជាក់ដែរថា ឆ្លងកាត់​បទពិសោធន៍​រកស៊ី​ជាច្រើន​ឆ្នាំ នៅក្នុង​ប្រទេស​កម្ពុជា លោក​សង្កេតឃើញថា ដំណើរការ​រកស៊ី​នៅ​កម្ពុជា មាន​ភាពល្អប្រសើរ ជាក់ស្តែង​ចំនួន​នៃ​ការលក់​ផលិតផល នៃ​ក្រុមហ៊ុន​របស់លោក មានការ​កើនឡើង​ពី​៥​ទៅ​១០​ភាគរយ ជា​រៀងរាល់ឆ្នាំ​។​

    សូមបញ្ជាក់ថា  ក្រុមហ៊ុន TSNR ​បាន​នាំចូល​ផ្តាច់មុខ​នូវ​ផលិតផល​ដូចជា សាប៊ូម្សៅ​ម៉ាក​ប្រូ ​(PRO), សាប៊ូ​ដុស​ខ្លួន​ម៉ាក​ស៊ូ​គូ​ប៊ូ​ត​ស៊ុ​(SHOKUBUTSU),​ សាប៊ូ​និង​ម្ស៉ៅ​កូនក្មេង​ម៉ា​កកូ​ដូ​ម៉ូ ​(KODOMO),​ តែ​និង​កាហ្វេ​ស​សម្រក​រាង​ហ្វី​ត​ណេ ​(FITNE)...៕


 

adverise with khmeread

មតិយោបល់