រកឃើញសារធាតុគីមីគ្រោះថ្នាក់នៅក្នុងការធ្វើតេស្តខោទ្រនាប់ទឹកនោមទារកដែលផលិតនៅប្រទេសបារាំង

ទីភ្នាក់ងារសុខភាពជាតិរបស់បារាំង Anses និយាយថា​ ខ្លួនបានរកឃើញសារធាតុគីមីក្នុងខោទ្រនាប់ទឹកនោមទារក ដែលលើសពីកម្រិតសុវត្ថិភាព។ នេះបើយោងតាម BBC ចេញផ្សាយកាលពីថ្ងៃពុធ។ 

ការធ្វើតេស្តរកឃើញកម្រិតខ្ពស់ជាងកម្រិតសុវត្ថិភាព សម្រាប់សារធាតុដែលមានគ្រោះថ្នាក់ដល់សុខភាពមនុស្ស និងកម្រិតទាបនៃសារធាតុផ្សេងទៀតរួមទាំងជាតិពុលឈ្មោះ Weedkiller Glyphosate។

ទីភ្នាក់ងារ Anses បាននិយាយថាការធ្វើតេស្តខោទឹកនោមកូនក្មេងរបស់ខ្លួន គឺជាការធ្វើតេស្តលើកដំបូងបង្អស់នៅក្នុងពិភពលោក។

ទីភ្នាក់ងារនេះបានអំពាវនាវឱ្យមានចំណាត់ការឆាប់រហ័សលើ "ដោយពិចារណាទៅលើហានិភ័យ ដែលសារធាតុគីមីទាំងនេះ" អាចដាក់មកលើទារក។

លោកស្រី Agnès Buzyn រដ្ឋមន្រ្តីក្រសួងសុខាភិបាលបារាំងបានថ្លែងថា វាមិនទាន់មានគ្រោះថ្នាក់ធ្ងន់ធ្ងរ ឬហានិភ័យភ្លាមៗចំពោះសុខភាពទារកនៅឡើយទេ។

លោកស្រីបានប្រាប់ទីភ្នាក់ងារសារព័ត៌មាន AFP ថា "ពិតណាស់យើងគួរបន្តស្លៀកខោទ្រនាប់ទឹកនោមដល់ទារករបស់យើង។ យើងបានធ្វើដូច្នេះអស់រយៈពេលយ៉ាងហោចណាស់ ៥០ ឆ្នាំមកហើយ"។

ប៉ុន្តែសេចក្តីថ្លែងការណ៍រួមគ្នាមួយរបស់រដ្ឋមន្រ្តីក្រសួងសុខាភិបាល ក្រសួងបរិស្ថាន និងក្រសួងហិរញ្ញវត្ថុបាននិយាយថា រដ្ឋាភិបាលបារាំងបានផ្តល់ពេលឱ្យគ្រប់រោងចក្រផលិតខោទ្រនាប់ទឹកនោមកូនក្មេង ១៥ ថ្ងៃ ដើម្បីបង្កើតផែនការសកម្មភាពមួយដើម្បីលុបបំបាត់សារធាតុពុលទាំងនោះ។

លោកស្រី Buzyn បាននិយាយថា រដ្ឋាភិបាលនឹងទទួលយកការពន្យារពេលរហូតដល់ ៦ ខែសម្រាប់រោងចក្រទាំងនោះផ្លាស់ប្តូរវិធីសាស្ត្រផលិត៕
 

adverise with khmeread