ជម្លោះអ្នកជិតខាង! អ្នកហូបបួសប្តឹងអ្នកហូបសាច់ទៅតុលាការ រឿងបបួលមិត្តភក្តិមកអាំងសាច់រាល់ថ្ងៃ

មនុស្សភាគច្រើនពិតណាស់ប្រាកដជាពេញចិត្តបំផុតជាមួយនឹងក្លិនសាច់ឈ្ងុយៗដែលគ្រាន់តែនឹកឃើញគឺកូរពោះយ៉ាងខ្លាំង ប៉ុន្តែផ្ទុយទៅវិញស្រ្តីម្នាក់បានសម្រេចចិត្តប្តឹងអ្នកជិតខាងរបស់នាង ជុំវិញបញ្ហាដែលពួកគេបានដុតសាច់នៅខាងក្រៅផ្ទះស្ទើររាល់ថ្ងៃ។

នាង Cilla Carden អ្នកតមសាច់មួយរូបមកពីទីក្រុង Perth ប្រទេសអូស្រ្តាលី បានប្រាប់ទៅវេបសាយ 9 News ថា នាងពិតជាមានការខកចិត្តយ៉ាងខ្លាំងជុំវិញការសម្រេចចិត្តដុតសាច់នៅទីធ្លាក្រៅផ្ទះរបស់អ្នកជិតខាងរបស់នាង ហើយវាបានធ្វើឱ្យនាងមិនអាចចេញក្រៅស្រូបខ្យល់បរិសុទ្ធបានទេ។

នាងបាននិយាយថា "ពួកគេបានដាក់ចង្ក្រានដុតសាច់នៅទីនោះ ហើយខ្ញុំធំក្លិនខ្លាំងជាងគេគឺត្រី។ ខ្ញុំមិនអាចរីករាយលំហែលកាយនៅទីធ្លាក្រៅផ្ទះរបស់ខ្ញុំបានទេ ខ្ញុំមិនអាចចេញក្រៅបានទេ"។ នាងជឿថា ការដុតសាច់របស់អ្នកជិតខាងនាងគឺជា "ចេតនា"។

នាង Carden បាននិយាយថា នាងក៏ខឹងនឹងផ្សែងបារី និងសំឡេងក្មេងលេងបាល់បោះដែរ។ ប៉ុន្តែអ្នកជិតខាងនាងបាននិយាយប្រាប់ទៅវេបសាយ 9 News ថា ពួកគេបានយកចង្រ្កានអាំងសាច់ និងបង្គោលបាល់បោះនោះចេញអស់ហើយ។ យ៉ាងណាក្តី​ នាង Carden នៅតែប្តឹងអ្នកជិតខាងនាងទៅតុលាការ។ សំណើរបស់លោកស្រីត្រូវបានបដិសេធដោយសាលាក្តីរដ្ឋបាលអូស្រ្តាលីខាងលិច។ នេះបើយោងតាមវេបសាយ The Evening Standard។ នាងបានប្តឹងឧទ្ធរណ៍ចំពោះការសម្រេចចិត្តរបស់តុលាការមួយនោះ ហើយការប្តឹងឧទ្ធរណ៍របស់នាងមួយនោះក៏ត្រូវបានបដិសេធផងដែរ។

ប៉ុន្តែយោងតាមសេចក្តីរាយការណ៍របស់អូស្រ្តាលីបានឱ្យដឹងថា Carden គឺនៅតែគ្រោងបន្តការតស៊ូផ្នែកច្បាប់របស់នាង។ ហើយទន្ទឹមនឹងនោះមនុស្សមួយចំនួនមានគម្រោងធ្វើសាច់អាំង BBQ ដើម្បីចម្អកដល់នាងផងដែរ ដោយពួកគេបានបង្កើតព្រឹត្តិការណ៍មួយនៅលើ Facebook មានឈ្មោះ Community BBQ for Cilla Carden (សហគមន៍ BBQ សម្រាប់ Cilla Carden) នៅថ្ងៃ ១៩ខែតុលាខាងមុខក្នុងទីក្រុង Perth ដែលមានមនុស្សចូលរួមរាប់ពាន់នាក់ភ្លាមៗ៕

adverise with khmeread
tiger
Loading ad ...