អាវុធហត្ថបន្តឃាត់ជនសង្ស័យ២នាក់ ពាក់ព័ន្ធក្រុមMAFIA

     ភ្នំពេញ ៖ កម្លាំងកងរាជអាវុធហត្ថរាជធានីភ្នំពេញ បានឃាត់ខ្លួនជនសង្ស័យ ២នាក់ បន្ថែមទៀតនៅផ្ទះមេខ្លោងជនជាតិចិនពាក់ព័ន្ធក្រុមMafiaស្ថិតនៅ​ចំណុច​ក្នុង​បុរី​ពិភពថ្មី ផ្ទះ​លេខ​២ផ្លូវ​លេខ​២ សង្កាត់​ទឹកល្អក់​ទី​៣ ខណ្ឌទួលគោកកាលពីរសៀលថ្ងៃទី១៦ធ្នូឆ្នាំ២០១៥។គិតមកទល់ពេលនេះឃាត់ខ្លួនជនសង្ស័យបាន៩នាក់ហើយ (ស្រី៣នាក់)។

    កិច្ចប្រតិបត្តិការបង្ក្រាបនេះ ដឹកនាំផ្ទាល់ដោយលោកឧត្តមសេនីយ៍ទោរ័ត្ន ស៊្រាងមេបញ្ជាការរងកងរាជអាវុធហត្ថលើផ្ទៃប្រទេសនិងជាមេបញ្ជាការកងរាជអាវុធហត្ថរាជធានីភ្នំពេញបានចាប់ឃាត់ជនជាតិចិន២នាក់ (ប្រុសម្នាក់ ស្រីម្នាក់)។ចំណែកមេក្លោងគេចខ្លួនបាត់។

    មន្ត្រីជំនាញអាវុធហត្ថដែលចូលរួមប្រតិបត្តិការនេះបានបញ្ជាក់ថា ជនសង្ស័យ ​មានឈ្មោះ Zhang Zhong Zheng ភេទ​ប្រុស អាយុ​៤២​ឆ្នាំ ជា​ជន​ជាតិចិន និងជា​មេខ្លោង​ចាប់ជំរិត បង្ខាំង​មនុស្ស និងទី​២ ឈ្មោះ ម៉ី ដា​លី ភេទ​ស្រី អាយុ​២០​ឆ្នាំ ជាជនជាតិខ្មែរ ត្រូវជា​សង្សារ​រប​ស់បុ​រស​សង្ស័យ ស្នាក់នៅ​ផ្ទះកើតហេតុ​ខាងលើ ។ ប៉ុន្តែនារីម្នាក់ខាងលើនេះត្រូវបានអាវុធហត្ថដោះលែងព្រោះពុំមានពាក់ព័ន្ធក្នុងករណីនេះទេ គឺគ្រាន់តែពួកចិនយកមកដេកប៉ុណ្ណោះ។

     គួររំលឹកថា អាវុធហត្ថរាជធានីភ្នំពេញបានឃាត់ជនសង្ស័យខ្មែរ-ចិនចំនួន៧នាក់ (ស្រី២នាក់)ជាបន្តបន្ទាប់កាលពីយប់នៅថ្ងៃទី១៤ ខែធ្នូ ឆ្នាំ២០១៥កន្លងទៅនេះ ដែលព័ត៌មានដំបូងថាពីបទចាប់បង្ខាំងមនុស្សខុសច្បាប់សង្ស័យពាក់ព័ន្ធជួញដូរមនុស្ស ។ចុងក្រោយនេះមន្ត្រីអាវុធហត្ថអះអាងថាពាក់ព័ន្ធ"ក្រុមMafia"។

    មន្ត្រីអាវុធហត្ថបានឲ្យដឹងថា ករណីបង្ខាំងមនុស្សខាងលើនេះបានកើតឡើង នៅសង្កាត់ចាក់អង្រែក្រោម ខណ្ឌមានជ័យ ជាកន្លែងដែលកម្លាំងអាវុធហត្ថ បង្ក្រាបបានជនសង្ស័យ ហើយរំដោះបានជនរងគ្រោះជនជាតិចិន៣នាក់ ។ 

    មន្ត្រីដដែលបន្តថា បន្ទាប់ពីមានការបំភ្លឺពីជនរងគ្រោះទើបនៅរសៀលថ្ងៃទី១៤ ខែធ្នូឆ្នាំ២០១៥កម្លាំងអាវុធហត្ថក្រោមការសម្របសម្រួល ពីតំណាងអយ្យការអមសាលាដំបូងរាជធានីភ្នំពេញ មកចុះឆែកឆេរផ្ទះលេខ ១១២ ផ្លូវលេខ១៧៣ សង្កាត់ទួលស្វាយព្រៃទី១ ខណ្ឌចំការមន ប៉ុន្តែមិនបានរកឃើញជនសង្ស័យណាម្នាក់ទៀតឡើយ ។

    ក្រោយការចាប់ខ្លួនជនសង្ស័យទាំង៧នាក់ត្រូវបានអាវុធហត្ថយកទៅសួរនាំនៅទីបញ្ជាការដ្ឋានអាវុធហត្ថរាជធានីភ្នំពេញ ចាត់ការតាមនីតិវិធី៕