adverise with khmeread 5e08c8b8 2347 40e6 a675 71d79e932b94

អនុវត្ត​បច្ចេកទេស​ថ្មី ដាក់​STENT​បំពង់​អាហារ​នៅលើ​អ្នកជំងឺ​ត្បៀត​បំពង់​អាហារ​

    ភ្នំពេញ  ៖ មន្ទីរពេទ្យ​ជោ​រ៉ៃ​ភ្នំពេញ​បាន​អនុវត្ត​បច្ចេកទេស​ថ្មី ដាក់​ស្ទែ​ន (STENT) បំពង់​អាហារ​នៅលើ​អ្នកជំងឺ​ត្បៀត​បំពង់​អាហារ ដោយសារ មហារីក បំពង់​អាហារ នាពេល​ថ្មីៗ​នេះ​ទទួលបាន​ជោគជ័យ​។​

    យោងតាម​របាយការណ៍​របស់​មន្ទីរពេទ្យ​ជោ​រៃ​ភ្នំពេញ​នា​ថ្ងៃទី​១៦ មីនា​បានឱ្យដឹងថា ករណី​ដាក់​ស្ទែ​ន​លោហៈ​បំពង់​អាហារ​លើកដំបូង​នៅ​ផ្នែក ឆ្លុះ​ក្រពះ​ពោះវៀន​មន្ទីរពេទ្យ​ជោ​រៃ​ភ្នំពេញ​ដល់​អ្នកជំងឺ​ឈ្មោះ S.V ភេទ​ប្រុស អាយុ 58 ឆ្នាំ​នៅ​ខេត្តតាកែវ​។ ប្រវត្តិ​ជំងឺ​៖​អ្នកជំងឺ​ចាប់ផ្តើម​ឈឺ​រយៈ​មួយខែ ដោយ​ហូប​មិនបាន ពិបាក​លេប ក្អួត​ពេល​ញ៉ាំ ហើយ​ស្រក់​ទម្ងន់ ដែល​បាន​ព្យាបាល​ច្រើន​កន្លែង ប៉ុន្តែ​អាកា​រៈ​ជម្ងឺ​មិនបាន​ធូរស្បើយ ក៏​គ្រួសារ​នាំមក ពិ​និត្យនៅ​មន្ទីរពេទ្យ​ជោ​រៃ​។​

     របាយការណ៍​បញ្ជាក់ថា​អតីតកាល​ជំងឺ​ហូប​បារី​និង​ស្រា​ច្រើន​ហើយ​អ្នកជំងឺ​បាន​ចូល​សំរាក​ពេទ្យ​នៅ​មន្ទីរពេទ្យ​ជោ​រៃ​ភ្នំពេញ​នៅ​ថ្ងៃទី​៤ ខែមីនា ឆ្នាំ​២០១៦ ដោយមាន​រោគសញ្ញា​លេប​មិន​ចូល​ក្អួតចង្អោរ​មាន​ឈាម​តិចៗ​។​លទ្ធផល​-​ឆ្លុះ​ក្រពះ​គឺ​ត្បៀត​បំពង់​អាហារ​ផ្នែក​កណ្តាល​ដែល​បណ្តាល មកពី មហារីក​បំពង់​អាហារ​។ CT-Scan ពោះ​-​ទ្រូង​៖ ត្បៀត​បំពង់​អាហារ​ផ្នែក​កណ្តាល​ដែល​បណ្តាលមកពី​មហារីក​បំពង់​អាហារ មានកូន​កណ្តុរ (lymphnodes)​ច្រើន​ក្នុង​ទ្រូង​-​ទឹក​ក្នុង​ស្រោម​សួត​-​រលាក​ទងសួត និង​សួត​។​

     ក្រុមគ្រូពេទ្យ​បាន​អនុវត្ត​បច្ចេកទេស​ដាក់​ស្ទែ​ន​បំពង់​អាហារ​អោយ​អ្នក​ជម្ងឺ​ដោយ​ប្រើ​ស្ទែ​ន​លោហៈ​ដែល​អាច​រលាស់​រីក​ប៉ោង​ឡើង​ដោយ​ខ្លួនឯង បាន ទំហំ​24x20x135mm ។ បច្ចេកទេស​នេះ​ត្រូវអនុវត្ត​នៅក្នុង​បន្ទប់វះកាត់ ប្រើ​រយៈពេល​៣០​នាទី​។ ក្រោយ​រយៈពេល​៣​ម៉ោង​អ្នក​ជម្ងឺ​អាច​ហូប​ទឹក បាន​, ក្រោយ ១២​ម៉ោង​អាច​ហូប​ទឹកដោះគោ​-​ស៊ុប និង​អាច​ដើរ​ទៅមក​បាន​។ សរុបសេចក្តី​មក​ការដាក់​ស្ទែ​ន​បំពង់​អាហារ​ទៅលើ​អ្នកជំងឺ​ត្បៀត​បំពង់ អាហារ​ដែល​បណ្តាលមកពី​ជំងឺមហារីក​បំពង់​អាហារ គឺជា​បច្ចេកទេស​សមស្រប​ដែល​អាចជួយ​ឱ្យ​អ្នកជំងឺ​អាច ហូប​អាហារ និង​ហូប​ទឹកបាន​ដើម្បី​លើក ស្ទួយ​សុខភាព និង​គុណភាព​ជីវិត​អ្នក​ជម្ងឺ​ឱ្យ​ប្រសើរឡើង និង​ជួយ​ឱ្យ​អ្នក​ជម្ងឺ​អាចមាន​សុខភាព​គ្រប់គ្រាន់ ដើម្បី​បន្ត​ការព្យាបាល​ដោយ​វិធី​ផ្សេងទៀត ដូចជា វះកាត់ បាញ់​កាំរស្មី និង​ជាតិគីមី ។​

    យោងតាម​ឯក​សារបាន​បញ្ជាក់ថា Esophageal stent placement for a patient with esophageal stenosis due to cancer) ជំងឺមហារីក បំពង់​អាហារ​(Esophageal cancer) គឺជា​ជំងឺ​កាច​សាហាវ​ឈរ​លំដាប់​ទី​៤ ក្នុងចំណោម​ជំងឺមហារីក​ផ្លូវ​រំលាយ​អាហារ​។​ជំងឺ​នេះ​ច្រើន​ជួប​នៅលើ​អ្នក ជំងឺ​បុរស ដែល​ពិសា​បារី និង​សុរា​ច្រើន​។​

     តាម​ការសិក្សា​ស្រាវជ្រាវ​បានបង្ហាញ​ឲ្យ​ឃើញថា ក្នុងចំណោម​ជំងឺមហារីក​នៅលើ​ពិភពលោក​ជំងឺមហារីក​បំពង់​អាហារ​ឈរ​នៅ​លំដាប់​ទី​៦​ចំពោះ បុរស និង​លំដាប់​ទី​៩​ចំពោះ​ស្ត្រី ។​

     ក្នុង​មួយ​ឆ្នាំមាន​អ្នកជំងឺ​កើត​មហារីក​បំពង់​អាហារ​ប្រមាណ​១,៥​លាន​នាក់ នៅ​ទូទាំង​ពិភពលោក​។ បំពង់​អាហារ (Esophagus) គឺជា​បំពង់ ដែល​ត​ភ្ជាប់​ពី​បំពង់ក (Pharynx) ទៅដល់​ក្រពះ​(Stomach)​។ មហារីក​បំពង់​អាហារ គឺជា​មហារីក​ដែល​កើតឡើង​នៅលើ​បំពង់​អាហារ​។​

     ជំងឺមហារីក​បំពង់​អាហារ​ច្រើនតែ​រកឃើញ​នៅក្នុង​ដំណាក់កាល​យឺត​ពេល ដោយសារ​នៅ​ដំណាក់កាល​ដំបូង​ជំងឺមហារីក​មិនមាន​ស្តែងចេញ ជា​រោគសញ្ញា​អ្វី​ច្បាស់លាស់ ជាហេតុ​នាំឱ្យ​អ្នកជំងឺ​មិនមាន​ការចាប់អារម្មណ៍​ថា មាន​កើត​ជំងឺ​នោះ​។​

     អ្នកជំងឺ​ច្រើនតែ​មកជួប​គ្រូពេទ្យ​ពិនិត្យ​ជំងឺ នៅពេល​មាន​រោគសញ្ញា ដូចជា​ពិបាក​លេប លើកដំបូង​ពិបាក​លេប​អាហារ​រឹង ក្រោយមក​ពិបាក​លេប អាហារ​រាវ (​បបរ​, ស៊ុប​, ទឹកដោះគោ​)​។​

    នៅ​ដំណាក់កាល​ចុងក្រោយ អ្នកជំងឺ​មិនអាច​លេប​សូម្បីតែ​ទឹក និង​ទឹកមាត់​ខ្លួនឯង ដែលជា​ហេតុ ធ្វើឱ្យ​អ្នកជំងឺ​ស្រក​ទំងន់ ស្គមរីងរៃ​រលាក​សួត ដោយសារ​ដុំ​មហារីក​ស៊ី​ធ្លាយ (Fistula) ចូលដល់​បំពង់ខ្យល់​(Trachea)​ទងសួត (Bronchus) ឬ​ធ្វើ​រីក​រាលដាល (Metastasis) ឆ្លងទៅ​សរីរៈ​ផ្សេងៗ ដូចជា ខួរក្បាល​(Brain), ឆ្អឹង (Bone), ថ្លើម (Liver), សួត (Lung) ។​ល​។​

    ដោយសារ​ដុំ​មហារីក​មាន​ទំហំ​ធំ​កៀបសង្កត់​ធ្វើឱ្យ​ត្បៀត​បំពង់​អាហារ ដែលជា​ហេតុ​ធ្វើឱ្យ​សុខភាព​របស់​អ្នកជំងឺ​កាន់តែ​ទ្រុឌទ្រោម​ខ្លាំង​ដោយសារ មិនមាន​អាហារូបត្ថម្ភ​(Nutrition)​គ្រប់គ្រាន់​ទៅ​ចិញ្ចឹម​សរីរាង្គ​។​

     បុរេនិមិត្ត (Prognosis) របស់​អ្នកជំងឺ​នៅក្នុង​ដំណាក់កាល​យឺត​ពេលនេះ គឺ​វិ​វត្ត​អាក្រក់ រយៈពេល​អាចរ​ស់បាន​បន្ត​ជា​មធ្យម ប្រមាណ ពី​៦-១៨​ខែ អ្នកជំងឺ​ច្រើន​ស្លាប់​ដោយសារ​ស្គមរីងរៃ​កង្វះ​អាហារូបត្ថម្ភ ឬ​ដោយសារ​ជំងឺ​រលាក​សួត​។​

     ជាទូទៅ​ការព្យាបាល​អ្នកជំងឺ​មហារីក​បំពង់​អាហារ​ក្នុងដំណាក់កាល​នេះ គឺអាច​អនុវត្ត​មធ្យោបាយ​វះ​កាត់ត​ពោះវៀន​ពង្វាង​(colon bypass) បណ្តោះអាសន្ន​វះកាត់​បើក​ក្រពះ​មក​ក្រៅ​ស្បែក​ដើម្បី​ផ្តល់​អាហារូបត្ថម្ភ ដាក់​ស្ទែ​ន​បំពង់​អាហារ និង​ក្រោយមក​អាច​ព្យាបាល​គួបផ្សំ​ដោយ​ជាតិគីមី ឬ​បាញ់​កាំរស្មី​។​

     ការដាក់​ស្ទែ​ន​(stent)​បំពង់​អាហារ​គឺជា​ប​ចេ្ច​ក​ទេស​ប្រើ​បំពង់​សំណាញ់​លោហៈ​រលាស់​ពង្រីក​កន្លែង​ត្បៀត​ដោយ​ស្វ័យប្រវត្តិ​នៅពេល​ដាក់ចូល ដល់ទី​តាំង​កំណត់​(​ដូច​រូបភាព​) ដែលជា​មធ្យោបាយ​ជម្រើស​ទី​១ ជួយ​ឱ្យ​អ្នកជំងឺ​អាច​ហូប​អាហារ​ដោយ​ខ្លួនឯងបាន​ក្នុង​គោលបំណង​លើកស្ទួយ សុខភាព និង​គុណភាព​ជីវិត​អ្នកជំងឺ​ឱ្យ​ប្រសើរឡើង​៕​

adverise with khmeread

អ្នកនឹងចូលចិត្ត

មតិយោបល់