1

​បម្រាម​បាល់ទាត់​របស់លោក Sepp Blatter និង Michel Platini ត្រូវបាន​បន្ថយ​មក​នៅ​ត្រឹម ៦ ឆ្នាំ​ដោយ FIFA

​    ​លោក Sepp Blatter និង Michel Platini ត្រូវបាន​កាត់បន្ថយ​បម្រាម​សកម្មភាព​ជាប់ទាក់ទង​បាល់ទាត់​ពី​ប្រាំបី​ឆ្នាំ​មក​ត្រឹម​ប្រាំមួយ​ឆ្នាំ​វិញ ដោយ​គណៈកម្មាធិការ​ប​ណ្តឹ​ង​ឧទ្ធរណ៍​របស់ FIFA កាលពី​ថ្ងៃ​ពុធ​ទី ២៤ ខែកុម្ភៈ​។​

​    ​លោក Blatter និង លោក Platini អតីត​ប្រធាន FIFA និង UEFA ត្រូវបាន​ផ្អាក​ពី​សកម្មភាព​បាល់ទាត់​ប​ន្ទា​ប់​ពី​ត្រូវបាន​រកឃើញ​កំហុស​នៃ​ការរំលោភបំពាន​ជាច្រើន ដូចជា "​ការ​ធ្វេស​ប្រហែល​នៃ​កាតព្វកិច្ច​" ដែល​ទាក់ទង​នឹង "​ការទូទាត់​មិន​ស្មោះត្រង់​"  ដែលមាន​តម្លៃ ១,៣៥ លាន​ផោន ពី​លោក Blatter ទៅ​លោក Platini ក្នុង​ឆ្នាំ ២០១១​។​

​    ​អ្នក​ទាំងពីរ​បាន​ប្តឹង​ឧទ្ធរណ៍​ប្រឆាំងនឹង​ការសម្រេច​នេះ ប៉ុន្តែ​គណៈកម្មាធិការ​បណ្តឹងឧទ្ធរណ៍​របស់ FIFA បាន​គាំទ្រ​បម្រាម​នេះ​កាលពី​ថ្ងៃ​ពុធ តែ​ទោះយ៉ាងណា ការផ្អាក​របស់​អ្នក​ទាំងពីរ​ត្រូវបាន​បន្ថយ​ពី​ប្រាំបី​ឆ្នាំ​មក​ប្រាំមួយ​ឆ្នាំ​វិញ បន្ទាប់ពី​គេ​បានទទួល​ស្គាល់​ស្នាដៃ​បំពេញការងារ​ខាង​បាល់ទាត់​របស់​អ្នក​ទាំងពីរ​។

​    ​អង្គជំនុំជម្រះ​ក្នុងការ​ស៊ើបអង្កេត​រប​ស់ FIFA បាន​ណែនាំ​អ្នក​ទាំងពីរ​ឲ្យ​ទទួល​បម្រាម​មួយជីវិត​ខណៈ​លោក Blatter និង Platini បដិសេធ​ការចោទប្រកាន់​ប្រឆាំងនឹង​អ្នក​ទាំងពីរ​។​

​    ​បន្ទាប់ពី​ដឹង​លទ្ធផល​នៃ​បណ្តឹងឧទ្ធរណ៍ លោក Blatter បាន​និយាយថា "​ខ្ញុំ​ពិតជា​ខកចិត្ត​ចំពោះ​អង្គជំនុំជម្រះ​ក្នុងការ​ស៊ើបអង្កេត​រប​ស់ FIFA ហើយ​ជំហាន​បន្ទាប់​គឺ​នឹង​បន្តទៅ​តុលាការ​អាជ្ញាកណ្តាល​កីឡា (CAS) នៅក្នុង​ទីក្រុង Lausanne"៕

ប្រភព៖ មេត្រូ

មតិយោបល់