adverise with khmeread 1

ឆ្នាំ​២១០០​ប្រជាជន​អាមេរិក​អាច​នឹង​បង្ខំចិត្ត​ជន្លៀស​ពី​តំបន់​ឆ្នេរ​ដោយសារ​ជំនន់​ទឹកសមុទ្រ​, កម្ពុជា​ស្ថិតក្នុង​កាំ​ក្រហម​ទី​ពីរ​

    ​ទឹកជំនន់​បង្កឡើង​ដោយ​ការឡើង​កម្រិត​ទឹកសមុទ្រ​អាច​ប៉ះពាល់​ប្រជាជន​អាមេរិក ១៣ លាន​នាក់ ដែល​រស់​នៅតាម​តំបន់ឆ្នេរ​នៅ​ភាគខាងត្បូង​អាមេរិក ជាហេតុ​បង្កឱ្យមាន​ការធ្វើ​ចំណាកស្រុក​ដ៏​ធំ​សម្បើម​មួយ​។ នេះ​បើតាម​វេ​ប​សាយ​ដេលី​មែ​ល​ចេញផ្សាយ​ថ្ងៃទី ១៤ មីនា​។

​    ​ក្រុម​អ្នកវិទ្យាសាស្ត្រ​មកពី​សាកលវិទ្យាល័យ University of Georgia បាន​សើរើ​ឡើងវិញ​នូវ​ការព្យាករណ៍​បច្ចុប្បន្ន​ស​ម្រា​ប់​កម្រិត​ទឹកសមុទ្រ​ដើម្បី​បញ្ចូល​ទិន្នន័យ​អំពី​កំណើនប្រជាជន ហើយ​ការរកឃើញ​ចំនួន​មនុស្ស​ដែល​នឹងរង​គ្រោះ​ដោយសារ​ទឹកជំនន់​នេះ​អាច​ខ្ពស់ជាង​ការរំពឹងទុក​ដល់​ទៅ ៣ ដង​។

​    ​ពួកគេ​និ​យ​យ​ថា ប្រជាជន​នៅតាម​តំបន់ឆ្នេរ​បាន​បន្ត​កើនឡើង ខណៈ​ស្របពេល​ដូចគ្នានេះដែរ វិធានការ​ការពារ​ទឹកជំនន់​តិចតួច​ណាស់​ត្រូវបាន​គេ​អនុម័ត​។

​    ​ឯកសារ​ស្រាវជ្រាវ ដែល​ចេញផ្សាយ​លើ​ព្រឹត្តិប័ត្រ​ព័ត៌មាន Nature នេះ​បាន​ព្យាយាម​ដោះស្រាយ​បញ្ហា​គួរឱ្យខ្លាច ទាក់ទិន​នឹង​ការព្យាករណ៍​អំពី​របៀប​ដែល​ប្រជាជន​រាប់លាន​នាក់​អាច​នឹងរង​គ្រោះ​ដោយផ្ទាល់​ពី​បម្រែបម្រួល​អាកាសធាតុ​នេះ​។

​    ​ខណៈ​ការឡើង​កម្រិត​ទឹកសមុទ្រ​គឺជា​បញ្ហា​ជាក់ស្តែង​ចំពោះ​ការរស់នៅ​របស់​មនុស្ស ការព្យាករណ៍​អំពី​ផលប៉ះពាល់​នៃ​ទឹកជំនន់​គឺជា​ការ​ប្រឈម​មួយ​ដោយសារតែ​បម្រែបម្រួល​ភូមិសាស្ត្រ​ក្នុងស្រុក និង ភាពមិនប្រាកដប្រជា​ជុំវិញ​ការផ្លាស់ប្តូរ​ចំនួន​ប្រជាជន​ក្នុងពេល​អនាគត​។

​    ​ពួក​អ្នកស្រាវជ្រាវ​បាន​ព្យាករណ៍​ផ្អែកលើ​ទិន្នន័យ​ប្រមូលបាន​ពីរ​ដ្ឋ​តំបន់​ឆ្មេ​រ​ចំនួន ២២ ហើយ​ពួកគេ​បាន​រកឃើញថា កម្រិត​ទឹកសមុទ្រ​នឹង​ឡើងដល់ ០,៩ ម៉ែត្រ​នៅត្រឹម​ឆ្នាំ ២១០០ និង​បង្ក​ឱ្យ​មនុស្ស ៤, ២ លាន​នាក់​ប្រឈម​ទឹកជំនន់ ហើយ​នេះ​ពុំបាន​រួមបញ្ចូល​ករណី​រលាយ​ទឹកកក​នៅ​តំបន់​ប៉ូល​នោះទេ​។

​    ​ប្រសិនបើ​ផ្ទាំង​ទឹកកក​នៅ​តំបន់​ប៉ូល​រលំ នោះ​កម្រិត​ទឹកសមុទ្រ​អាច​ឡើងដល់​ទៅ ១,៨ ម៉ែត្រ ដោយ​គំរាមកំហែង​ប្រជាជន​អាមេរិក​រហូតដល់​ទៅ ១៣,១ លាន​នាក់​ឯណោះ​។

​    ​ដោយឡែក ក្រុមហ៊ុន​អង់គ្លេស The Eco Experts បាន​ផលិត​ផែនទី​មួយ​ឡើង​ដើម្បី​បង្ហាញ​តំបន់​ងាយ​រងគ្រោះ​ដោយសារ​ជំនន់​ទឹកសមុទ្រ ឬ​ការឡើង​កម្រិត​ទឹកសមុទ្រ​នេះ​។ សញ្ញា​ក្រហម​បំផុត​បង្ហាញ​ពី​ប្រទេស​ងាយ​រងគ្រោះ​ខ្លាំងជាងគេ និង​សញ្ញា​បៃតងចាស់​បំផុត បង្ហាញ​ពី​ប្រទេស​ដែលមាន​សុវត្ថិភាព​បំផុត​ពី​ការឡើង​ទឹកសមុទ្រ​នេះ​។

​    ​បើ​សង្កេត​លើ​ផែនទី កម្ពុជា​គឺជា​ប្រទេស​ងាយ​រងគ្រោះ​បំផុត​មួយ​ផងដែរ​ដោយសារ​ស្ថិតក្នុង​កាំ​ក្រហម​ទី​ពីរ (​មើល​ក្នុង​ផែនទី​)៕

 

adverise with khmeread
ប្រភព៖ ដេលី​មែ​ល​

អ្នកនឹងចូលចិត្ត

មតិយោបល់