adverise with khmeread Woman 865021

ចង់ឱ្យ​ជីវិត​សុខ​ស្រួល​ពិតប្រាកដ​, អ្នក​ត្រូវ​សួរ​ខ្លួនឯង​ថា "​តើ​ការឈឺចាប់​បែបណា​ដែល​អ្នក​ចង់បាន​?"

    ​មនុស្ស​គ្រប់គ្នា​តែងតែ​ចង់បាន​នូវ​អ្វីដែល​ធ្វើឱ្យមាន​អារម្មណ៍ល្អ​។ មនុស្ស​គ្រប់រូប​តែង​ចង់បាន​ជីវិត​ដែល​គ្មាន​កង្វល់ រីករាយ ងាយស្រួល មាន​សេ​ក្តី​ស្នេហា មាន​សិច​និង​ទំនាក់ទំនង​ដ៏​អស្ចារ្យ មើលទៅ​ល្អឥតខ្ចោះ អាច​រកលុយ​បាន​ស្រួល មានកេរ្តិ៍ឈ្មោះ ទទួលបាន​ការគោរព និង​មានការ​កោតសរសើរ​។

​    ​មនុស្ស​គ្រប់គ្នា​គឺ​សុទ្ធតែ​ចង់បាន​អ​ញ្ជឹ​ង ហើយ​វា​ងាយស្រួល​ទេ​ដែល​គិត​រឿង​អ​ញ្ជឹ​ងៗ​។

​    ​ប្រសិនបើ​មាន​គេ​សួរថា តើ​អ្នក​ចង់បាន​អ្វី​ពី​ជីវិត​របស់​អ្នក​? អ្នក​ច្បាស់​ជា​ឆ្លើយថា "​ខ្ញុំ​ចង់​រីករាយ និង​មានគ្រួសារ​ដ៏​អស្ចារ្យ ព្រមទាំង​ការងារ​ដែល​ខ្ញុំ​ចូលចិត្ត​"​។ ចម្លើយ​បែបនេះ​គឺ​គេ​ឭ​គ្រប់​ទីកន្លែង ដូច្នេះ​វា​គ្មាន​ន័យ​អ្វី​ទាំងអស់​។

​    ​សំណួរ​ដែល​គួរឱ្យ​ចាប់អារម្មណ៍ និង​ជា​សំណួរ​ដែល​អ្នក​ប្រហែលជា​មិន​ធ្លាប់​នឹក​ដល់​ពីមុន​គឺ "​តើ​ការឈឺចាប់​បែបណា​ដែល​អ្នក​ចង់បាន​?" "​តើ​អ្វី​ទៅ​ដែល​អ្នកមាន​ឆន្ទៈ​នឹង​តស៊ូ​?" ព្រោះ​សំណួរ​នេះ​គឺជា​កក្តា​កំណត់​ដ៏​អស្ចារ្យ​ពី​របៀប​ដែល​ជីវិត​របស់​យើង​អាច​ប្រែ​ក្លាយទៅជា​ល្អប្រសើរ​បាន​។

​    ​គ្រប់គ្នា​សុទ្ធតែ​ចង់បាន​ការងារ​ដ៏​អស្ចារ្យ និង​ម្ចាស់ការ​លើ​រឿង​លុយកាក់ ប៉ុន្តែ​គ្មាន​នរណាម្នាក់​ចង់​ធ្វើការ ៦០ ម៉ោង​ពេញ​មួយ​សប្តាហ៍ ចេញទៅ​ធ្វើការ​តាមផ្លូវ​ឆ្ងាយ ពិនិត្យ​ឯកសារ​ដ៏​ច្រើន និង​ឡើង​ឋានៈ​តាម​ឋានានុក្រម​ដ៏​លំបាក​នោះទេ​។ មនុស្ស​ចង់​ក្លាយជា​អ្នកមាន​ដោយ​គ្មាន​ហានិភ័យ និង​ដោយ​គ្មាន​ការលះបង់ ដែល​នេះ​សុទ្ធសឹងតែ​ជា​កក្តា​ចាំបាច់​ដើម្បី​ឈានទៅ​បង្កើត​ទ្រព្យសម្បត្តិ​។

​    ​ជាក់ស្តែង បើ​និយាយ​អំពី​សិច​ដ៏​អស្ចារ្យ និង​ទំនាក់ទំនង​ស្នេហា​ដ៏​អស្ចារ្យ មនុស្ស​គ្រប់គ្នា​ក៏​សុទ្ធតែ​ចង់បាន​ដូច្នេះ ក៏ប៉ុន្តែ​គ្មាន​នរណាម្នាក់​មាន​ឆន្ទៈ​ឆ្លងកាត់​ការឈ្លោះគ្នា ការព្រងើយកន្តើយ​ដាក់គ្នា ការទទួល​នូវ​អារម្មណ៍​ឈឺចាប់ និង​ការទទួល​នូវ​អារម្មណ៍​រំជើបរំជួល​ក្តុកក្តួល​ដើម្បី​ទទួលបាន​ស្នេហា​ពិត​នោះឡើយ​។ ពួកគេ​មិន​ចង់បាន​ដូច្នេះ​ទេ និង​មិនដែល​ហ៊ាន​សួរ​ខ្លួនឯង​ថា "​ចុះ​ប្រសិនបើ​" នោះឡើយ​។ បន្ទាប់មក​ជាច្រើន​ឆ្នាំ ពួកគេ​ក៏​ចាប់ផ្តើម​ប្រែ​ពី​សំណួរ "​ចុះ​ប្រសិនបើ​" ទៅជា​សំណួរ "​ចុះ​ម៉េច​បាន​ទៅជា​អ​ញ្ជឹ​ង​?"​។ ពេល​ឈានដល់​ការ​សួរ​សំណួរ​បែបនេះ ទំនាក់ទំនង​របស់​អ្នក​ប្រហែលជា​បាន​ប្រេះឆា​រួចទៅហើយ ព្រោះ​អ្នក​មិនបាន​ចាប់ផ្តើម​ពីដំបូង​ដោយ​សួរ​សំណួរ​ថា "​ចុះ​ប្រសិនបើ​" ឬ សំណួរ "​តើ​ការឈឺចាប់​បែបណា​ដែល​ខ្ញុំ​ចង់បាន​?"​។​

​        តើ​នេះ​មកពី​ហេតុអ្វី​? ព្រោះ​សុភមង្គល​ទាមទារ​ឱ្យមាន​ការលំបាក​ជាមុន​។ ដើម្បី​ទទួលបាន​ផល​វិជ្ជមាន​អ្នក​ត្រូវតែ​ចេះ​រ៉ាប់រង​នូវ​ផល​អវិជ្ជមាន​ជាមុនសិន​។ អ្នកនឹង​មិនអាច​គេចផុត​ពី​ចំណុច​អវិជ្ជមាន​បាន​រហូត​នោះទេ វា​នឹង​រត់​មករក​អ្នក​នៅ​ថ្ងៃ​ណាមួយ​ចៀស​មិន​ផុត​ឡើយ​។

​    ​ចំណុច​មួយទៀត​គួរ​ពិចារណា​ដែរនោះ​គឺថា មនុស្ស​គ្រប់គ្នា​ចង់បាន​កាយសម្បទា​មាំមួន​រឹងប៉ឹង ប៉ុន្តែ​ពួកគេ​មិន​ទទួលបាន​វា​ដូច​បំណង​ទេ ដោយសារ​ពួកគេ​មិនបាន​ស៊ូទ្រាំ​នឹង​ការលំបាក​ក្នុងការ​ហាត់ប្រាណ​រាប់​ម៉ោង​ផង​នោះ​។

​    ​មនុស្ស​ចង់​ចាប់ផ្តើម​អាជីវកម្ម​ផ្ទាល់ខ្លួន ឬ​ចង់​ម្ចាស់ការ​លើ​លុយកាក់​ដោយ​ខ្លួនឯង ប៉ុន្តែ​ពួកគេ​នឹងមិន​អាចធ្វើ​រឿងនេះ​បានទេ ប្រសិនបើ​ពួកគេ​មិន​ហ៊ាន​ប្រថុយប្រថាន មិន​ហ៊ាន​ឆ្លងកាត់​បរាជ័យ​ម្តង​ហើយ​ម្តងទៀត មិន​ហ៊ាន​ជួប​រឿង​មិន​ប្រាកដប្រជា​ក្នុងការ​ប្រឡូក​ជំនួញ និង​មិន​ហ៊ាន​ធ្វើការ​ច្រើន​ម៉ោង​លើស​អ្នកដទៃ​ផង​នោះ​។

​    ​ដូច្នេះ​អ្វីដែល​កំណត់​ភាពជោគជ័យ​របស់​អ្នក មិនមែនជា​សំណួរ "​តើ​អ្វី​ទៅ​ដែល​អ្នក​ចង់បាន​?" នោះទេ តែ​ជា​សំណួរ "​តើ​ការឈឺចាប់​បែបណា​ដែល​អ្នក​ចង់បាន​?"​។ គុណភាព​ជីវិត​របស់​អ្នក​មិនមែន​កំណត់ឡើង​ដោយ​បទពិសោធន៍​វិជ្ជមាន​របស់​អ្នក​នោះទេ តែ​ជា​បទពិសោធន៍​អវិជ្ជមាន​របស់​អ្នក​ទៅវិញ​ទេ​។ ហើយ​ដើម្បី​ដោះស្រាយ​ជាមួយនឹង​បទពិសោធន៍​អវិជ្ជមាន​បាន​យ៉ាង​ល្អ​គឺ​ត្រូវ​ចេះ​ដោះស្រាយ​ជាមួយ​បញ្ហា​ជីវិត​ឱ្យបាន​ល្អ​៕

 

adverise with khmeread
ប្រភព៖ qz

មតិយោបល់