ព្រាប សុវត្ថិ ចេញទៅច្រៀងនៅប្រទេសកូរ៉េ នាចុង ខែកញ្ញា​ ខាងមុខនេះហើយ

    ដោយ-ខ្មែររីដ
    ភ្នំពេញ-ជាតារាជួរមុខលំដាប់ប្រទេស តារាចម្រៀង ព្រាប សុវត្ថិ ក៏គ្រោងនឹងចេញសម្តែងនៅប្រទេសកូរ៉េ នៅចុងខែ កញ្ញា ២០១៨ ជាលើកដំបូង ក្រោមការរៀបចំរបស់ចាងហ្វាងផលិតកម្ម Galaxy Production។  

    ថ្លែងប្រាប់អ្នកសារព័ត៌មាន  លោក ឡេង ណាវ៉ាត្រា ម្ចាស់បុរីឡេង ណាវ៉ាត់ត្រា បញ្ជាក់ថា គម្រោងចេញទៅច្រៀងនៅទីនោះ គឺស្ថិតក្រោមការរៀបចំខាងលោក ជាអ្នកចំណាយ​ លោកព្រាប សុវត្ថិ នឹងត្រូវសម្ដែងនៅក្នុងប្រទេសកូរ៉េខាងត្បូងនៅថ្ងៃទី២៤ និង២៥ កញ្ញា នេះហើយ។ 

    ដោយលោកបានចំណាយថវិកា រៀបចំការប្រគំតន្ត្រី២កន្លែង នៅលើទឹកដីនោះ២ថ្ងៃ ជាប់គ្នាតែម្ដង ដើម្បីអោយបងប្អូនជាពលករកូរ៉េបានសប្បាយ។ ក្នុងនោះលោកព្រាប សុវត្ថិ ក៏ប្រកាសបកស្រាយបទចម្រៀងពីជំនាន់ចាស់ៗមួយចំនួន ដើម្បីអោយបងប្អូនដែលមានអារម្មណ៍នឹកស្រុក បានស្ដាប់ហើយធូរចិត្ត។ លោកថា លោកព្រាប សុវត្ថិ ត្រូវច្រៀងនៅក្នុងទីក្រុងសេអូលមួយកន្លែង និងត្រូវច្រៀងនៅទីក្រុងខ្វាងជូរមួយកន្លែង ដោយក្នុងពិធីនោះ ក៏មានវេទិកាឧទ្ទេសនាមពីសំណាក់រូបលោកផ្ទាល់ ដើម្បីចែករំលែកពីគម្រោងអាជីវកម្ម និងពីរបៀបប្រើលុយរាយទៅយកលុយដុំ ដើម្បីអោយបងប្អូនខ្មែរ ឬពលរដ្ឋកូរ៉េ ដែលចង់វិនិយោគនៅក្នុងប្រទេសកម្ពុជាបានទទួលចំណេះដឹង។ 


  
    លោក ឡេង ណាវ៉ាត្រា បន្តថាគម្រោងស្ពុនស័រយកលោកព្រាប សុវត្តិ អោយចេញសម្ដែង គម្រោងចំណាយមិនតិចម៉ឺនដុល្លារនោះទេ ដោយសារតែកន្លែងដែលលោករៀបចំអោយមានការប្រគំតន្ត្រីនោះ សុទ្ធតែចំតំបន់ទីក្រុងធំ សំបូរខ្មែររស់នៅ នឹងត្រូវចំណាយខ្ពស់។ លោកថាខ្លួននឹងមានគម្រោងបើកការប្រគំតន្ត្រីធំៗនៅក្នុងប្រទេសកូរ៉េខាងត្បូងអោយបានញឹកញាប់ ដើម្បីអោយបងប្អូនខ្មែរបានជួបជាមួយតារាល្បីៗ និងបានទទួលចំណេះដឹងពីការវិនិយោគលើគម្រោងដីធ្លី ដើម្បីក្លាយខ្លួនជាអ្នកមានបានដូចលោក។ លោករំពឹងយ៉ាងខ្លាំង ថាវត្តមានរបស់លោក ព្រាប សុវត្ថិ នឹងគក្រើកនៅថ្ងៃទី២៤ និង២៥ កញ្ញានេះ ខណៈដែលសាលដែលលោកគម្រោងដាក់ភ្ញៀវអោយស្ដាប់បទឧទ្ទេសនាមរបស់លោក ក៏មានអ្នកទិញសំបុត្រ និងកក់ទុកកៅអីអស់ច្រើនតាំងពីថ្ងៃនេះទៅហើយ៕

adverise with khmeread