ម្ចាស់ Facebook ខាតលុយ៩ពាន់លានដុល្លារ ឥឡូវធ្លាក់ចំណាត់ថ្នាក់មកត្រឹមលេខ៨ ចំណែកមហាសេដ្ឋីកំពូលទាំង៣ រក្សាតំណែងបានដដែល

លោក Jeff Bezos នៅតែជាមហាសេដ្ឋីដែលមានទ្រព្យសម្បតិ្តច្រើនជាងគេនៅលើពិភពលោក ដោយនាំមុខលោក Bill Gates និងលោក Warren Buffett។ នេះបើយោងតាមបញ្ជីមហាសេដ្ឋីផុតលេខរបស់ទស្សនាវដ្តី Forbes។

ប៉ុន្តែខណៈដែលអ្វីៗមានស្ថិរភាពនៅទីកំពូលនៅក្នុងតារាងចំណាត់ថ្នាក់នេះ ស្ថាបនិករបស់ក្រុមហ៊ុន Facebook លោក Mark Zuckerberg បានធ្លាក់ចុះចំនួន ៣ កាំ ហើយអតីតអភិបាលក្រុងញូវយ៉កលោក Michael Bloomberg បានកើនឡើងចំនួន ២ កាំ។

យោងតាមបញ្ជីដែលបានប្រកាសកាលពីថ្ងៃអង្គារទី៥មីនាដោយទស្សនាវដ្តី Forbes បានឱ្យដឹងថា ទ្រព្យសម្បត្តិរបស់លោក Bezos អាយុ ៥៥ ឆ្នាំបានកើនឡើងចំនួន ១៩ ពាន់លានដុល្លារក្នុងរយៈពេល ១ ឆ្នាំហើយបច្ចុប្បន្នគាត់មានទ្រព្យសម្បត្តិចំនួន ១៣១ ពាន់លានដុល្លារ។

លោក Bezos ដែលមានភាគហ៊ុន ១៦ ភាគរយក្នុងក្រុមហ៊ុន Amazon ហើយដែលទ្រព្យសម្បត្តិរបស់គាត់ឥឡូវនេះបានធ្វើឱ្យគាត់ក្លាយជាគោលដៅរបស់ពួកឆ្វេងនិយមរបស់គណបក្សប្រជាធិបតេយ្យរបស់អាមេរិកនោះ បានពង្រីកគម្លាតទ្រព្យសម្បត្តិកាន់តែធំខ្លាំងឡើងរវាងរូបគាត់និងមហាសេដ្ឋីចិត្តសប្បុរសនិងជាសហស្ថាបនិករបស់ Microsoft លោក Bill Gates។

ទស្សនាវដ្តី Forbes និយាយថា លោក Bill Gates អាយុ ៦៣ ឆ្នាំបានកើនទ្រព្យសម្បត្តិដល់ ៩៦,៥ ពាន់លានដុល្លារ​ គឺកើនឡើងពី ៩០ ពាន់លានដុល្លារធៀបនឹងឆ្នាំមុន។

ចំណាត់លេខ ៣ គឺកាន់កាប់ដោយលោក Warren Buffett អាយុ ៨៨ ឆ្នាំ។ លោកត្រូវបានគេចាត់ទុកថាជាកំពូលអ្នកវិនិយោគជាយូរមកហើយ ប៉ុន្តែលោកបានទទួលរងការខាតបង់កាលពីចុងខែកុម្ភៈដោយសារការធ្លាក់ចុះយ៉ាងខ្លាំងក្នុងភាគហ៊ុនរបស់ក្រុមហ៊ុនផលិតអាហារកែច្នៃអាមេរិក Kraft Heinz ដែលគាត់បានវិនិយោគ។

ទស្សនាវដ្តីនេះបានប៉ាន់ប្រមាញថា ទ្រព្យសម្បត្តិរបស់លោក Warren Buffett បានធ្លាក់ចុះចំនួន ១,៥ ពាន់លានដុល្លារមកនៅត្រឹម ៨២,៥ ពាន់លានដុល្លារ។

នាយកប្រតិបត្តិនៃក្រុមហ៊ុនលក់ផលិតផលប្រណីតរបស់បារាំង LVMH លោក Bernard Arnault ឈរនៅលំដាប់លេខ ៤។ ប៉ុន្តែលោក Zuckerberg បានខាតបង់ទ្រព្យសម្បត្តិសុទ្ធចំនួន ៩ ពាន់លានដុល្លារនិងបានធ្លាក់ចុះពីលេខ ៥ មកលេខ ៨។

អ្នកដែលនាំមុខលោកហ្សាក់ឃើបឺកឥឡូវនេះគឺមហាសេដ្ឋីម៉ិកស៊ិកលោក Carlos Slim លោក Amancio Ortega ជនជាតិអេស្ប៉ាញ ដែលជាសហស្ថាបនិកក្រុមហ៊ុន Zara and Inditex និងលោក Larry Ellison សហស្ថាបនិកក្រុមហ៊ុន Oracle។

Forbes បានឱ្យដឹងថា លោក Michael Bloomberg បានឡើងពីចំណាត់លេខ ១១ ទៅលេខ៩ ខណៈទ្រព្យសម្បត្តិរបស់គាត់បានកើនឡើងដល់ ៥៥,៥ ពាន់លានដុល្លារពី ៥០ ពាន់លានដុល្លារ។

ជនជាតិអាមេរិកនៅតែគ្របដណ្ដប់លើបញ្ជីមហាសេដ្ឋីលើពិភពលោក ជាមួយមហាសេដ្ឋីកំពូល ១៤ នាក់ក្នុងចំណោមមហាសេដ្ឋីកំពូល ២០ នាក់គឺមកពីសហរដ្ឋអាមេរិក។

មហាសេដ្ឋីផ្សេងទៀតក្រៅពីជនជាតិអាមេរិកនៅក្នុងចំណោមអ្នកទាំង ២០ នាក់នោះ មានដូចជា មហាសេដ្ឋីឥណ្ឌាលោក Mukesh Ambani ប្រធានក្រុមហ៊ុន Reliance Industries ជាប់ចំណាត់ថ្នាក់លេខ ១២ និងលោក Ma Huateng របស់ចិន ដែលជាប្រធានក្រុមហ៊ុនបច្ចេកវិជ្ជាយក្សចិន Tencent ជាប់ចំណាត់ថ្នាក់លេខ ២០៕

adverise with khmeread

អ្នកនឹងចូលចិត្ត