Forre

ចាប់ជនសង្ស័យលួចសម្ភារៈភ្ញៀវទេសចរណ៍ ជនជាតិអ៊ីស្រាអែល

     ព្រះសីហនុ ៖ ប៉ូលិសខេត្តព្រះសីហនុ បានឃាត់ខ្លួនជនសង្ស័យម្នាក់  កាលពីថ្ងៃទី៧ធ្នូឆ្នាំ២០១៥នៅចំណុចមុខផ្ទះសំណាក់បៃតង ក្រុងព្រះសីហនុ បន្ទាប់ពីធ្វើសកម្មភាពលួច សម្ភារៈជនបរទេស ហើយប្រុងជិះទូកគេចខ្លួន។
     ប៉ូលិសនិយាយថា យោងតាមពាក្យបណ្តឹងចុះថ្ងៃទី៧ ធ្នូ ២០១៥  វេលាម៉ោង៩នាទីព្រឹករបស់ឈ្មោះ RAVID GALភេទស្រី អាយុ២២ឆ្នាំ ជនជាតិអុីស្រាអែល កាន់លិខិតឆ្លងដែន​លេខ14822938 និង VISA :TI 10163999 ជាភ្ញៀវទេសចរណ៍មកលេងកម្ពុជា បានបាត់សម្ភារះរួមមាន ៖ ទូរស័ព្ទ ម៉ាក SAMSUNG s5ពណ៌សចំនួន១គ្រឿង និងលុយចំនួន៤០០​ដុល្លាអាមេរិក នៅចំណុចមុខផ្ទះសំណាក់បៃតង ក្រុងព្រះសីហនុ ត្រូវជនមិនស្គាល់មុខលួច​យកនៅថ្ងៃដដែលនោះ ។
  ក្រោយពីមានពាក្យបណ្តឹង និងទទួលបានរបាយការណ៍ជាក់លាក់ លោកឧត្តមសេនីយ៍ទោ​ជួន ណារិន្ទ ស្នងការប៉ូលិសខេត្ត មិនទុកពេលឲ្យជនសង្ស័យបានគេចខ្លួនទេ ។ លោកបានចង្អុលបង្ហាញទៅមន្រ្តីថ្នាក់ក្រោម គឺប៉ុស្តិ៍រដ្ឋបាលសង្កាត់កោះរ៉ុងឲ្យប្រើប្រាស់កម្លាំងចុះពិនិត្យជាបន្ទាន់ តាមផែទូកដែលជានិច្ចកាលជនសង្ស័យ ពេលធ្វើសកម្មភាពហើយតែងតែគេចខ្លួនតាមផ្លូវទឹក។
    ពេលកម្លាំងចុះទៅដល់ ក៏ប្រទះឃើញជនសង្ស័យឈ្មោះនួន ភក្តីភេទប្រុស អាយុ២៣ឆ្នាំ មុខរបរលក់លៀសហាល  បម្រុងជិះទូកពីភូមិកោះតូច សង្កាត់កោះរ៉ុងគេចខ្លួន ក៏ត្រូវកម្លាំងប៉ូលិសប៉ុស្តិ៍ឃាត់ភ្លាមនិងបានធ្វើការឆែកឆេរ ក្នុងការបូបដាក់ខោអាវបានឃើញសម្ភារ: និងលុយកាក់របស់ជនបរទេស ដែលបាត់ដូចពាក្យបណ្តឹងខាងលើ ។
    ជនសង្ស័យ និងវត្ថុតាងចាប់យកជាក់ស្តែង ត្រូវបានសមត្តកិច្ចកសាងសំណុំរឿងបញ្ជួនទៅកាន់សាលាដំបូងខេត្ត ដើម្បីចាត់ការតាមនិតិវិធី ។ចំណែកសម្ភារៈដកហូតពីជនសង្ស័យ បានប្រគល់ឲ្យជនរងគ្រោះជាជនបរទេសវិញ ៕

មតិយោបល់