adverise with khmeread  88784892 hi012286213

សាក្សី​៖ កាំភ្លើង​ប្រឆាំង​យន្តហោះ​និង​កាំភ្លើង​ធំ​មិនអាច​បំផ្លាញ​រូបសំណាក​ព្រះពុទ្ធ​នៅ​អា​ហ្វ​ហ្គា​នី​ស្ថាន​បានទេ​កាលពី​ឆ្នាំ​២០០១

រូបសំណាក​ព្រះពុទ្ធ​យក្ស​ពីរ​អាយុកាល​ជិត ១.៥០០ ឆ្នាំ ត្រូវបាន​ឆ្លាក់​នៅក្នុង​ជម្រាល​ថ្មភក់​នៅ​ជិត​ទីក្រុង Bamiyan នៃ​ភូមិភាគ​កណ្តាល​ប្រទេស​អា​ហ្វ​ហ្គា​នី​ស្ថាន​។ ហើយ​កាលពី​ថ្ងៃ​ពុធ ទី​១៦ ម្សិលមិញ​នេះ​គឺជា​ថ្ងៃ​រំលឹក​ខួប​នៃ​ការកម្ទេច​រូបសំណាក​ដ៏​មានតម្លៃ​នេះ​។

​នៅក្នុង​រយៈកម្ពស់ ៥០ ម៉ែត្រ រូបសំណាក​ព្រះពុទ្ធ Bamiyan ត្រូវបាន​ឆ្លាក់​ដោយ​ព្រះសង្ឃ​នៅ​អំឡុង​សតវត្ស​ទី ៦ នា​ពេលដែល​ទីក្រុង​មួយ​នេះ​នៅ​ជា​មជ្ឈមណ្ឌល​សាសនា​ដ៏​សំខាន់​នៅតាម​បណ្តោយ​ផ្លូវ​សូត្រ​ដែល​ភ្ជាប់​ប្រទេស​ចិន​ទៅ​ប្រទេស​លោកខាងលិច​។​

​អំឡុង​ឆ្នាំ ២០០១ មេដឹកនាំ​ប្រទេស​តា​លី​បង់​លោក Mullah Omar បាន​បញ្ជា​ឱ្យ​ពួកគេ​កម្ទេច​រូបសំណាក​សាសនា​មួយ​នេះ​ដោយ​បង្ក​ការតក់​ស្ល​ត់​យ៉ាងខ្លាំង​ចំពោះ​ប្រជាជន​កាន់សាសនា​ព្រះពុទ្ធ​ជុំវិញ​ពិភពលោក​។​

​កងកម្លាំង​របស់​មេដឹកនាំ​រូបនេះ​បាន​ព្យាយាម​ប្រើប្រាស់​កាំភ្លើង​ប្រឆាំង​យន្តហោះ និង​កាំភ្លើង​ធំ ប៉ុន្តែ​មិនអាច​កម្ទេច​រូបសំណាក​ដ៏​ធំ​នេះឡើយ​។​

​នៅ​ទីបំផុត ក្រុម​កសិករ​ក្នុង​តំបន់​នោះ​ត្រូវបាន​បង្គាប់​បានដាក់​គ្រាប់បែក​រាប់​តោន​ដើម្បី​បំផ្ទុះ​រូបសំណាក់​ទាំងពីរ​នេះ​។​

​កសិករ​ក្នុងភូមិ​លោក Sayid Mirza Hossein ត្រូវបាន​បង្ខំ​ឱ្យ​លូកដៃ​ចូលទៅក្នុង​រឿង​ដ៏​អាក្រក់​មួយ​នេះ​រយៈពេល​ជាច្រើន​សប្តាហ៍​។ គាត់​គឺជា​សាក្សី​ដែល​បានផ្តល់​ព័ត៌មាន​អំពី​ឥទ្ធិពល​អាក្រក់​នៃ​ការបំផ្លិចបំផ្លាញ​មួយ​នេះ​។​

​លោក Mirza Hossein បាន​និយាយ​រៀបរាប់​ប្រាប់ថា "​ថ្ងៃមួយ​ដែល​ខ្ញុំ​បាន​កម្ទេច​រូបសំណាក​ព្រះពុទ្ធ Bamiyan វា​ហាក់ដូចជា​បាន​កម្ទេច​លំនៅដ្ឋាន​ផ្ទាល់​របស់ខ្ញុំ​អ៊ីចឹង​។ ទីក្រុង Bamiyan មាន​រូបសំណាក​ព្រះពុទ្ធ​បី​អង្គ ដែលមាន​តម្លៃ​បំផុត​សម្រាប់​ប្រជាជន​នៅទីនេះ​។ ភ្ញៀវទេសចរ​នឹង​មក​ទស្សនា​រូបសំណាក​ទាំងនេះ​។ ព្រះ​ពុទ្ធអង្គ​ទាំងនេះ​ពិតជា​មានតម្លៃ​រក​អ្វី​ប្រៀបផ្ទឹម​ពុំបាន​នៅក្នុង​ពិភពលោក​នេះ ហើយ​ពួកយើង​នឹង​ទទួលបាន​អត្ត​ញ្ញាណ​នៃ​តម្លៃ​សម្រាប់​ព្រះ​ពុទ្ធរូប Bamiyan "​។​

"​ខ្ញុំ​គ្រាន់​ជា​កសិករ​សាមញ្ញ​ម្នាក់ ខ្ញុំ​រស់នៅក្នុង​រូងភ្នំ​។ មាន​ពាក្យ​ចចាមអារ៉ាម​មួយចំនួន​បាន​និយាយថា ពួក​តា​លី​ប៉ង់​នឹង​មកកាន់​កាប់ Bamiyan​។ ពេលដែល​ពួកគេ​មកដល់​ពួកគេ​បាន​ចាប់​ខ្ញុំ​ញាត់​គុក ជាមួយនឹង​ប្រជាជន​រាប់រយ​នាក់​ផ្សេងទៀត​"​។​

"​ដំបូង​ពួកគេ​បាន​យក​អាវុធ​ធន់​ធ្ងន់​ដាក់​នៅមុខ​រូបសំណាក​ព្រះពុទ្ធ ពួកគេ​បានធ្វើការ​វាយប្រហារ​រូបសំណាក​ទាំងនេះ​ជាមួយនឹង​រថក្រោះ និង​គ្រាប់​រ៉ុក្កែត​។ ប៉ុន្តែ​ពួកគេ​មិនអាច​កម្ទេច​រូបសំណាក់​ទាំងនេះ​បានឡើយ​"​។​

"​ពួកគេ​បាន​ដឹក​រំសេវ​ផ្ទុះ​ពី​ទីក្រុង Kandahar និង Marzar​។ ពួកយើង​បាន​រើ​គ្រាប់រំសេវ​ទាំងនោះ ហើយ​នាំ​ពួកគេ​ទៅកាន់​រូបសំណាក​ព្រះពុទ្ធ ពួកវា​បាន​នាំ​ពួកយើង​ទៅជា​មួយ​ពីរ​ទៅ​បី​ថ្ងៃ​"​។

"​ពួកយើង​មិនអាច​និយាយថា​ទេ​បានឡើយ ពួកយើង​មិនអាច​និយាយថា​យើង​មិន​បំផ្ទុះ​រូបសំណាក​ព្រះពុទ្ធ​នោះទេ ប្រសិនជា​យើង​ហ៊ាន​បដិសេធ ពួកវា​នឹង​សម្លាប់​យើង​"​។

"​ពួក​តា​លី​បង់​បាន​ឈរ​ជាមួយនឹង​កាំភ្លើង​របស់​ពួកវា​ត្រៀម​បាញ់ ប្រសិនបើ​ពួកយើង​បង្កឱ្យមាន​កំហុស​ណាមួយ​។ ខ្ញុំ​បាន​តម្រៀប​គ្រាប់រំសេវ​ទាំងនោះ​ចំនួន​បី​តោន​។  រួច​ពួកគេ​ក៏បាន​បំផ្ទុះ​រូបសំណាក់​ទាំងនោះ ខ្ញុំ​ពិតជា​មាន​អារម្មណ៍​សោកស្តាយ​ជាទីបំផុត​"៕

 

adverise with khmeread
ប្រភព៖ BBC

អ្នកនឹងចូលចិត្ត

មតិយោបល់