មូលហេតុដែលហុងកុងតូចសោះ តែសម្បូរមហាសេដ្ឋីលុយពាន់លានរស់នៅ

ទីក្រុងហុងកុងជាកន្លែងទាក់ទាញជាយូរយារណាស់មកហើយសម្រាប់អ្នកមានទ្រព្យស្តុកស្តម្ភ។ ភាគច្រើនបំផុតគឺដោយសារតែទីក្រុងហុងកុងនៅតែត្រូវបានគេចាត់ទុកថាជាផ្លូវចូលទៅកាន់ប្រទេសចិន។ វាជាទីក្រុងដ៏ពេញនិយមបំផុតរបស់ចិនដីគោកសម្រាប់អាជីវកម្មអន្តរជាតិ មជ្ឈមណ្ឌលហិរញ្ញវត្ថុសំខាន់បំផុតរបស់អាស៊ី និងនៅតែត្រូវបានគេចាត់ទុកថាជាកន្លែងដ៏ល្អបំផុតសម្រាប់ការភ្ជាប់បណ្តាញ ការធ្វើជំនួញនិងសម្រាប់ឱកាសចូលទៅកាន់ទីផ្សារចិនដីគោកដ៏ធំសម្បើម។

ទីក្រុងហុងកុងក៏មានប្រជាប្រិយភាពផងដែរជាមួយនឹងការចាប់ផ្តើមបើកក្រុមហ៊ុនថ្មីនិងម្ចាស់អាជីវកម្មថ្មីៗ ពីព្រោះវាមានភាពងាយស្រួលនិងចំណាយតិចក្នុងការចាប់ផ្តើមអាជីវកម្មនៅក្នុងទីក្រុងនេះ។ ក្នុងនាមជាជនបរទេស អ្នកអាចកាន់កាប់អាជីវកម្ម ១០០% របស់អ្នក ដោយមិនតម្រូវទាល់តែជាអ្នកក្នុងស្រុកឬកាន់សញ្ជាតិជាក់លាក់ណាមួយនោះឡើយ។ ក្រៅពីនេះហុងកុងបានរក្សាជំហររបស់ខ្លួនជាសេដ្ឋកិច្ចសេរីបំផុតរបស់ពិភពលោកអស់រយៈពេលពីរទសវត្សរ៍មកហើយ និងត្រូវបានចាត់ទុកជាកន្លែងមួយដែលមានអំពើពុករលួយតិចតួចបំផុតមួយនៅលើពិភពលោក ដូច្នេះហើយគេមិនពិបាកយល់ទេថាហេតុអ្វីបានជាហុងកុងជាកន្លែងទាក់ទាញសុទ្ធតែអ្នកមានទ្រព្យស្តុកស្តម្ភមករស់នៅ និង ធ្វើអាជីវកម្ម។

ជាមួយចិនដីគោកដែលជាប្រទេសមហាអំណាចសេដ្ឋកិច្ចទី២លើលោកស្ថិតនៅមាត់ទ្វាររបស់ខ្លួន ហុងកុងនៅតែបន្តទទួលបានផលប្រយោជន៍ពីការជំរុញទំនាក់ទំនងពាណិជ្ជកម្មនិងវិនិយោគទុនជាមួយចិន។ ខណៈដែលទីក្រុងនេះបង្កើនកិច្ចសហប្រតិបត្តិការនិងការចាប់ដៃគូជាមួយចិនដីគោកតាមរយៈផែនការនានាដូចជាផែនការ Greater Bay Area ដែលនឹងធ្វើសមាហរណកម្មទីក្រុងហុងកុងជាមួយទីក្រុងចិនដីគោកចំនួន៩ដើម្បីបង្កើនកំណើនសេដ្ឋកិច្ចនិងការច្នៃប្រឌិតថ្មីនោះ ចំនួនមហាសេដ្ឋីទំនងជានឹងបន្តកើនឡើងទៀត។

ដោយហេតុថាទីក្រុងហុងកុងជាទីផ្សារអចលនទ្រព្យថ្លៃជាងគេបំផុតនៅលើពិភពលោក គេគ្មានអ្វីភ្ញាក់ផ្អើលទេដែលអ្នកមានបំផុតរបស់ទីក្រុងនេះបានកើបលុយកប់ពពកចេញពីអចលនទ្រព្យ។ មហាសេដ្ឋីផុតលេខរបស់ហុងកុងគឺមហាសេដ្ឋីអចលនទ្រព្យ Li Ka-shing ត្រូវបានគេនិយាយថាមានទ្រព្យសម្បត្តិ ២៨ ពាន់លានផោន (៣៥,៤៣ ពាន់លានដុល្លារ)។ សរុបមក ហុងកុងមានមហាសេដ្ឋីពាន់លានដុល្លារចំនួន ៩៣ នាក់ និងជាទីកន្លែងនៃគ្រួសារអ្នកមានបំផុតទាំង ៥០ របស់អាស៊ី។ ទន្ទឹមនឹងនេះដែរ កាលពីឆ្នាំមុន អ្នកមានបំផុត ៥០ នាក់របស់ហុងកុងមានទ្រព្យសម្បត្តិសរុបរួមគ្នាគឺ ២៣៥ ពាន់លានផោន (២៩៨ ពាន់លានដុល្លារ)៕

ប្រភព៖ បរទេស

adverise with khmeread

អ្នកនឹងចូលចិត្ត

tiger
Loading ad ...