adverise with khmeread 1

ការសិក្សា​គួរឱ្យភ្ញាក់ផ្អើល​៖ ជំងឺមហារីក​សុដន់​ដំណាក់កាល​ចុងក្រោយ​អាច​កម្ចាត់​ចេញ​បាន​និង​អាច​ពន្យារ​ជីវិត​បាន ២៤ ឆ្នាំ​

    ​ជំងឺមហារីក​សុដន់​ដំណាក់កាល​ចុងក្រោយ​អាច​នឹង​កម្ចាត់​ចេញ​បាន ក្នុងការ​ស្រាវជ្រាវ "​ដ៏​គួរឱ្យភ្ញាក់ផ្អើល​មួយ​" ដែល​នាំ​ក្តីសង្ឃឹម​ឡើងវិញ​សម្រាប់​ព្យាបាល​ស្ត្រី​កើត​មហារីក​សុដន់​រាប់ពាន់នាក់​។ នេះ​បើតាម​វេ​ប​សាយ​ដេលី​មែ​ល​ចេញផ្សាយ​កាលពី​ថ្ងៃទី ១៤ ខែមីនា​។

​    ​ក្នុងការ​ធ្វើតេស្ត​លើស​ត្វ​កណ្តុរ មហារីក​របស់​កណ្តុរ​បាន​បាត់​ទាំងស្រុង​សម្រាប់​រយៈពេល​យ៉ាងតិច ៨ ខែ​។ ចំនួន​នេះ​គឺ​ស្មើនឹង​រយៈពេល ២៤ ឆ្នាំ​សម្រាប់​ស្ត្រី និង​អាច​ចាត់ទុកជា​ការព្យាបាល​ជាសះស្បើយ​រយៈពេល​យូរអង្វែង​។

​    ​ផ្ទុយ​មកវិញ ការព្យាបាល​បច្ចុប្បន្ន​អាច​ពន្យារ​ជីវិត​បានត្រឹមតែ ៦ ខែ​ប៉ុណ្ណោះ​។

​    ​ក្រុម​អ្នកស្រាវជ្រាវ​អាមេរិក​បាន​និយាយថា បើទោះបីជា​វា​អាច​ជោគជ័យ​ចំពោះ​មនុស្ស​តែមួយ​ផ្នែក​ក៏ដោយ តែ​វា​អាចជួយ​កែប្រែ​វិធី​ព្យាបាល​ជំងឺមហារីក​។

​    ​លោក​វេជ្ជបណ្ឌិត Mauro Ferrari ប្រធាន​វិទ្យាស្ថាន Houston Methodist Research Institute បាន​និយាយថា "​ខ្ញុំ​មិន​ហ៊ាន​សន្យា​ឱ្យ​ហួសប្រមាណ​ចំពោះ​អ្នកជំងឺ​រាប់ពាន់នាក់ ដែល​កំពុង​ស្វែងរក​ការព្យាបាល​នោះទេ ប៉ុន្តែ​ទិន្នន័យ​ស្រាវជ្រាវ​នេះ​គឺ​ពិតជា​គួរឱ្យភ្ញាក់ផ្អើល​"​។

​    ​ទោះយ៉ាងណា ក្រុម​អ្នកជំនាញ​អង់គ្លេស​បាន​ក្រើន​រំលឹកថា អ្វី​ដែលមាន​ប្រសិទ្ធភាព​ក្នុង​មន្ទីរពិសោធន៍​មិនមែន​ចេះតែមាន​ប្រសិទ្ធភាព​ចំពោះ​អ្នកជំងឺ​ពិតៗ​នោះទេ និង​បាន​និយាយថា ការស្រាវជ្រាវ​បន្ថែមទៀត​ចាំបាច់​ត្រូវតែ​ធ្វើឡើង​។

​    ​ការផ្តោត​សំខាន់​របស់លោក​វេជ្ជបណ្ឌិត Ferrari គឺ​ទៅលើ​ជំងឺមហារីក​រាលដាល ឬ​មហារីក​ដែល​រាលដាល​ពី​សុដន់​ទៅ​ផ្នែក​ផ្សេង​នៃ​រាងកាយ ដូចជា សួត ថ្លើម ឬ​ឆ្អឹង​។

​    ​ខណៈ​ដុំ​សាច់​មហារីក​ដំបូង ដែល​លេចចេញ​លើ​សុដន់​ស្ត្រី​កម្រ​សម្លាប់​អ្នកជំងឺ តែ​នៅពេល​ជំងឺ​ចាប់ផ្តើម​ស៊ី​ផ្នែក​ផ្សេងទៀត​នៃ​រាងកាយ វា​នឹង​មិនអាច​ព្យាបាល​បានឡើយ​។

​    ​ថ្នាំ​បច្ចុប្បន្ន​មានការ​លំបាក​ចូលទៅ​ដល់​ដុំ​សាច់​មហារីក ដែល​លាក់ខ្លួន​ជ្រៅ​នៅក្នុង​សួត ឬ​ថ្លើម ហើយ​នៅពេល​ថ្នាំ​ទៅដល់​ទីនោះ វា​នឹង​ប្រឈម​នឹង​ការ​រុញច្រាន​ចេញ​វិញ​ដោយ​កោសិកា ដែល​ស៊ាំ​នឹង​ការព្យាបាល​។

​    ​លោក​វេជ្ជបណ្ឌិត Ferrari បាន​រកឃើញ​វិធី​ដ៏​ប៉ិនប្រសព្វ​ក្នុងការ​ចូលទៅ​កន្លែង​ការពារ​នោះ ហេតុដូច្នេះ​ហើយ​គេ​ពិតជា​អាចមាន​លទ្ធភាព​ព្យាបាល​ជំងឺមហារីក​រាលដាល​នោះបាន​។

​    ​លោក​បាន​យក​ថ្នាំ​ព្យាបាល​មហារីក​និយម​ប្រើ​បំផុត​ហៅថា Doxorubicin និង​ខ្ចប់​វា​នៅក្នុង​បន្ទះ​មីក្រូ​ទស្សន៍​ដែល​ផលិត​ពី​ស៊ី​លី​កូន​។

​    ​ស៊ី​លី​កូន​ដែល​ខ្ចប់​ថ្នាំ​នោះបាន​លាក់ខ្លួន​ពី​ជំងឺមហារីក ហើយ​អាច​លបចូល​ទៅដល់​កោសិកា​របស់​មហារីក​។ នៅពេល​ចូលទៅ​ដល់​កោសិកា​មហារីក ស៊ី​លី​កូន​នោះបាន​រលាយ ហើយ​បញ្ចេញ​ថ្នាំ​នោះ ដោយ​រត់​យ៉ាងសកម្ម​នៅក្នុង​កោសិកា​មហារីក ហើយ​កោសិកា​មហារីក​ក៏ត្រូវ​បានសម្លាប់​។​

​    ​ក្នុងការ​ធ្វើតេស្ត​លើស​ត្វ​កណ្តុរ​ដែល​កើត​មហារីក​ដំណាក់កាល​ចុងក្រោយ រាល់​កណ្តុរ​ដែល​ទទួល​ការព្យាបាល​តាមរបៀប​ទូទៅ​បច្ចុប្បន្ន​បាន​ងាប់​ទាំងអស់​។

​     ផ្ទុយ​មកវិញ កណ្តុរ​ចំនួន​ពាក់កណ្តាល​ដែល​ទទួល​ការព្យាបាល​តាមរបៀប​ថ្មី​នៅតែ​ពុំមាន​ដុំ​សាច់​មហារីក​ក្នុង​ខ្លួន​វា បន្ទាប់ពី​ព្យាបាល​រយៈពេល ៨ ខែ ពោលគឺ​ស្មើនឹង ២៤ ឆ្នាំ​សម្រាប់​ស្ត្រី​៕ 

 

adverise with khmeread
ប្រភព៖ ដេលី​មែ​ល​

អ្នកនឹងចូលចិត្ត

មតិយោបល់