ប៉ូលិសកំពុងស្រាវជ្រាវតាមចាប់ស្ត្រីចំណាស់ម្នាក់លួងលោមកូនសិស្សសាលាដោះយកខ្សែកនិងកងដៃ

ភ្នំពេញ ៖ ប៉ូលិសរាជធានីភ្នំពេញ​បានបំភ្លឺនៅថ្ងៃទី១៣មករានេះថា ជុំវិញព័ត៌មានទាក់ទងទៅនឹងករណីលួច​​ដោះយកកងដៃ និងខ្សែកសិស្សសាលាដែលបានបង្ហោះតាមបណ្តាញសង្គមហ្វេសប៊ុកកាលពីពេលថ្មីៗនេះថា ពិតជាមានស្ត្រីចំណាស់ម្នាក់លួងលោមសិស្សសាលាដោះយកខ្សែក និងកងដៃពិតមែន ហើយប៉ូលិសកំពុងបើកការស្រាវជ្រាវចាប់ជនល្មើសមកផ្តន្ទាទោស។

ប៉ូលិសបញ្ជាក់ថា នៅថ្ងៃទី០៩​ ខែមករា​ ឆ្នាំ២០២១​ វេលាម៉ោង០៧ និង១៥នាទី​ នៅចំណុចផ្លូវបេតុង​ ភូមិមិត្តភាព​ សង្កាត់-​ខណ្ឌឫស្សីកែវ​ រាជធានីភ្នំពេញ​ ពិតជាមានករណីស្ត្រីម្នាក់លួងលោមក្មេងស្រីដើម្បីដោះយកគ្រឿងអលង្កា​រពីជនរងគ្រោះឈ្មោះ​ ម៉ៅ​ ម៉ាលីកា​ ភេទស្រី​ អាយុ១០ឆ្នាំ​ ជាសិស្សថ្នាក់ទី៤​​ មានទីលំនៅផ្ទះលេខB16 ផ្លូវបេតុង​ ក្រុមទី០១​ ភូមិឃ្លាំងសាំង​ សង្កាត់-​ខណ្ឌឫស្សីកែវ រាជធានីភ្នំពេញ​។ សម្ភារ:បាត់បង់រួមមានខ្សែក​ ០១ខ្សែ​មានតម្លៃ​ ២៣០ដុល្លា​រ និងកងដៃ​ ០១កងមានតម្លៃ​ ១៧០ដុល្លារ​។ 
 
ប៉ូលិសបន្តថា កុមារីដែលជាជនរងគ្រោះបានចេញទៅសាលា ពេលរៀបដើរចូលទៅថ្នាក់រៀនត្រូវបានស្រ្តីវ័យចំណាស់ម្នាក់​ និងកុមារីម្នាក់ដែរមិនស្គាល់បាននិយាយល្បួងលួងលោម​ ឱ្យក្មេងស្រីរងគ្រោះចេញមកខាងក្រៅសាលា​ ហើយនិយាយបញ្ឆោតឱ្យក្មេងស្រីរងគ្រោះដោះខ្សែកនិងកងដៃដាក់ក្នុងកាបូបខ្លាចគេលួច​។

បន្ទាប់មកស្រ្តីវ័យចំណាស់និងក្មេងស្រីជាបក្សពួកបានធ្វើសកម្មភាពដោះខ្សែកនិងកងដៃរបស់ក្មេងស្រីជនរងគ្រោះ​បានសម្រេច រួចឡើងជិះម៉ូតូបក្ខពួករបស់ខ្លួនជាបុរសម្នាក់បើកគេចខ្លួនបាត់​ទៅ​។  

ក្រោយពេលកើតហេតុអាណាព្យាបាលរបស់ជនរងគ្រោះបានទូរស័ព្ទមកប្តឹងសមត្ថកិច្ចប៉ុស្តិ៍រដ្ឋបាលឫស្សីកែវ​ ពេលនោះសមត្ថកិច្ចបានចុះទៅដល់កន្លែងកើតហេតុភ្លាមៗ​ ដើម្បីបើកការស្រាវជ្រាវឆែកមើលរូបភាពកាម៉េរ៉ាសុវត្ថិភាព​ និងទទួលបណ្តឹងពីអាណាព្យាបាលជនរងគ្រោះ​។ 

ចំពោះមុខប៉ូលិសផ្នែកជំនាញខណ្ឌប៉ុស្តិ៍បាន និងកំពុងធ្វើការស្រាវជ្រាវកំណត់អត្តសញ្ញាណជនសង្ស័យ​មកផ្តន្ទាទោសតាមច្បាប់៕


 

adverise with khmeread