បុរសជាជាងផ្សាដែកម្នាក់ឆក់ចរន្តអគ្គឺសនីស្លាប់ នៅស្រុកល្វាឯម

កណ្តាល ៖ បុរសជាជាងផ្សាដែកម្នាក់បានស្លាប់ បន្ទាប់ពីឆក់ចរន្តអគ្គឺសនី ខណៈកំពុងផ្សាដែករន្ទា បង្កការភ្ញាក់ផ្អើល នាថ្ងៃទី២៧ ខែឧសភា ឆ្នាំ២០២០ វេលាម៉ោង១ និង១០នាទីរសៀលនៅចំណុច ផ្ទះកំពុងសាងសង់របស់ឈ្មោះ ស៊ុំ សុខ ភូមិក្តីកណ្តាល ឃុំសារិកាកែវ ស្រុកល្វាឯម ខេត្តកណ្តាល។

ប៉ូលិសនិយាយថា ជនរងគ្រោះឈ្មោះ សារ៉ន រតនៈ ភេទប្រុស អាយុ២៣ឆ្នាំ ជនជាតិខ្មែរ មុខរបរកម្មករសំណង់ទីលំនៅភូមិស្វាយមាស ឃុំវិហារសួគ៌ ស្រុកខ្សាច់កណ្តាល ខេត្តកណ្តាល។ វត្ថុតាងបន្សល់មានខ្សែភ្លើង០១ខ្សែប្រវែង១០ម៉ែត្រ និង២-ម៉ូទរ័ស្វាន ចំនួនមួយ។

ប៉ូលិសបន្តថា ដំបូងជនរងគ្រោះបានរាយខ្សែភ្លើងភ្ជាប់ចរន្តចេញពីព្រីក្នុងផ្ទះ ដែលកំពុងសាងសង់មកក្រៅដើម្បីស្វានវីស តម្លើងរន្ទាបូកជញ្ជាំងផ្ទះ។ ពេលនោះជនរងគ្រោះបានជាន់លើរន្ទា បណ្តាលឱ្យគៀបខ្សែភ្លើងដាច់រលាត់ ក៏មានចរន្តឆ្លងមកដែកថ្នាំងអំពៅធ្វើរនូតរន្ទា បានបណ្ដាលឱ្យឆក់ជនរងគ្រោះ។

ភ្លាមនោះឈ្មោះ យ៉ន់ ចំរើន ដែលជាមេម៉ៅការបូកជញ្ជាំងផ្ទះនោះឃើញនិងបានឮសំឡេងជនរងគ្រោះស្រែកតិចៗថាឆក់ ក៏ស្រែកឱ្យឈ្មោះ រុយ ជាកម្មករសំណង់ជាមួយគ្នាទៅដកខ្សែភ្លើងចេញពីព្រីហើយស្ទុះចុះពីលើរន្ទាជាន់ខាងលើ មកលើកជនរងគ្រោះពីលើរន្ទាចុះមកដីនាំគ្នា ធ្វើចលនាបេះដូងសង្គ្រោះនិង យកដីខ្សាច់មកកប់ត្រឹមពោះមកជើងតែជនរងគ្រោះនៅតែមិនដឹងខ្លួន គឺស្លាប់បាត់ទៅហើយ។

បន្ទាប់ពីសមត្ថកិច្ចពិនិត្យសាកសពរួចបានសន្និដ្ឋានថា ជនរងគ្រោះបានស្លាប់ដោយសារឆក់ចរន្តអគ្គិសនី។ ក្រោយពីពិនិត្យបានប្រគល់សាកសពជនរងគ្រោះជូនក្រុមគ្រួសារយកទៅធ្វើបុណ្យតាមប្រពៃណី៕


 

adverise with khmeread