adverise with khmeread Untitled 1

នាយករដ្ឋមន្ត្រី​កម្ពុជា​ឆ្លើយតប​នឹង​និស្សិត​ពេទ្យ​ម្នាក់​ដែល​សុំ​បញ្ចុះតម្លៃ​សម្រាប់​ការប្រលង​ចេញ​ថ្នាក់ជាតិ​

      ​ភ្នំពេញ  : យោងតាម​ហ្វេ​ស​ប៊ុ​ក​ផេ​ក​របស់លោក​នាយករដ្ឋមន្ត្រី​ហ៊ុន សែន ដែល​បាន​បង្ហោះ​នៅ​ថ្ងៃទី ២២ ខែមករា​ឆ្នាំ​២០១៦​នេះ​ថា​លោក​នឹង​យល់ព្រម​ទទួល​សំណើ​របស់​យុវ​សិស្ស​ម្នាក់​ឈ្មោះ Darapiseth Sokha ក្នុងការ​បញ្ចុះតម្លៃ​ការប្រលង​ចេញ​ថ្នាក់ជាតិ​សម្រាប់​វិស័យ​សុខាភិបាល​ពី​ចំនួន ហាសិប​ម៉ឺន​រៀល (៥០០.០០០​រៀល​) មក​ត្រឹម​ដប់​ម៉ឺន​រៀល (១០០ ០០០​រៀល​)​។​

       ​លោក​ហ៊ុន សែន​បានសរសេរថា "​នៅថ្ងៃនេះ ក្រោយពី​បានទទួល​សំណើ​របស់​យុវ​សិស្ស Darapiseth Sokha ដែល​បាន​ផ្ញើមក​ខ្ញុំ​តាម Facebook សុំ​ការ​បញ្ចុះតម្លៃ​សម្រាប់​ការប្រឡង​ចេញ​ថ្នាក់ជាតិ​សម្រាប់​វិស័យ​សុខាភិបាល ដែល​ត្រូវ​បង់​ថវិកា ៥០០,០០០ រៀល គឺ​បានធ្វើឱ្យ​ខ្ញុំ​យល់​កាន់តែច្បាស់​អំពី​ស្ថានភាព​សិក្សា និង​ស្ថានភាព​រស់នៅ​របស់​និស្សិត​យើង ដែល​ខ្ញុំ​ត្រូវតែ​ដោះស្រាយ​ជាបន្ទាន់​"​។​

          ​លោកនាយក​រដ្ឋមន្ត្រី​បាន​បន្តថា "​ក្រោយពី​ខ្ញុំ​បាន​ពិភាក្សា​ជាមួយ​រដ្ឋមន្ត្រី​ក្រសួងសុខាភិបាល​ហើយ​នៅថ្ងៃនេះ គឺ​ខ្ញុំ​បានសម្រេច​បញ្ចុះតម្លៃ​ជូន​និស្សិត នៅត្រឹម ១០០.០០០ រៀល​។ ខ្ញុំ​សង្ឃឹមថា​និស្សិត​ចំនួន ១.៤៣៣ នាក់ នឹង​បាន​ធូរស្រាល​មួយកម្រិត​ធំ​ចំពោះ​ការបញ្ចុះ​តម្លៃ​ខាងលើនេះ ហើយនឹង​បាន​នៅសល់​ថវិកា​មួយចំនួន​សម្រាប់​យកទៅ​ដោះស្រាយ​លើ​ជីវភាព​រស់នៅ ឱ្យបាន​ប្រសើរឡើង​។ នេះ​ជាការ​ឆ្លើយតប​ជាបឋម​ទៅកាន់​ក្មួយៗ​និស្សិត​ដែល​បានស្នើ​មក​ខ្ញុំ​"​។​
    
​    ​លោក​បន្តថា "​ឯ​ចម្លើយ​ផ្លូវការ​នឹងត្រូវ​ចេញ​ដោយ​សេចក្តីជូនដំណឹង​របស់​ទីស្តីការគណរដ្ឋមន្ត្រី​ដើម្បី​ស្ថាប័ន​មាន​សមត្ថកិច្ច​យកទៅ​អនុវត្តន៍​។ ខ្ញុំ​សូម​កោត​ស​សើរ លោក​រដ្ឋមន្ត្រី ម៉ម ប៊ុនហេង ដែល​បាន​យកចិត្តទុកដាក់​ដោះស្រាយ​សំណូមពរ​របស់​ក្មួយៗ​និស្សិត​តាមរយៈ​ចូល​ពិនិត្យមើល​ការលើក​នូវ​មតិ​នានា​ក្នុង Facebook របស់ខ្ញុំ​។ ខ្ញុំ​សូម​ជូនពរ​និស្សិត​ខ្មែរ​ទាំង​ក្នុង និង​ក្រៅ ប្រទេស​ជួបតែ​សំណាងល្អ និង​មាន​អនាគត​ល្អ​គ្រប់ៗ​គ្នា​”​។​

        ​ការបញ្ចុះ​តម្លៃ​ខាងលើនេះ បានធ្វើឱ្យ​និស្សិត​ពេទ្យ​ទាំងអស់​បាន​ចូល​រូ​ម​ត្រេកអរ​និង​អបអរសាទរ​៕

adverise with khmeread

មតិយោបល់