Gary Lineker ចាត់ទុក Rooney គឺជាកីឡាករម្នាក់ក្នុងចំណោមកីឡាករឆ្នើមបំផុត បន្ទាប់ពី Rooney សម្រេចមកដឹកនាំក្រុម Derby

        លោក Gary Lineker បាន​ចាត់ទុក​ Wayne Rooney គឺ​ជា​កីឡាករ​ម្នាក់​ក្នុងចំណោម​កីឡាករ​ឆ្នើម​បំផុត​ បន្ទាប់ពី​កីឡាករ​រូបនេះ​បាន​សម្រេចលាលែង​ពីអា​ជីព​លេងបាល់ទាត់​ បន្ទាប់ពី​ត្រូវ​បាន​តែង​តាំង​ជា​គ្រូបង្វឹក​ក្រុម Derby ជា​អចិន្ត្រៃយ៍​។

        Wayne Rooney វ័យ​៣៥​ឆ្នាំ​បាន​ចុះកិច្ច​ព្រមព្រៀង​ពីរ​ឆ្នាំ​កន្លះ ដឹក​នាំ​ក្រុម Derby ដែល​បច្ចុប្បន្ន​ស្ថិតនៅតំបន់​កាត់​ចេញ​ក្នុង​​ក្របខណ្ឌ Championship រហូត​ដល់​រដូវក្តៅ​ឆ្នាំ​២០២៣​។ 

        ប៉ុន្តែ​ដើម្បី​ផ្តោត​ការ​យក​ចិត្ត​ពេញ​លេញលើ​ការ​ងារ​ដឹកនាំ Wayne Rooney បាន​សម្រេចបញ្ចប់​អាជីព​លើទីលាន​រយៈ​ពេល​១៩​ឆ្នាំ​ ដោយ​បិទបញ្ចប់អាជីព​ដ៏ត្រចះត្រចង់​ ដែល​កីឡាករ​រូបនេះ​ធ្លាប់​ជាប់ជា​កីឡាករ​រកបាន​គ្រាប់​បាល់​ច្រើន​ជាងគេសម្រាប់ក្រុម​ជម្រើស​ជាតិ​អង់គ្លេស​និង​ធ្លាប់លើកពានធំៗច្រើន​ទៀត​ជាមួយ​ក្លឹប Manchester United​ ផងដែរ​ ។

លោក Lineker បាន​និយាយថា “​វាមិន​មែនជា​រឿង​ងាយស្រួល​សម្រាប់​កី​ឡាករ​គ្រប់រូប ប៉ុន្តែ Rooney ពិតជា​រីករាយជាមួយ​នឹង​អាជីព​ដ៏​អស្ចារ្យ​នៅលើ​ទីលាន​ប្រកួត​ ហើយ​សង្ឃឹមថា គាត់នឹង​ទទួល​បានជោគជ័យ​នៅ​ក្រៅទីលាន​ផងដែរ”។

ចំណែក Rio Ferdinand អតីត​មិត្ត​រួម​ក្រុម United ជាមួយ​ Rooney ដែរ​​បាន​បង្ហោះ​វីដេអូ នៅលើ​ទ្វីតធើ​កោតសរសើរ​ថា “​ក្មេងម្នាក់នេះពិតជា​មាន​អនាគត​អស្ចារ្យ​មែន។ ខ្ញុំ​បានឃើញផ្ទាល់ភ្នែក​កាលគាត់នៅវ័យ​១៦​ឬ១៧​ឆ្នាំ​ ហើយខ្ញុំចាំបាន​ថា បន្ទាប់ពី​បញ្ចប់ការប្រកួត​ជាមួយ​ក្រុមជម្រើស​ជាតិ​អង់គ្លេស​ ខ្ញុំ​បាន​ប្រាប់​ឪពុក​ម្តាយ​គាត់ថា ត្រូវ​ធ្វើ​ឲ្យ​ប្រាកដថា គាត់ចុះកិច្ចសន្យា​លេងជាមួយ​ក្លឹប Manchester United “៕

adverise with khmeread