ប៉េអឹម​ខេត្តកំពត ឃាត់ខ្លួន​ជនសង្ស័យ​៥​នាក់​ពាក់ព័ន្ធ​ជាមួយ​សារធាតុ​ញៀន​

    កំពត ៖ កម្លាំង​កងរាជអាវុធហត្ថ​ស្រុក​ដងទង់ បានធ្វើការ​ឃាត់ខ្លួន​ជនសង្ស័យ​ ៥ ​នាក់ ជា​បន្តបន្ទាប់ ជាប់​ពាក់ព័ន្ធ​ជាមួយ​ករណី រក្សាទុក និង​ចែកចាយ​នូវ​សារធាតុ​ញៀន​កាលពី​វេលា​ម៉ោង១១ ​និង​៣០​នាទី​យប់ ថ្ងៃទី​០៥ ខែមករា ឆ្នាំ​២០១៦ កន្លងទៅនេះ។​

    មន្ត្រី​អាវុធហត្ថ បានឱ្យដឹងថា ដំបូង​ឃាត់​បាន​ជនសង្ស័យ​៣​នាក់​គឺ ១.ឈ្មោះ ភី ឆាយ​យ៉ា ភេទ​ប្រុស អាយុ​២២​ឆ្នាំ មុខរបរ កម្មករ, ២.ឈ្មោះ អ៊ិន ឌី​ណា ភេទ​ប្រុស អាយុ​២០​ឆ្នាំ មុខរបរ កសិករ ​និង​៣.ឈ្មោះ ញ៉ែ​ត សារិន ភេទ​ប្រុស អាយុ​២៩​ឆ្នាំ មុខរបរ កម្មករសំណង់​។ ​អ្នក​ទាំង​០៣ រស់នៅ​ចំណុចកើតហេតុ​ខាងលើ​។​ ចាប់យក​វត្ថុតាង​មួយចំនួន​ពី​ជនសង្ស័យ​រួមមាន ១. ថ្នាំញៀន ប្រភេទ​ម៉ា​ទឹកកក​ចំនួន​០១​កញ្ចប់​ និង​២. ម៉ូតូ ចំនួន​០២​គ្រឿង​។ បន្ទាប់ពី​ធ្វើការ​ឃាត់ខ្លួន​រួចមក ជនសង្ស័យ​ត្រូវបាន​បញ្ជូនទៅ​មូលដ្ឋាន កងរាជអាវុធហត្ថ ដើម្បី​ធ្វើការ​សាកសួរ​បន្ត​។​

    ក្រោយពី​ធ្វើការ​សាកសួរ​រួចមក ជនសង្ស័យ​បាន​ឆ្លើយ​សារភាពថា រូបគេ​នៅសល់​បក្ខពួក​ចំនួន​០២​នាក់​ទៀត ដែល​រួមមាន​១.​ឈ្មោះ សៀង សំណាង ភេទ​ប្រុស អាយុ​១៨​ឆ្នាំ មុខរបរ កម្មករ​ និង​២.​ឈ្មោះ ស៊ឹម លី​ថូ ភេទ​ប្រុស អាយុ​២១​ឆ្នាំ មុខរបរ កម្មករ​។​ អ្នក​ទាំង​០២​នាក់​នោះ រស់នៅ​ភូមិ​ក្រាំង សង្កាត់​ក្រាំង​អំពិល ក្រុង​កំពត ខេត្តកំពត​។​

    បន្ទាប់ពី​ទទួលបាន​ចម្លើយសារភាព នៅវេលា​ម៉ោង​១១​ និង​៣០​នាទី​យប់ ថ្ងៃ​ដដែល កម្លាំង​អាវុធហត្ថ​ស្រុក​ដងទង់ បាន​សុំ​ការ​ពី កម្លាំង​កងរាជអាវុធហត្ថ​ខេត្តកំពត និង​ដោយមាន​ការសម្របសម្រួល​ពី​ព្រះរាជអាជ្ញា​អម​សាលាដំបូង​ខេត្ត រហូត​អាចឈាន​ទៅដល់​ការឃាត់ ខ្លួន​បាន​ជនសង្ស័យ​ទាំង​០២​នាក់​នោះ បាន​ដោយ​ជោគជ័យ និង​បាន​ចាប់យក​វត្ថុតាង​មួយចំនួន​រួមមាន ថ្នាំញៀន​ចំនួន​០២​កញ្ចប់ ដែលមាន​ទម្ងន់​ស្មើ ១.៤០​ក្រាម​។​

    បច្ចុប្បន្ន ជនសង្ស័យ និង​វត្ថុតាង ត្រូវបាន​មន្ត្រី​ជំនាញ​កងរាជអាវុធហត្ថ​ខេត្តកំពត កំពុង​កសាង​សំណុំរឿង ដើម្បី​ចាត់ការ​បន្ត​តាម​នីតិវិធី​៕​

adverise with khmeread