លួចឆក់រាប់ភ្លេចបានលុយទិញថ្នាំញៀនជក់​, ជាប់គុកច្រើនលើក​ ឥឡូវជាប់គុកម្តងទៀត

​ភ្នំពេញ​ ៖​ ជនសង្ស័យ៤នាក់ជាក្រុមចោរលួចគាស់ផ្ទះ, លួចម៉ូតូរបស់ប្រជាពលរដ្ឋនិងឆក់តាមផ្លូវយ៉ាងសកម្ម ហើយថែមទាំងធ្លាប់ជាប់ពន្ធនាគារព្រៃស ជាច្រើនលើកចំនួន២នាក់ទៀត គឺជាអ្នកប្រើប្រាស់គ្រឿងញៀនជាមួយគ្នា​ ត្រូវបានកម្លាំង​កងរាជអាវុធហត្ថរាជធានីភ្នំពេញបញ្ជូនទៅតុលាការ​ នាថ្ងៃទី៣ ខែកញ្ញា ឆ្នាំ២០១៩នេះ ដើម្បីផ្តន្ទាទោសតាមច្បាប់។ 

​មន្ត្រីអាវុធហត្ថនិយាយថា​ កាលពីថ្ងៃទី៣០ ខែសីហា ឆ្នាំ២០១៩ វេលាម៉ោង១១ និង៣០នាទី នៅចំណុចភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ កម្លាំងមូលដ្ឋានអាវុធហត្ថខណ្ឌពោធិ៍សែនជ័យ បានឆ្មក់បង្ក្រាបបានជនសង្ស័យ៤នាក់កំពុងជក់គ្រឿងញៀន ហើយជាមុខសញ្ញាលួចឆក់មិនរៀងចាល ទោះបីធ្លាប់ជាប់ពន្ធនាគារជាច្រើនលើកយ៉ាងណាក៏ដោយ រួចនាំយកមកទីបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីធ្វើការសួរចម្លើយ។

​មន្ត្រីដដែលបន្តថា​ ជនសង្ស័យ១-ឈ្មោះ ភាន់ សុខា ហៅផាន់ ឌី ភេទប្រុស អាយុ ៣០ឆ្នាំ, ២-ឈ្មោះ ធី រឹទ្ធ ហៅខ្មៅ ភេទប្រុស អាយុ ៣៤ឆ្នាំ, ៣-ឈ្មោះ ម៉ៅ សុខ ហៅជា ភេទប្រុស អាយុ ៣១ឆ្នាំ និង៤-ឈ្មោះ សាន្ត ភារៈ ភេទប្រុស អាយុ ២២ឆ្នាំ​ ។ 

ក្រោមវិធានការជំនាញរបស់សមត្ថកិច្ចការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ​ ជនសង្ស័យឈ្មោះ ភាន់ សុខា ហៅផាន់ ឌី បានសារភាពថា​ រូបគេធ្លាប់ជាប់ពន្ធនាគារព្រៃសកាលពីថ្ងៃទី៨ ខែមករា ឆ្នាំ២០១៧ រយៈពេល២ឆ្នាំ ករណីប្រើប្រាស់គ្រឿងញៀន ចេញមកវិញកាលពីថ្ងៃទី០៨ មករា ឆ្នាំ២០១៩។ លុះរហូតដល់អំឡុងខែមិថុនា ឆ្នាំ២០១៩ រូបគេបានស្គាល់បុរសម្នាក់ឈ្មោះ យក្ស នៅកន្លែងលេងហ្គេម។
 
​ក្រោយមករូបគេបានបបួលគ្នាដើរលួច បន្ទាប់ពីលេងហ្គេមបាញ់ត្រីចាញ់អស់ ហើយរូបគេទាំងពីរនាក់ធ្លាប់ធ្វើសកម្មភាពលួចជាមួយគ្នា៣លើក គឺលើកទី១-ក្នុងអំឡុងចុងខែមិថុនា ឆ្នាំ២០១៩ បានធ្វើសកម្មភាពលួចបានម៉ូតូ ០១គ្រឿង ម៉ាកវ៉េវ ពណ៌ទុំព្រីង នៅចំណុចភូមិព្រៃស យកទៅលក់នៅម្តុំវត្ថអង្គតាម៉ិញ បានតម្លៃ២៥០ដុល្លារអាមេរិក, លើកទី២-លួចបានម៉ូតូ ០១គ្រឿង ម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១៩ ឡើងតែម ២០១៩ នៅចំណុចភូមិព្រៃស លក់បានតម្លៃ១៥០ដុល្លារអាមេរិក, លើកទី៣-នៅថ្ងៃទី២៩ ខែសីហា ឆ្នាំ២០១៩ បានធ្វើសកម្មភាពលួចបានម៉ូតូ ០១គ្រឿង ម៉ាកឌូក ពណ៌ខ្មៅ លាយក្រហម នៅចំណុចភូមិព្រៃល្វា ហើយឈ្មោះ យក្ស បានប្រាប់ឱ្យរូបគេជិះម៉ូតូនោះ ចេញពីម្តុំរោងចក្រ៦ជាន់ ទៅលក់នៅម្តុំច្បារអំពៅ។ 

​លុះពេលរូបគេជិះដល់ម្តុំផ្សារដើមថ្កូវ ក៏វង្វេងផ្លូវហើយម៉ូតូក៏ខូច រូបគេបានអូសម៉ូតូនោះ ទៅផ្ញើនៅកន្លែងលេងហ្គេមនៅក្បែរនោះ ហើយរូបគេបានជិះកង់បីត្រឡប់មករោងចក្រ៦ជាន់វិញ។ រហូតដល់ថ្ងៃទី៣០ ខែសីហា ឆ្នាំ២០១៩ វេលាម៉ោង០៩ ខណៈដែលរូបគេកំពុងលេងហ្គេមម្តុំរោងចក្រ៦ជាន់នោះ ក៏មានសមត្ថកិច្ចអាវុធហត្ថចុះមកឃាត់ខ្លួនរូបគេតែម្តង។

​ជនសង្ស័យឈ្មោះ ធី រឹទ្ធ ហៅខ្មៅ បានសារភាពថា តាំងពីឆ្នាំ ២០១៣ រហូតដល់បច្ចុប្បន្ន រូបគេតែងតែប្រើប្រាស់គ្រឿងញៀនជាប្រចាំ ជាមួយបក្សពួក ០៤នាក់ទៀត មានឈ្មោះ ឆន ដាវីដ ភេទប្រុស អាយុ ២២ឆ្នាំ, ឈ្មោះ ធី ភេទប្រុស អាយុ ១៩ឆ្នាំ, ឈ្មោះ ព្រំ ស្រីម៉ៅ ភេទស្រី អាយុ ១៩ឆ្នាំ, ឈ្មោះ ភ័ក្រ្ក អាយុ ២៨ឆ្នាំ។

​កាលអំឡុងឆ្នាំ២០១៥ រូបគេ និងបក្ខពួក ខាងលើ បានធ្វើសកម្មភាពលួចគាស់ផ្ទះប្រជាពលរដ្ឋ យកទ្រព្យសម្បត្តិ ចំនួន ០៤លើក​ គឺលើកទី១-ធ្វើសកម្មភាពលួចគាល់ផ្ទះប្រជាពលរដ្ឋ នៅភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ លួចបានសម្ភារៈមួយចំនួន លក់បានប្រាក់ ១០ម៉ឺនរៀល ចែកគ្នា, លើកទី២- ធ្វើសកម្មភាពលួចគាល់បន្ទប់ជួលនៅម្តុំអគារលឿង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ យកបានកង្ហារ ចង្ក្រានហ្កាស និងសម្ភារៈផ្សេងទៀត យកទៅលក់បានប្រាក់ ០៨ម៉ឺនរៀល, លើកទី៣- ធ្វើសកម្មភាពលួចគាស់បន្ទប់ជួលនៅមុខរោងចក្រ៦ជាន់ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ យកបាន កង្ហារ ចង្រ្កានហ្កាស យកទៅលក់បានប្រាក់ ១០ម៉ឺនរៀល, លើកទី៤- ធ្វើសកម្មភាពលួចគាល់បន្ទប់ជួលនៅមុខរោងចក្រ៦ជាន់ ភូមិត្រពាំងថ្លឹង សង្កាត់ចោមចៅ ខណ្ឌពោធ៍សែនជ័យ លួចមានកង្ហារ ចង្ក្រានហ្កាស លក់បានប្រាក់ ០៧ម៉ឺនរៀល។

​បន្ទាប់មករូបគេ និងបក្ខពួកទាំង ០៤នាក់នោះ ត្រូវបានសមត្ថកិច្ចស្រាវជ្រាវឃាត់ខ្លួនបាន នៅក្នុងផ្ទះជួល ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ហើយបានកសាងសំណុំរឿងបញ្ជូនទៅតុលាការ ដាក់ឱ្យជាប់ពន្ធនាគារព្រៃស រយៈពេល ០៤ឆ្នាំ។ រហូតមកដល់ថ្ងៃទី២៨ ខែកុម្ភៈ ឆ្នាំ២០១៩ រូបគេ បានចេញពីពន្ធនាគារមកវិញ។ បន្ទាប់មកក្នុងខែកក្កដា-សីហា ឆ្នាំ២០១៩ រូបគេបានធ្វើសកម្មភាពលួចឆ្កឹះសោបង្អួចតែម្នាក់ឯង ចូលក្នុងបន្ទប់ជួលក្នុងភូមិត្រពាំងថ្លឹងលួចយកទូរស័ព្ទដៃតាមបន្ទប់ ចំនួន ៣០លើក បានសម្រេចប្រហែល១០លើក ហើយបានយកទូរស័ព្ទដែលលួចបានទៅលក់នៅផ្សារត្រពាំងថ្លឹងបានប្រាក់៣០ដុល្លារអាមេរិក ទៅ៥០ដុល្លារអាមេរិក។ 

​រហូតដល់ថ្ងៃទី២៣ ខែសីហា ឆ្នាំ២០១៩ រូបគេបានធ្វើសកម្មភាពលួចឆ្កឹះសោបង្អួចបន្ទប់ជួលនៅចំណុចរោងចក្រប្រាំមួយជាន់ ភូមិត្រពាំងថ្លឹង លួចបានទូរស័ព្ទម៉ាក រីវ៉ូ ពណ៌ក្រហម យកទៅលក់នៅផ្សារត្រពាំងថ្លឹងបានប្រាក់ ៣០ដុល្លាអាមេរិក រួចរូបគេបានទៅទិញគ្រឿងញៀនយកទៅប្រើប្រាស់ក្នុងបន្ទប់ជួល។ លុះដល់ថ្ងៃទី៣០ ខែសីហា ឆ្នាំ២០១៩ វេលាម៉ោង០៩ និង៤៥នាទី ខណៈពេលដែលរូបគេកំពុងជក់គ្រឿងញៀនក្នុងបន្ទប់ជួល ស្រាប់តែមានសមត្ថកិច្ចអាវុធហត្ថចុះមកឃាត់រូបខ្លួនតែម្តង។

​ចំណែកជនសង្ស័យឈ្មោះ ម៉ៅ សុខ ហៅជា, ឈ្មោះ សាន្ត ភារៈ បានប្រាប់ឱ្យដឹងថា ពួកគេមិនដែលធ្វើសកម្មភាពលួចនោះទេ។ ប៉ុន្តែពួកគេធ្លាប់ប្រើប្រាស់គ្រឿងញៀនជាមួយ ឈ្មោះ ភាន់ សុខា ហៅផាន់ ឌី(ឃាត់ខ្លួន), ឈ្មោះ ធី រឹទ្ធ ហៅខ្មៅ(ឃាត់ខ្លួន)តែប៉ុណ្ណោះ​៕

adverise with khmeread
tiger
Loading ad ...