adverise with khmeread 1

ទម្រង់​មុខ​របស់​អ្នក​អាច​ប្រាប់​បាន​ថា​អ្នកជា​មនុស្ស​ប្រភេទ​ណា​! ចុះ​អ្នក​វិញ​មាន​ទម្រង់​មុខ​មួយណា​ក្នុងចំណោម​បី​នេះ​?

​    ​នៅពេល​អ្នក​បាន​ជួប​មនុស្ស​ថ្មី​ម្នាក់ រឿង​មួយ​ដែល​អ្នក​កត់សម្គាល់​មុនគេ​គឺ​រូបរាង​មុខ និង​ទម្រង់​មុខ​របស់គេ​។ វិទ្យាសាស្ត្រ​មួយ​ដែល​គេ​ស្គាល់​ថា Physiognomy ឬ វិជ្ជា​សិក្សា​អំពី​ទម្រង់​មុខ​អាច​វិភាគ​ដឹង​អំពី​ច​រិ​ក​លក្ខណៈ​របស់​មនុស្ស​ផ្អែក​តាម​រូបរាងកាយ​របស់​ពួកគេ​។ ពាក្យ Physiognomy ត្រូវបាន​លើកយក​មក​និយាយ​ដំបូង​បំផុត​នៅក្នុង​សៀវភៅ​របស់លោក​អា​រី​ស្តូ​ត​។ លោក​ជឿថា មនុស្ស​មាន​ច​រិ​ក​លក្ខណៈ​ជាក់លាក់​មួយ ដែល​បង្ហាញ​ឱ្យដឹង​នៅលើ​ទឹកមុខ​របស់​ពួកគេ​។

​    ​សព្វថ្ងៃ វិទ្យាសាស្ត្រ​នេះ​ត្រូវបាន​ប្រើប្រាស់​ក្នុង​ផ្នែក​អាជីវកម្ម​ជាច្រើន នៅពេល​ស្វែងរក​ប្រភេទ​មនុស្ស​នានា​ផ្អែក​តាម​ទម្រង់​មុខ​សម្រាប់​បម្រើការ​នៅតាម​បណ្តា​ក្រុមហ៊ុន​សាជីវកម្ម​ធំៗ និង​ស្ថាប័ន​នានា​។​

​     ខាងក្រោម​នេះ​គឺជា​របៀប​ដែល​អ្នកសិក្សា​អំពី​ទម្រង់​មុខ​ប្រើប្រាស់​ដើម្បី​ស្វែងរក និង​មើល​ឱ្យដឹង​អំពី​ច​រិ​ក​លក្ខណៈ​របស់​មនុស្ស​។

​    ​១. ទម្រង់​មុខ​ខូង ឬ​ផត​
​    ​ទម្រង់​មុខ​នេះ​អាច​សម្គាល់​បាន​តាមរយៈ​ថ្គាម​លយ​ទៅមុខ​ទាប​ចុះក្រោម និង​បបូរមាត់​ទេរ​ចុះក្រោម ប៉ុន្តែ​មាន​ថ្ងាស​ពយ​មក​ក្រៅ​។ មនុស្ស​ដែលមាន​ទម្រង់​មុខ​បែបនេះ​គឺមាន​លក្ខណៈ​ស្ពឹក​ស្រពន់​ក្នុងការ​និយាយស្តី ធ្វើ​សកម្មភាព និង​គិតគូរ​ពិចារណា ប៉ុន្តែ​មានការ​ប្តេជ្ញាចិត្ត និង​ចាប់អារម្មណ៍​ខាង​ទ្រឹស្តី​។ មនុស្ស​បែបនេះ​ចូលចិត្ត​សញ្ជឹងគិត និង​ឧស្សាហ៍​ភ្លេចភ្លាំង​ច្រើន​។ ពួកគេ​ក៏​ពូកែ​ខាង​គំនិត​ទស្សនៈ​គ្រប់យ៉ាង​ផងដែរ​។ ពួកគេ​ជា​មិត្តភក្តិ​ស្មោះត្រង់ និង​ជាម​នុស្ស​គួរឱ្យ​ទុកចិត្ត មានការ​អត់ធ្មត់​ខ្ពស់ និង​មាន​ថាមពល​ប្រកបដោយ​តុល្យភាព​។ ច​រិ​ក​លក្ខណៈ​មួយទៀត​របស់​ពួកគេ​គឺ​ភាព​នឹងធឹង​ល្អ ស្ងប់ចិត្ត គិត​ច្រើន ប៉ុន្តែ​ជួនកាល​ស្ពឹក​ស្រពន់​ណាស់​។ ទោះបី​ពួកគេ​អាច​គ្រប់គ្រង​ខ្លួនឯង​បានល្អ និង​អាច​រក្សា​ភាពស្ងប់ស្ងាត់​ក្នុង​ចិត្ត ក៏ប៉ុន្តែ​ពួកគេ​ឆាប់​បាក់​ទឹកចិត្ត និង​ឆាប់​មានការ​ហត់នឿយ​អស់កម្លាំង​។ លើសពីនេះទៅទៀត ពួកគេ​អាច​បង្ហាញ​ឥទ្ធិពល​របស់ខ្លួន និង​ពូកែ​ខាង​ការរៀបចំ​ទុកដាក់​។ ការចងចាំ​របស់​ពួកគេ​ដំណើរការ​បានល្អ និង​អាច​ប្រមូល​សឹងតែ​បាន​គ្រប់​ព័ត៌មាន​ទាំងអស់​ឡើងវិញ​។ ពួកគេ​មិនមែនជា​មនុស្ស​ពិបាក​រាប់អាន​នោះទេ ប៉ុន្តែ​ជួនកាល​ពួកគេ​ចូលចិត្ត​ចងគំនុំ​ណាស់​។

​     ២. ទម្រង់​មុខ​ត្រង់​
​    ​មនុស្ស​បែបនេះ​មាន​ក្តីសង្ឃឹម​ខ្ពស់​។ ទោះ​ពួកគេ​មើលទៅ​ហាក់ដូចជា​មនុស្ស​ស្ងប់ស្ងាត់​និង​ឆ្លាត​វៃ ប៉ុន្តែ​ពួកគេ​ក៏​អាចជា​មនុស្ស​ក្បាលរឹង និង​ពូកែ​អំណត់​អត់ធន់​ផងដែរ​។ ពួកគេ​មិនដែល​ទទួលស្គាល់​បរាជ័យ​នោះទេ និង​តែង​ចាប់អារម្មណ៍​ចង់ដឹង​ពី​អត្ថន័យ​នៃ​អ្វីៗ​គ្រប់យ៉ាង​។ មនុស្ស​ទម្រង់​មុខ​ត្រង់​គឺជា​មនុស្ស​ដែលមាន​ហេតុផល​គ្រប់ពេល កាច និង​ចូលចិត្ត​និយាយ​អ្វី​ចំៗ​។ ពួកគេ​តែងតែ​បញ្ចប់​នូវ​អ្វីៗ​ដែល​ពួកគេ​បានចាប់ផ្តើម បើទោះបីជា​ពួកគេ​ត្រូវ​បោះបង់ចោល​អ្វីមួយ​ក៏ដោយ​។ ដោយសារ​ច​រិ​ក​ពី​ធម្មជាតិ​មក​គឺ​ពោរពេញ​ដោយ​មហិច្ឆតា មនុស្ស​បែបនេះ​មិនដែល​ឈប់​នៅ​ពាក់កណ្តាល​ទីនោះ​ឡើយ​។

​    ​៣. ទម្រង់​មុខ​ប៉ោង​
​    ​មនុស្ស​ទម្រង់​មុខ​ប៉ោង (​មើលរូប​ចុងក្រោយ​គេ​) គឺជា​ប្រភេទ​មនុស្ស​គិត​បាន​រហ័ស និង​ក៏​ឆាប់​បញ្ចេញ​ប្រតិកម្ម​ដែរ​។ ពួកគេ​គឺជា​មនុស្ស​ពូកែ​អង្កេត​ដ៏​អស្ចារ្យ ចូលចិត្ត​អនុវត្ត​ជាក់ស្តែង និង​ពូកែ​វោហា​ស័ព្ទ​។ ពួកគេ​មាន​ភាពស្វាហាប់ ឆេវឆាវ ធ្វើ​អ្វីមួយ​តែ​តាម​សន្ទុះ​ចិត្ត និង​ជា​បុគ្គលិក​ចំណាន​មាន​សមត្ថភាព​ខ្ពស់​អស្ចារ្យ​។ ពួកគេ​ជាម​នុស្ស​ដែលមាន​ភាព​រីករាយ និង​ជឿជាក់​លើ​ភាពជោគជ័យ​។ ភាគច្រើនបំផុត ពួកគេ​ចូលចិត្ត​នៅ​ដាច់​ពី​គេ ហើយ​ជួនកាល​ក៏​ចូលចិត្ត​ជំទាស់​ប្រឆាំងនឹង​គេឯង​ដែរ​។ ពួកគេ​ចង់​ថែទាំ​អ្នកដទៃ និង​គួរឱ្យ​ស្រឡាញ់​និង​គួរ​រាប់រក​ណាស់​។ ពួកគេ​ជាម​នុស្ស​ឆ្លាត ប៉ុន្តែ​ភាព​ឆេវឆាវ​គឺជា​ច​រិ​ក​លក្ខណៈ​អវិជ្ជមាន​ក្នុង​ការធ្វើទំនាក់ទំនង​។ ពួកគេ​មិនមែនជា​មនុស្ស​ពូកែ​ស្តាប់​នោះទេ ដោយសារ​ពួកគេ​ខ្វះ​ការ​ផ្តោតអារម្មណ៍​។ ទោះយ៉ាងណា ពួកគេ​ចូលចិត្ត​ជជែក​គ្នា​ណាស់​៕

adverise with khmeread
ប្រភព៖ ម៉ា​យ​ឡាយ​ស្តាយ​

អ្នកនឹងចូលចិត្ត

មតិយោបល់