adverise with khmeread Fcc4f2b2 a794 435f 880a 10c8a58072f7

មិនមែន​រញ្ជួយ​ដី​នៅ​នេ​ប៉ាល់​ទេ​! ! ! គឺ​ស្រុត​ផ្លូវ​៣៧១​ដែល​សង់​ដោយ​ក្រុមហ៊ុន​ណឹ​ម​ម៉េង​

      ភ្នំពេញ ៖ រាជធានី​ភ្នំពេញ​សព្វថ្ងៃ​កំពុងតែ​អភិវឌ្ឍន៍​នូវ​វិស័យ​សំណង់​ផ្សេងៗ រួម​នឹង​ហេដ្ឋារចនាសម្ព័ន្ធ ផ្លូវថ្នល់ ស្ពាន​អាកាស និង​ប្រព័ន្ធ​លូ​ជាដើម ដើម្បី​ឆ្លើយតប​ទៅនឹង កំណើនប្រជាជន និង​បញ្ហា​ប្រឈម​ជន​លិច​ផងដែរ។​

      ការអភិវឌ្ឍន៍​វារ​មែ​ង​ជួប​នូវ​ផលប៉ះពាល់ និង​ភាពអវិជ្ជមាន​ដោយ​មិនអាច​អត់​បាន ប៉ុន្តែ​ផលប៉ះពាល់​និង​ភាពអវិជ្ជមាន​ទាំងនោះ គឺ​គេអាច​កាត់បន្ថយ ឬ​បង្រួម​វា​ឲ្យ​នៅ​តិច​បំផុត​តាម​ដែល​អាចធ្វើ​ទៅបាន។​

     ជាក់ស្តែង​ការស្ថាបនា​ដាក់​ប្រព័ន្ធ​លូ​នៅ​ចំណុច​កំណាត់​ផ្លូវ​៣៧១​ចាប់ពី​កែង​ផ្លូវ​២០០៤ រហូតដល់​ប្រឡាយ​ស្ទឹងមានជ័យ​កែង​ផ្លូវ​វេ​ង​ស្រេង ដែល​បច្ចុប្បន្នកំពុង​បន្ត​ការស្ថាបនា​ដោយ​ក្រុមហ៊ុន​ណឹ​ម ម៉េង​នោះ​គឺ ទទួល​នូវ​ការរិះគន់​និង ការខឹង​សម្បារ​ពី​សំណាក់​ប្រជាពលរដ្ឋ​ប្រើប្រាស់​ផ្លូវ ជាពិសេស​ប្រជាពលរដ្ឋ​ដែលមាន​លំនៅដ្ឋាន​នៅក្បែរ​តំបន់​​អភិវឌ្ឍន៍​នោះ។​

      ប្រជាពលរដ្ឋ​បានបង្ហាញ​សារ​ជា​ចម្ងល់​ផ្សេងៗ និង​សារ​រិះគន់​ខ្លាំងៗ​នៅតាម​បណ្តាញ សង្គម​ហ្វេ​ស​បុក​អមដោយ​រូបភាព​បាក់ស្រុត​ផ្លូវថ្នល់​ដែល​មើលទៅ​គួរ​ឲ្យ​រន្ធត់​សម្រាប់​អ្នកប្រើប្រាស់​ផ្លូវ​ទាំងឡាយ។​

     សារ​ខ្លះ​បាន​បញ្ជាក់ថា "​រូបភាព​នេះ​មិនមែនជា​គ្រោះ​រញ្ជួយ​ដី​នៅ ប្រទេស​គេ​នោះទេ គឺជា​ការបាក់​ផ្លូវ​ទាំង​ផ្ទាំងៗ ​និង​ស្នាម​ប្រេ​ស​បែកផ្លូវ​នៅ​ផ្លូវ​៣៧១ ដ៏​គួរអោយភ័យខ្លាច​"។​

    សារ​ខ្លះទៀត​បាន​បញ្ជាក់ថា " ខុស​បច្ចេកទេស​ទៀតហើយ ធ្វើ​នេះ​មិន​ត្រឹមត្រូវ​ទេ គ្មាន ​Sheet pile ទប់​ដី បណ្តាល​ឲ្យ​ដី​ទ្រេល​ញ៉ុ​កមាន​កន្លែង​ណា​លុប​ប​ពេញ​ខ្សាច់​វិញ​? គ្មាន​ឃើញ​ដាក់​ខ្សែ​សុវត្ថិភាព​សម្គាល់​ការដ្ឋាន​សាងសង់ កន្លែង​គ្រោះថ្នាក់ ជាពិសេស​អ្នកដំណើរ​ឆ្លងកាត់​នៅពេល​យប់​"​។​

    ​ដូច្នេះ​ក្រុមហ៊ុន​ទទួល​ម៉ៅការ ស្ថាបនា​ការងារ​ដាក់លូ​នេះ​ត្រូវតែ​គោរព​លក្ខខណ្ឌ​បច្ចេកទេស​ជា​ចាំបាច់​ហើយ​សាលាក្រុង​ក៏ត្រូវ​តែ​រឹតបន្តឹង មិនអាច​ធូរ​លុង​បានឡើយ បើ​ករណី​មាន​គ្រោះថ្នាក់​សាលាក្រុង​ក៏មាន​ចំណែក​ត្រូវ​ទទួលខុសត្រូវ​ដែរ  ។​

     បន្ទាប់ពី​មានការ​រិះគន់​បែបនេះហើយ នៅ​រសៀល​ថ្ងៃទី​១៧ ខែមីនា ឆ្នាំ​២០១៦​នេះ ក្រុមមន្ត្រី​ជំនាញ​ក្រោម​ឱវាទ​សាលា​រាជធានី​ភ្នំពេញ បាន​ចុះ​ពិនិត្យ​លើ​ករណី​ការបាក់​ស្រុតដី នៅលើ​កណាត់ ផ្លូវ​៣៧១ ដោយ​ការបាក់​ស្រុត​នេះ បណ្តាលមកពី ការដាក់​លូ​ហើយ​មិនបាន​ចាក់ដី​បំពេញ​វិញ​ឲ្យ​បាន​ត្រឹមត្រូវ របស់​ក្រុមហ៊ុន​ទទួល​ម៉ៅការ ស្ថាបនា​ការងារ​ដាក់លូ​បូករួម​ទាំង​មិនបាន​វាយ​សៀ​ផាយ​ទប់​ដី​ផង ទើប​បណ្តាល​ឲ្យ​បាក់​ដី​បែបនេះ ដោយ​មន្ត្រី​ជំនាញ​បាន​ចាត់វិធានការ ជាមួយ​ក្រុមហ៊ុន ឲ្យ​រៀបចំ​ជួសជុល​ករណី​ខាងលើនេះ​ឲ្យ​បាន​លឿន ដើម្បី​បង្កលក្ខណៈ​ងាយស្រួល​ដល់​ប្រជាពលរដ្ឋ​ក្នុងការ​ធ្វើដំណើរ។ 

     គួរ​រំលឹក​ផងដែរ​ថា ក្នុងឱកាស​បើ​ការស្ថាបនា​ស្ថានីយ​បូមទឹក​ទួលគោក​ទី​១​ត្រឡោក បែក​កាលពី​ថ្ងៃទី ២៧ ខែកុម្ភៈ​កន្លងទៅនេះ លោក​អភិបាល​រាជធានី​ភ្នំពេញ​ក៏​ធ្លាប់បាន​មានប្រសាសន៍​ណែនាំ​ឲ្យ​ក្រុមហ៊ុន​ទទួល​ម៉ៅការ​និង​មន្ទីរ សាធារណៈការ​និង​ដឹកជញ្ជូន​រាជធានី​ភ្នំពេញ​ត្រូវ​សហការគ្នា​ឲ្យ​បានល្អ​ប្រសើរ​ក្នុង​ការជីក ផ្លូវ​កប់​បណ្តាញ​លូ​នៅតាម​ដងផ្លូវ​នានា ជាពិសេស​ផ្លូវ​សំខាន់ៗ​ដោយ​ធ្វើតាម​តំណាក់កាល​និង គិតគូរ​ពី​ផលប៉ះពាល់​របស់​អ្នកប្រើប្រាស់​ផ្លូវ។​

     ជាពិសេស​ប្រជាពលរដ្ឋ​ដែល​រស់​នៅតាម​តំបន់ ការដ្ឋាន​នោះ ដោយ​មិន​ត្រូវអោយ​ប្រជាពលរដ្ឋ​ទាំងនោះ​រង​ផលប៉ះពាល់​ធ្ងន់ធ្ងរ​ពេក​ក្នុងការ​ប្រកប​របរ​អា​ជីវ​កម្ម និង​ការចេញចូល​លំនៅដ្ឋាន​របស់​ពួកគាត់។ 

     លោក​ក៏បាន​លើក​ជា​ឧ​ទា​រណ៍​ថា  យើង​ជីក​ផ្លូវ​ដើម្បី​ដាក់លូ​នៅមុខ​ផ្ទះ​ប្រជាពលរដ្ឋ​១០​ខ្នង​ផ្ទះ​ឬ​២០​ខ្នង​ផ្ទះ​ឲ្យ​រួច រាល់​ចាក់ដី​បង្ហាប់​ដើម្បី​ឲ្យ​ប្រជាពលរដ្ឋ​១០​ឬ​២០​ខ្នង​ផ្ទះ​នោះ​ធ្វើដំណើរ​បណ្តោះអាសន្ន​វិញ​បាន ទើប​យើង​ចាប់ផ្តើម​ជីក​កាយ​បន្ត​ការដ្ឋាន​ទៅមុខ​បន្តទៀត។​

     មិនមែន​យើង​ស្ថាបនា​កន្លះ​គីឡូ​ដី ឬមួយ​១​គីឡូ​ដី ត្រូវ​ជីក​កកាយ​ទាំងអស់​ព្រមៗ​គ្នា​នោះទេ។ បើ​ធ្វើបែបនេះ​គឺ​ធ្វើ​ឲ្យ​ប៉ះពាល់​ខ្លាំងពេក​ដល់​ការប្រកប​របរ​ចិញ្ចឹមជីវិត​និង​ការធ្វើដំណើរ​ចេញចូល​ផងដែរ។​

     ទន្ទឹមនឹង​ការលើកឡើង​បែបនេះ លោក​ក៏បាន​បញ្ជាក់​ផងដែរ ថា កន្លងមក​សាលា​រាជធានី​ភ្នំពេញ​ពិបាក​នឹងធ្វើ​ការជ្រើសរើស​ក្រុមហ៊ុន​ដៃគូ​ដើម្បី​ស្ថាបនា​ប្រព័ន្ធ​លូ​នេះ ព្រោះ​កន្លងមក​គឺ​មានតែ​ក្រុមហ៊ុន​១​ឬ​២​ប៉ុណ្ណោះ​ដែល​ហ៊ាន​ដាក់ពាក្យ​ដេញថ្លៃ ស្ថាបនា វា​ខុសពី​ការស្ថាបនា​ផ្លូវថ្នល់​គឺមាន​ក្រុមហ៊ុន​រាប់​ភ្លេច​ដែល​ចូលរួម​ដាក់ពាក្យ​ដេញថ្លៃ​ទទួល​ស្ថាបនា។​

      ការដ្ឋាន​មួយ​ខា​លើ​នេះ​គឺ ស្ថិត​តាម​បណ្តោយ​ផ្លូវ​៣៧១​ចាប់ពី​ផ្លូវ​២០០៤​ដល់​ប្រឡាយ​ស្ទឹងមានជ័យ​ដើម្បី​ដាក់​ប្រ​ព័​ន្ល​លូ​ភ្លោះ​ទំហំ​មួយ​ម៉ែត្រ​កន្លះ​និង​មាន​ប្រវែង​ជាង​៥៧៥​ម៉ែត្រ បានចាប់ផ្តើម​ធ្វើ​ពិធីបើកការដ្ឋាន​ស្ថាបនា​ឡើង​កាលពី​ថ្ងៃទី​២១ វិច្ឆិកា ឆ្នាំ​២០១៤ ដែល​បច្ចុប្បន្ន​ទទួល​ការស្ថាបនា​ដោយ​ក្រុមហ៊ុន​ណឹ​ម​ម៉េង និង​ស្ថិតក្រោម​ការត្រួតពិនិត្យ​បច្ចេក ទេស​ដោយ​មន្ទីរ​សាធារណៈការ​និង​ដឹកជញ្ជូន​រាជធានី​ភ្នំពេញ៕

adverise with khmeread

អ្នកនឹងចូលចិត្ត

មតិយោបល់