adverise with khmeread 1

​អតីត​ខ្សែប្រយុទ្ធ​ឆ្នើម Arsenal ធ្លាក់ខ្លួន​ទៅលេង​នៅ​ប្រទេស​កា​ហ្សា​ក់​ស្ថាន​

    ​កីឡាករ Andrey Arshavin នឹងត្រូវ​បាន​ចងចាំ​ជានិច្ច​ចំពោះ​ការ​ទាញ​ចំណាប់អារម្មណ៍​ពី​ពិភព​បាល់ទាត់​អំឡុង​ព្រឹត្តិការណ៍​យ៉ូ​រ៉ូ​ឆ្នាំ ២០០៨ នៅពេលដែល​គាត់​បានបង្ហាញ​ការលេង​ដ៏​ល្អឥតខ្ចោះ​របស់គាត់ មុននឹង​ចូលរួម​ជាមួយ​កាំភ្លើង​ធំ​។​

​    ​បើទោះជា​មិនសូវ​លេចធ្លោ​នៅក្នុង​ជួរ​ក្រុម​កីឡាករ​ល្អ​របស់ Arsenal ក៏ដោយ ក៏ប៉ុន្តែ​តើ​មាន​នរណា​ទៅ​ដែល​អាច​ភ្លេច​គ្រាប់​បាល់​ទាំង​បួន​ដ៏​អស្ចារ្យ​របស់គាត់​កាលពី​ជំនួប ៤-៤ ជាមួយ Liverpool នោះ​?

​    ​ប៉ុន្តែ​ពេលវេលា​ពិតជា​ផ្លាស់ប្តូរ​លឿន​ណាស់ ខណៈ​ឥឡូវនេះ​ខ្សែប្រយុទ្ធ​វ័យ ៣៤ ឆ្នាំ​រូបនេះ​ធ្លាក់ខ្លួន​មកលេង​ឱ្យ​ក្រុម Kairat Almaty របស់​កា​ហ្សា​ក់​ស្ថាន​។​

​    ​Arshavin បានចាប់ផ្តើម​អាជីព​របស់ខ្លួន​ជាមួយ​ក្លឹប Zenit Saint Petersburg ដោយបាន​បង្ហាញខ្លួន​ចំនួន ២៣៦ ប្រកួត​ឱ្យ​ក្លឹប និង​រកបាន ៥២ គ្រាប់​។ គាត់​បាន​ចូលរួម​ជាមួយ Arsenal ក្នុង​ឆ្នាំ ២០០៩ និង​បាន​លេង​ការប្រកួត Premier League ចំនួន ១០៥ ប្រកួត ប៉ុន្តែ​រកបាន​តែ ២៣ គ្រាប់​ប៉ុណ្ណោះ​មុននឹង​ចាកចេញ​ទៅ Zenit ក្នុង​ឆ្នាំ ២០១២ ក្នុង​លក្ខខណ្ឌ​ខ្ចី​ជើង​និង​ជា​អចិន្ត្រៃយ៍​ក្នុង​ឆ្នាំ ២០១៣​។​

​    ​គាត់​ចំណាយពេល​ពីរ​រដូវ​កាល​នៅ​ទីនោះ ដោយ​រកបាន​តែ​បី​គ្រាប់​ប៉ុណ្ណោះ​មុននឹង​ចូលរួម​ជាមួយ​ក្រុម Kuban Krasnodar នៅ​ដើមរដូវ​កាល​នេះ​។ បន្ទាប់ពី​បង្ហាញខ្លួន​ចំនួន​ប្រាំបី​លើក​ដោយ​មិនបាន​រក​គ្រាប់​បាល់​សោះ គាត់​ត្រូវបាន​ដក​ចេញពី​ក្រុម​នៅ​ខែមករា​ឆ្នាំនេះ​។ ចាប់តាំងពី​ពេលនោះ​គាត់​មិនមាន​ក្លឹប​លេង​នោះទេ ហើយ​បន្ទាប់ពី​ចរចា​ជាមួយ​ក្រុម Vardar Skopje របស់​ម៉ា​សេ​ដូ​នី​បរាជ័យ មាន​អ្នកខ្លះ​គិតថា អាជីព​របស់គាត់​នឹង​ដល់ទី​បញ្ចប់​។​

​    ​ទោះជា​យ៉ាងនេះ​ក្តី ក្រុម Kairat Almaty ដែល​ខកខាន​ឈ្នះ​ពាន​លី​ក​ក្នុងស្រុក​យូរហើយ​នោះ បាន​ចាប់យក​ឱកាស​នេះ​ដើម្បី​នាំយក​អតីត​កីឡាករ​របស់ Arsenal រូបនេះ​តែម្តង​៕

 

adverise with khmeread
ប្រភព៖ The Sun

មតិយោបល់