នៅ​វៀតណាម មាន​មណ្ឌល​បណ្តុះ​ក្មេង​ឱ្យ​ក្លាយជា​អ្នកប្រាជ្ញ ហើយ​មាន​ធានា​សងលុយ​វិញទៀត បើ​ក្មេង​មិន​ក្លាយជា​អ្នកប្រាជ្ញ​!

    ​មជ្ឈមណ្ឌល​ហ្វឹកហ្វឺន​ជាច្រើន​ដែល​អះអាងថា មាន​ជំនាញ​ខាង​បណ្តុះបណ្តាល​ក្មេងៗ​ឱ្យ​ឆ្លាត​វៃ​តាម​វិធីសាស្ត្រ​ធ្វើឱ្យ​សកម្ម​ខួរក្បាល​ផ្នែក​កណ្តាល កំពុង​កើនឡើង​ច្រើន​នៅ​ប្រទេស​វៀតណាម ដោយ​ទាក់ទាញ​អាណាព្យាបាល​ជាច្រើនរូប ជាមួយ​ការ​សន្យាថា​នឹង​ប្រែក្លាយ​កូនៗ​របស់​ពួកគេ​ឱ្យទៅជា​អ្នកប្រាជ្ញ​។​

​    ​មជ្ឈមណ្ឌល​ប្រភេទ​នេះ​ជាច្រើន​ត្រូវបាន​បង្កើតឡើង​នា​ប៉ុន្មាន​ខែ​ចុងក្រោយ ដោយ​ឆ្លៀតឱកាស​ក្តាប់​យក​សក្តានុពល​ពី​ឪពុកម្តាយ​ជាច្រើន ដែល​ប្រាថ្នា​ឱ្យ​កូនៗ​ក្លាយជា​មនុស្ស​ឆ្លាត​ក្នុង​រយៈពេល​ដ៏​ខ្លី​។​

​    ​អ្នកស៊ើប​ការណ៍​របស់​កាសែត​យុវជន​វៀតណាម Tuoi Tre ម្នាក់​បាន​លាតត្រដាង​ថា ទីតាំង​ហ្វឹកហ្វឺន​ឱ្យទៅជា​អ្នកប្រាជ្ញ​ទាំងនេះ​មាន​ទីតាំង​ភាគច្រើន​ស្ថិតនៅ​ទីក្រុង​ហូជីមិញ និង​ហាណូយ ដោយ​សន្យា​ទទួលបាន​លទ្ធផល​គួរ​ជាទី​រំពឹង សូម្បី​ទើប​រៀន​បាន​មួយ​វគ្គ​ក៏ដោយ​។​

​    ​យោងតាម​ការផ្សព្វផ្សាយ​របស់​ពួកគេ​ឱ្យដឹងថា អ្នកសិក្សា​ទាំងអស់​អាច​អាន​លេខ និង​ពណ៌ លេងអុក ជិះ​កង់ និង​ធ្វើ​រឿង​ដទៃទៀត​ជាមួយ​ភ្នែក​បិទ​ជិត​ដោយ​ប្រើ​វិធីសាស្ត្រ​ធ្វើឱ្យ​ខួរក្បាល​ផ្នែក​កណ្តាល​មាន​ភាព​សកម្ម ហៅថា "Midbrain Activation"​។​

​    ​មជ្ឈមណ្ឌល​ទាំងនោះ​ប្រកាសថា នៅ​កម្រិត​ខ្ពស់ ក្មេងៗ​នឹង​អាច​មើល​ដឹងចិត្ត​មនុស្ស និង​ពង្រឹង​ល្បឿន​អាន និង​ការចងចាំ​របស់​ពួកគេ​ដល់​ទៅ ១០០ ដង​។​

​    ​រីឯ​វគ្គ​សិក្សា​វិញ​មានតម្លៃ​ចាប់ពី ៣៩៨ ដុល្លារ​ទៅ ៥៣០ ដុល្លារ ជាមួយ​មជ្ឈមណ្ឌល​ខ្លះ​ធានា​សងលុយ​វិញ​ប្រសិនបើ​ការសន្យា​មិនអាច​សម្រេចបាន​។​

​    ​ម្តាយ​ម្នាក់​មកពី​ខេត្ត Lam Dong បាន​ប្រាប់​កាសែត​ខាងលើ​ថា គាត់​បាន​ចុះឈ្មោះ​ឱ្យ​កូន​គាត់​ចូលរៀន​ក្នុង​ទីក្រុង​ហូជីមិញ​នៅ​តម្លៃ​បញ្ចុះ ១៣៣ ដុល្លារ ប៉ុន្តែ​គាត់​មិនបាន​កត់សម្គាល់​ការផ្លាស់​ប្តូរ​អ្វី​ឡើយ​។ ផ្ទុយទៅវិញ​កូន​គាត់​មានតែ​ងងុយដេក​ដោយសា​រ​ការបង្រៀន​ឱ្យស្តាប់​តន្ត្រី​។​

​    ​ទោះយ៉ាងណា មន្ត្រីជាន់ខ្ពស់​នៃ​មន្ទីរពេទ្យ​កុមារ​វៀតណាម​លោក Thanh Ngoc Minh បាន​និយាយថា វិធីសាស្ត្រ​ខាងលើ​មិនបាន​បង្កើន​កម្រិត IQ  ឬក៏​សមត្ថភាព​គិត​របស់​ក្មេងៗ​ឡើយ​៕

1 adverise with khmeread

អ្នកនឹងចូលចិត្ត

មតិយោបល់