គ្រោះថ្នាក់ចរាចរណ៍កើតឡើង២លើកស្លាប់ម្នាក់និងរបួសធ្ងន់២នាក់នៅខេត្តកោះកុង

កោះកុង ៖ មានករណីគ្រោះថ្នាក់ចរាចរណ៍កើតឡើង២លើក គឺនៅស្រុកកោះកុង បណ្តាលឱ្យរបួសធ្ងន់ម្នាក់និងនៅស្រុក​មណ្ឌលសីមាបណ្តាលឱ្យស្លាប់​ម្នាក់​និងរបួសធ្ងន់​ម្នាក់នៅថ្ងៃតែមួយ។

ករណីទី១-មានករណីគ្រោះថ្នាក់ចរាចរណ៍បង្កឡើងដោយខ្លួនឯងលើផ្លូវជាតិលេខ ៤៨ ចន្លោះគីឡូម៉ែត្រលេខ ១២៧-១២៨ ស្ថិតនៅភូមិអន្លង់វ៉ាក់ ឃុំតាតៃក្រោម ស្រុកកោះកុង បណ្តាលមកពីបើកលឿនពេលចុះចំណោទត្រង់ចំណុចផ្លូវកោងដាច់ហ្វ្រាំងក្រឡាប់ធ្លាក់ខុសផ្លូវ រងបួសធ្ងន់ម្នាក់ នៅថ្ងៃទី២៧ ខែវិច្ឆិកា ឆ្នាំ២០២០ វេលាម៉ោង៣ និង៣០នាទីល្ងាច។

សមត្ថកិច្ចនិយាយថា រថយន្តបង្កម៉ាកហ៊ីយានដាយ ប្រភេទរថយន្តបែន ពណ៌ស ពាក់ស្លាកលេខភ្នំពេញ 3D-3740 អ្នកបើកបរមានឈ្មោះ ស៊ិន ម៉ន (ហៅតាខ្វេ) ភេទប្រុស អាយុ ៣២ឆ្នាំ ទីលំនៅភូមិ អង្គរសរ ឃុំអង្គរស ស្រុកមេសាង ខេត្តព្រៃវែង​ បណ្តាលឱ្យរបួសធ្ងន់ អ្នករួមដំណើរម្នាក់ ឈ្មោះ គៀន តុល ភេទប្រុស អាយុ២៨ ឆ្នាំ ទីលំនៅ ឃុំកណ្តាល ស្រុកទឹកឈូ ខេត្តកំពត។

ក្រោយពេលកើតហេតុកម្លាំងប៉ូលិសជំនាញអធិការដ្ឋានស្រុកសហការជាមួយកម្លាំងប៉ូលិសប៉ុស្តិ៍រដ្ឋបាលតាតៃក្រោម បានចុះអន្តរាគមន៍ដល់កន្លែងកើតហេតុជួយសង្រ្គោះជនរងគ្រោះ បញ្ជូនទៅមន្ទីរពេទ្យបង្អែកខេត្តកោះកុង។

ករណីទី២-មាន​ករណី​គ្រោះថ្នាក់​ចរាចរណ៍​កើត​ឡើង​ម៉ូតូនិងម៉ូតូ​បុកគ្នា​មុខ​តំបន់​សេដ្ឋកិច្ច​ពិសេស​ខេត្ត​ ស្លាប់​ម្នាក់​ និងរបួសធ្ងន់​ម្នាក់នៅថ្ងៃទី ២៧ ខែវិច្ឆិកា ឆ្នាំ ២០២០​ វេលាម៉ោង៩ និង២៣នាទីយប់​ នៅចំណុចមុខតំបន់សេដ្ឋកិច្ចពិសេស ស្ថិត​ក្នុង​ភូមិចាំយាម ឃុំប៉ាក់ខ្លង ស្រុក​មណ្ឌលសីមា ខេត្តកោះកុង។

សមត្ថកិច្ចនិយាយថា ជនរងគ្រោះ​២នាក់រួមមាន ១-ឈ្មោះ ពូន ប៊ឺត ភេទ ប្រុស​ អាយុ ២៣ ឆ្នាំ មានទីលំនៅភូមិ២​ សង្កាត់ដងទង់ ជិះ​ម៉ូតូ​ស្កូពី​ ស្លាប់នៅកន្លែងកើតហេតុ​ និង២-ឈ្មោះ សន ពិសិត ភេទប្រុស​ អាយុ ២១ ឆ្នាំ មានទីលំនៅភូមិ​ចាំយាម ឃុំប៉ាក់ខ្លង ជាអ្នកលក់​នំប៉័ង រងរបួស​ធ្ងន់​បញ្ជូន​ព្យាបាល​នៅ​មន្ទីរ​ពេទ្យ​បង្អែកខេត្តកោះកុង៕

adverise with khmeread