Osaka ក្លាយជាកីឡាការិនីជប៉ុនលើកដំបូងដែលលើកពាន Grand Slam

          Naomi Osaka បាន​ក្លាយជា​ជើង​ឯក​ទោល​ផ្នែក​នារីសម្រាប់ពាន Grand Slam ជាលើកដំបូង​ បន្ទាប់ពី​នាង​យក​ឈ្នះ​កីឡាការិនី​ជើង​ចាស់ Serena William ៦-២ និង​ ៦-៤ ក្នុង​ការ​ប្រកួត​វគ្គ​ផ្តាច់ព្រ័ត្រ​ដ៏ចម្រូង​ចម្រាស​បំផុតកាល​ពី​ថ្ងៃសៅរ៍ ដោយ​កីឡាការិនី​អាមេរិក Williams បរាជ័យដ៏គួរឲ្យ​ភ្ញាក់ផ្អើល​ បន្ទាប់ពី​រងការចោទប្រកាន់ថា បាន​រំលោភច្បាប់​ប្រកួត។​

          ការ​ប្រកួតវគ្គផ្តាច់ព្រ័ត្រ​នេះ​បាន​បញ្ចប់​ដោយ​ភាពចម្រូង​ចម្រាសបំផុត​ក្នុង​ប្រវត្តិស​ប្រកួតវគ្គផ្តាច់ព្រ័ត្រ​ដណ្តើមពាន Grand Slam ។

          មាន​ការ​ចំឌឺដងដាក់គ្នាទៅវិញទៅមក​រវាងកីឡាការិនីទាំងពីរ​ ស្របពេល​ Osaka ព្យាយាមចង់​​ក្លាយ​ជា​កីឡាការិនីទី​១​ ដែល​លើកពាន​ Grand Slam ចំណែក​​ឯ Williams វិញចង់​តាម​ស្មើ​ឯតទគ្គកម្មចាស់​របស់​កីឡាការិនី Margaret Court ដែល​ធ្លាប់លើកពាន​នេះ​២៤​លើក។
 

          ឈរលើ​វេទិកា​រង់ចាំ​ទទួល​ពាន​​និង​មូលប្បទានបត្រ​ដែលមានទឹកប្រាក់​៣,៨លាន​ដុល្លារ​ Osaka បាន​ឮសូរសម្លេងស្រែកចំអក​ពីក្រុម​ទស្សនិកជនដែល​មាន​ការ​ខកចិត្ត​ចំពោះ​មន្ត្រីដឹកនាំការប្រកួត​ជនជាតិព័រទុយហ្គាល់ Carlos Ramos ដែល​ឈរនៅក្បែរនោះដែរ។

          Osaka បាន​និយាយថា “​ខ្ញុំដឹងថា គ្រប់គ្នា​អបអរចំពោះ Williams ហើយ​ខ្ញុំ​សូម​អភ័យទោស​ដែល​ការ​ប្រកួត​បញ្ចប់​ក្នុងលទ្ធផល​បែបនេះ។ វាគឺជាសុបិន​របស់​ខ្ញុំដែល​ចង់ប្រកួត​ជាមួយ​ Serena ក្នុង​វគ្គ​ផ្តាច់ព្រ័ត្រ U.S. Open …ខ្ញុំពិតជា​រីករាយ​ដែល​ខ្ញុំ​អាចប្រកួត​ជា​មួយគាត់”។

          ស្របពេល Osaka គ្រប់គ្រងការប្រកួត​ បន្ទាប់ពីយក​ឈ្នះ​សិត​ដំបូង​ លោក Ramos បាន​ធ្វើឲ្យ​​ Williams កាន់តែ​មាន​កំហឹង​នៅពេល​លោកចោទប្រកាន់​កីឡាការិនីរូបនេះថា បាន​រំលោភច្បាប់​ប្រកួត​ អំឡុង​ពេល​ប្រកួត​ហ្គេម​ទី​២ក្នុង​សិត​ទី​២ បន្ទាប់ពី​លោក​ក្រឡេកឃើញ​គ្រូបង្វឹក​អាមេរិក Patrick Mouratoglou ធ្វើ​សញ្ញា​ដាក់​កីឡាការិនី Williams ។

          Williams ចាប់ផ្តើម​បង្ហាញឥរិបថមិនល្អ ហើយ​នាង​ត្រូវ​កាត់​​​១ពិន្ទុ​ទៀត​ដោយ​សារ​វាយ​បំបាក់​រ៉ាកែត​មុន​ពេល​ប្រកួត​ចាញ់​ ៤-៣ ។ Williams បាន​​វាយ​ប្រហារពាក្យសម្តីដាក់​លោក Ramos ដោយ​ចោទប្រកាន់​លោកថា ជា​មនុស្សភូត​កុហក់​ និង​ជា​ចោរលួច​ពិន្ទុ​ពី​​នាង៕

adverise with khmeread