Arsene Wenger ទទួលស្គាល់ថា Arsenal អាច​លេង​បានល្អ​បើ​មាន Wilshere

    ​អ្នកចាត់ការ​ទូទៅ​ក្រុម​កាំភ្លើង​ធំ Arsenal លោក Arsene Wenger បាន​ទទួលស្គាល់ថា ក្រុម​របស់គាត់​អាច​លេង​បានល្អ​ប្រសើរ​បើ​មាន Jack Wilshere បន្ទាប់ពី​កើតមាន​វិបត្តិ​របួស​ខ្សែបម្រើ​ព្រោងព្រាត​។​

​    ​តារាបាល់ទាត់​អន្តរជាតិ​អង់គ្លេស​រូបនេះ ត្រូវបាន​ចំណាយពេល​ពេញ​មួយ​រដូវ​កាល​នៅលើ​កិច្ចព្រមព្រៀង​ខ្ចី​ជើង​ទៅកាន់​ក្លឹប Bournemouth បន្ទាប់ពី​បាន​ផ្សាភ្ជាប់​ទំនាក់ទំនង​ជាមួយ​នឹង​អ្នកចាត់ការ​ទូទៅ​លោក Eddie Howe នៅក្នុង​ការផ្ទេរ​ដ៏​គួរឱ្យភ្ញាក់ផ្អើល​ក្នុង​ទីផ្សារ​រដូវក្តៅ គឺ​ចំ​ថ្ងៃ​ចុងក្រោយ​នៃ​ការបិទទ្វារ​ទីផ្សារ​ដោះដូរ​។​

​    ​Wilshere បាន​ជាប់គាំង​ក្នុងការ​បង្ហាញ​សម្ថ​ភាព​នៅក្នុង​រយៈពេល​ប៉ុន្មាន​រដូវ​កាល​ក្រោយ​នៅឯ Arsenal ហើយ​គាត់​បាន​ប្រឈម​ជាមួយនឹង​ការប្រកួតប្រជែង​តំណែង​សម្រាប់​រដូវ​កាល​នេះ បន្ទាប់ពី​កាំភ្លើង​ធំ​បាន​ចុះហត្ថលេខា​ទិញ​ខ្សែបម្រើ Granit Xhaka និង Mohamed Elneny បន្ថែម​សម្រាប់​ក្លឹប​។​

​    ​ទោះជា​យ៉ាងណាក្តី ខណៈដែល​បច្ចុប្បន្ន​ក្នុង​តំបន់​អាហ្វ្រិក​នឹង​មានការ​ប្រារព្ធ​កម្មវិធី​ប្រជែង​ពាន​ក្នុង​តំបន់​សម្រាប់​ខែ​នេះ និង​ខែក្រោយ វា​ក៏បាន​ក្លាយទៅជា​បញ្ហា​ជាប់គាំង​សម្រាប់​ក្លឹប​ទីក្រុង​ឡុង​ដ៍​ខាងជើង​នេះ​ផងដែរ ខណៈដែល​លោក Wenger ទទួលស្គាល់ថា គាត់​អាច​នឹង​កោះហៅ Wilshere ត្រឡប់មកវិញ​នៅ​គ្រានេះ​។​

​    ​Wenger បាន​បញ្ជាក់ថា "​ត្រឹមត្រូវ​ហើយ ខ្ញុំ​អាច​ប្រើ Wilshere នាពេល​ឥឡូវនេះ​។ អ្វីដែល​អយុត្តិធម៌​នៅ​គ្រា​ខ្លះ​ក្នុង​រដូវ​កាល​នេះ​គឺថា អ្នក​ដឹងថា​នៅ​ដំណាក់កាល​ខ្លះ​អ្នកត្រូវការ​កីឡាករ​រូបនេះ​។ ប៉ុន្តែ​នៅ​ការចាប់ផ្តើម​រដូវ​កាល អ្នក​ត្រូវតែមាន​តុល្យភាព​ត្រឹមត្រូវ​មួយ​រវាង​ការប្រកួតប្រជែង និង​ឱកាស​សម្រាប់​កីឡាករ​បញ្ចេញ​ថ្វី​ជើង​។ ប៉ុន្តែ​មកទល់​សព្វថ្ងៃ ខ្ញុំ​នៅតែ​យល់ឃើញថា​ការសម្រេចចិត្ត​ឱ្យ​គាត់​ចាកចេញ​គឺ​ត្រឹមត្រូវ​"៕

624347648 adverise with khmeread

មតិយោបល់