ស្ពានកញ្ចក់វែងបំផុតនិងគួរឱ្យស្រៀវស្រើបបំផុតលើពិភពលោក ត្រៀមបើកសម្ភោធនៅថ្ងៃអាទិត្យនេះ

ស្ពានកញ្ចក់វែងបំផុតលើពិភពលោកបានកាត់ខ្សែបូបើកសម្ភោធឱ្យសាធារណជនដើរឆ្លងកាត់នៅថ្ងៃអាទិត្យនេះ នៅទីក្រុង Shijiazhuang ខេត្ត Hebei។

ស្ពាន ដែលមានប្រវែង ៤៨៨ ម៉ែត្រនេះ មានទទឹង ២ ម៉ែត្រ និងមានកម្ពស់ ២១៨ ម៉ែត្រ (ប្រហែលអគារ ៦៦ ជាន់) នៅពីលើជ្រលងភ្នំរវាងច្រាំងថ្មចោតពីរផ្ទាំងនៅតំបន់ទេសភាពព្រៃភ្នំ Hongyagu ក្នុងភូមិសាស្ត្រ Pingshan។

ស្ពាននេះត្រូវបានគ្របដណ្តប់ដោយកញ្ចក់ថ្លាចំនួន ១.០៧៧ បន្ទះ ដែលមានកម្រាស់ ៤ សង់ទីម៉ែត្រ និងទម្ងន់សរុប ៧០ តោន។

ស្ពានលើអាកាសនេះត្រូវបានរចនាឡើងឱ្យយោលយោគបន្តិចបន្តួចនៅពេលអ្នកទេសចរដើរចូលដល់កណ្តាលស្ពាន ដោយបង្កើតបាននូវអារម្មណ៍រំភើបញាប់ញ័រសម្រាប់អ្នកទេសចរ។ នេះបើយោងតាមក្រុមហ៊ុនទេសចរណ៍ ​​Hebei Bailu Group ដែលបានសាងសង់ស្ពាននេះ។

ខណៈពេលកំពុងដើរលើស្ពាន អ្នកទេសចរអាចរីករាយនឹងទេសភាពនៅតំបន់ភ្នំ Hongyagu ដែលមានទេសភាពភូមិសាស្រ្តល្អឯកតែមួយគត់ ដូចជា ទេសភាពភ្នំ ទឹកធ្លាក់ធម្មជាតិ ទីក្រុងបុរាណ និងវត្តអារ៉ាមនានា។

លោក Liu Qiqi ប្រធានទទួលបន្ទុកផ្នែកសាងសង់ស្ពាននេះបាននិយាយថា ស្ពាននេះត្រូវបានរចនាឡើងដើម្បីទ្រមនុស្សដល់ទៅ ២.០០០ នាក់ បើទោះបីជាវាត្រូវបានរំពឹងថា ផ្ទុកមនុស្សបានតែ ៥០០ នាក់ក្នុងមួយជើងក៏ដោយ៕

adverise with khmeread